إيه اللي هيحصل لو دايمًا ماعندكش رأي؟ وتحل الحوار ده إزاي؟

زي ما فيه ناس بتقدر تفتي بكل بساطة.. فيه ناس تانية ما بتكونش رأي أساسًا عن المواضيع خالص.. ودي حاجة ممكن تخليه يتأثر أو يبقى ضحية للآراء التانية اللي ممكن يكون ضدها بس هو مش عارف ده.. فإزاي تحل الحوار ده؟

ليه أصلا فيه ناس ماعندهاش آراء؟

1- قابلة الإيحاء – Suggestibility

لما مايكونش عندك رأي أو موقف مبدئي عن موضوع معين بتبدأ تصدق وتتبنى أفكار من غير ماتفكر فيها أصلا وحتى من غير ما تنتقد الأفكار دي.. حاجة كده اللي هو صباح الفل عندنا آراء إيه النهاردة وتاخد أول حاجة حد اقترحها في وشك وتتعامل على أساسها.

2- مركز التحكم الخارجي – External Locus of Control

وهنا اللي بيحصل إن أنت بتشوف حياتك وآرائك بتتكون من الناس والظروف اللي حواليك مش من جواك فدايمًا هتمشي ورا الاتجاه والذوق العام.. وده في الغالب سببه بيكون عشان تلاقي حاجة ترمي عليها اللوم لما يحصل أي مصيبة أو حاجة غلط وفي الغالب بتبقى شايف إن أنت مش هتقدر تغير وضعك من خلال جهودك الخاصة أو تفكيرك الخاص

3- الامتثال – Conformity

ودي شبه شوية النقطة التانية بتاع التحكم الخارجي ولكن الاختلاف الوحيد هو الدافع.. هنا بتدور على مجموعة تكون منتمي ليها أو ناس تكون وسطهم حتى لو مش مقتنع بالحاجة دي.. أو عندك رأي عادي بس بتتأثر بضغط المجتمع واللي حواليك.. أو بتتأثر بالبيئة المحيطة فلو كوّنت رأي مختلف ولقيت المنطقة أو البيئة اللي حواليك عندهم رأي تاني ممكن ترجع في كلامك

4- الكسل العقلي – Cognitive Laziness

زي ما فيه ناس كده بيحبوا يلاقوا أكل من غير مجهود فبيطلبوا على طول أكل جاهز من بره.. فيه ناس تانية برضه بتحب تلاقي الأفكار على الجاهز أو خلينا نقول “الآراء” متكونة وجاهزة وياخدوها بدل ما يبذلوا مجهود ويفكروا.. هيدور على آراء جاهزة ويختار منها على طول وبرضه من غير تقييم ولا تحليل لأنه كده كده مكسل

طب إزاي تتعامل مع حاجة زي دي وتحلها؟

• اسأل وتسائل قبل ما تتبنى فكرة أو رأي.. هل ده رأيي فعلًا؟ ولا مجرد عجبني الأسلوب اللي اتقال بيه؟ ولا أنا مختاره عشان أمشي ورا القطيع؟ وأخيرًا أنا موافق عليه ليه؟

• خد وقتك في التفكير.. مش لازم أول ماتشوف حاجة تتبنى رأي في ساعتها أو يكون عندك وجهة نظر فورية فحاول تقرأ وتدور وتسمع كتير وبعدين ابدأ واحدة واحدة راجع تجاربك الشخصية وهنا ممكن تبدأ تكون رأي من جواك أنت “ويكون قابل للتعديل عادي لما تشوف حاجة منطقية ومقتنع بيها ومن مصدر موثوق”

• حاول تقرأ من مصادر مختلفة.. عشان تشوف كل أشكال الموضوع وكل التصورات عنه لازم تقرأ من مصادر مختلفة وبعدها ييجي دورك في التحليل والمقارنة ومايكونش فكرة من شخص واحد هي اللي أثرت عليك

• درّب دماغك على النقد.. مش كل حاجة تصدقها بسهولة أو تقتنع بيها بسهولة وأول ما تشوف أو تقرأ وجهة نظر ورأي لازم تشوف إيه الجزء الضعيف فيها وليه هو مش مقنع وكمان شوف السؤال المفتوح فيه وله كذا إجابة.. ومع كل موقف أو حدث بيحصل هتلاقي رأيك بيتطور ودماغك متعودة على كل الخطوات دي بشكل تلقائي

• احترم رأيك.. لو رأيك أنت شايفه بسيط برضه لازم تحترمه وتتمسك بيه شوية ومش لمجرد نقد بسيط له تستغنى عنه

في النهاية الأكيد والأفضل إن يكون عندك رأي شخصي مكونه بنفسك مش مجرد رأي أنت واخده على الجاهز من حد عشان على الأقل لو حد سألك عنه تقدر تـ Fight for it وتقدر نفسك وتحترمها وكمان الناس تحترمك