إيه اللي فاتنا وإحنا مشغولين في متابعة ماتشات إفريقيا؟

في وسط زحمة كأس الأمم الإفريقية وتركيز الجماهير الإفريقية والعربية على البطولة وماتشاتها الكتيرة بس فيه ناس فاتها أحداث رياضية حصلت كتير وعدّت من غير ما تاخد حقها في المتابعة سواء على المستوى المحلي أو العالمي وفي رياضات مختلفة مش كورة قدم بس.. وعشان كده هنقولك إيه اللي ممكن يكون فاتك وأنت مشغول في متابعة بطولة أمم الإفريقية.

زحمة في أوروبا 

في إنجلترا جولات بوكسينج داي عدّت بماتشات تقيلة وصراع قوي على القمة وأرسنال فضل محافظ على الصدارة بـ45 نقطة بعد فوزه على برايتون.. وأستون فيلا وراهم السيتي حاول يقرب لكن اتعادل قدام سندرلاند وبقى الفارق مع أرسنال 4 نقاط بعد ما كان نقطتين.

ليفربول كمان كمل سلسلة انتصاراته والأداء مستقر رغم غياب محمد صلاح وكذا لاعب بسبب الإصابات وقدر يدخل المربع الذهبي حتى مع التعادل قدام ليدز يونايتد.

في إسبانيا الدوري لعب آخر جولة قبل التوقف الشتوي اللي تزامن مع انطلاق كأس الأمم وريال مدريد وبرشلونة مكملين سباق الصدارة.. والدوري هيرجع بكرة 3 يناير والبارسا لسه في الصدارة برصيد 46 نقطة بفارق 4 نقاط عن الريال.

أما الدوري الإيطالي فمستمر في الإثارة والمنافسة قوية جدا ولسه الفارق أربع نقاط بس بين أول خمس فرق إنتر متصدر بـ36 نقطة وراه ميلان 35 نقطة وبعده نابولي 34 نقطة وبعدين روما بـ33 ويوفنتوس بـ32 نقطة.

إنما في الدوري السعودي رجع فجأة بعد توقف فترة بسبب كأس العرب وبطولات تانية ولسه النصر في الصدارة لكن الاتفاق وقف سلسلة انتصاراته من بداية الموسم وتعادل معاه وبقى الفارق مع الهلال الوصيف نقطتين بس والتعاون مكمل كمفاجأة الموسم في المركز التالت بـ28 نقطة.

إثارة محلية

في مصر الأهلي بيمر بفترة صعبة شوية بعد خسارات متتالية في بطولة كأس عاصمة مصر واللي قرب يودعها بعد 3 هزائم آخرهم قدام المقاولون والمفاجأة الأكبر كانت الخروج من كأس مصر قدام المصرية للاتصالات في دور الـ32 من البطولة.

والزمالك كمان حصل فيه حدث وهو إنه أعلن اعتذار أحمد عبد الرؤوف عن تدريب الفريق الفترة الجاية بسبب أزمة مستحقات اللاعبين المتأخرة رغم إنه قدر يوصل بالفريق لدور ستاشر كأس مصر بعد الفوز على بلدية المحلة.

رياضات تانية

محليًا الأهلي كسب السوبر المصري لكرة السلة على حساب الاتحاد السكندري ودي تاني مرة الأهلي يفوز بالسوبر.

وكمان وزارة الشباب والرياضة أصدرت بيان بخصوص اتحاد السباحة بعد قرار النيابة العامة إحالة مجلس الإدارة للمحاكمة الجنائية العاجلة بسبب وفاة سباح نادي الزهور يوسف محمد.. وأكدت إن في تواصل مع الاتحاد الدولي للألعاب المائية لتعيين لجنة مؤقتة تدير شؤون الاتحاد الفترة الجاية حسب اللوائح.

وفي دبي اتلعبت مباراة استعراضية في التنس بين نيك كيرجيوس وآرينا سابالينكا وانتهت بفوز كيرجيوس والماتش كان ترفيهي أكتر منه تنافسي واتلعب ضمن فعاليات استعراضية مش بطولة رسمية.

وفي الـNBA كواهي ليونارد قدّم مباراة تاريخية وسجل 55 نقطة أعلى رقم في مسيرته وقاد لوس أنجلوس كليبرز للفوز على ديترويت.. ويكمل الفريق سلسلة الانتصارات للمباراة الرابعة على التوالي.

ورغم غياب عدد من اللاعبين كليبرز لعب بتشكيلة أساسية معظمها لاعبين كبار في السن وحقق رقم مميز كأول فريق من سنة 2016 يشارك بأربعة لاعبين أساسيين أعمارهم 34 سنة أو أكتر.

وفي الآخر ومع سخونة كأس الأمم الإفريقية وتركيز العيون كلها على البطولة تفضل الساحة الرياضية أوسع وأغنى بكتير من بطولة واحدة أو حدث واحد دوريات مشتعلة محليًا وعالميًا.. وأرقام بتتسجل ومفاجآت بتقلب الموازين وقصص نجاح وإخفاق بتحصل كل يوم يمكن تعدي من غير ما تاخد حقها في المتابعة بس بتأكد إن الرياضة دايمًا عايشة ومتحركة ومليانة تفاصيل تستاهل تتشاف وتتحكي مهما كان الضوء مسلط في مكان تاني