إيه الوقت الأمثل إنك تعمل لحد Unfriend أو Unfollow؟
مع وجود السوشيال ميديا في كل تفصيلة في حياتنا اليومية.. بقى عندنا مئات أو حتى آلاف المتابعين أو “الصحاب” اللي بنتابعهم وبيتابعونا كل يوم.. بس على أرض الواقع بقا، عدد قليل منهم هم اللي إحنا عارفينهم بجد واتعاملنا معاهم بشكل شخصي وبنشاركهم لحظات حياتنا.. وأحيانا بنعدي بمواقف كده بتخلينا نفكر نعمل “unfriend” لحد من الـ friend list بتاعتنا على فيسبوك أو unfollow على إنستجرام.. وبيبقى فيه سؤال كده: هل موضوع الـ unfriend والـ unfollow ده تافه؟
يمكن الموضوع يبان بسيط من برا.. مجرد ضغطة زرار بتشيل شخص من حياتك الافتراضية.. لكن ساعات بيبقى ليها تأثير أعمق لأنها بتأثر على طريقتنا في التواصل والحدود اللي بنرسمها لعلاقاتنا الافتراضية.. بما إننا بنقضي وقت كبير جدا على السوشيال ميديا.. والفكرة في الآخر مش مجرد إلغاء صداقة أو متابعة افتراضية لكن إزاي نحمي نفسيتنا ونخلي وجودنا على السوشيال ميديا مريح وصحي أكتر.
وغالبا الأوقات اللي بتحس فيها إنك عايز تعمل unfriend أو unfollow لحد بتكون لما تحس إن وجوده على الفيسبوك أو إنستجرام أو أي منصة تانية بيأثر عليك بشكل سلبي أو إنه بقى عبء عليك.. طب إيه الوقت الأمثل إنك تاخد قرار زي ده؟
أول حاجة بتبقى متعلقة بالحاجات اللي انت بتنزلها أو بتشاركها وردود فعله هو على الحاجات دي:
1- لو بتحس إنك مش عارف تشارك حاجات شخصية عشان مقلق من رد فعله.. أو بييجي في بالك وانت بتنزل حاجة عن نفسك إنه يفهمك غلط أو يضغط عليك بأسئلة شخصية مش مناسبة ليك وهتعملك صداع
2- لما يكون وجوده على السوشيال ميديا مسببلك ضغط إن العلاقة من طرف واحد.. مش بيتواصل معاك غير عشان حاجة عايزها بس بيختفي تماما لو انت محتاجه في حاجة وفي نفس الوقت بيبقى متوقع منك إنك تبقى موجود على طول
3- لو بيعملك دراما ومشاكل.. وبيعمل حوارات ممكن تضرك زي إنك تلاقيه بيتكلم عنك بشكل مش لطيف أو بينقل كلام غلط عنك أو بينقل تفاصيلك اللي بتنشرها على السوشيال ميديا قدام الناس في الحياة الواقعية
4- لو اكتشفت إنه بيستغل وجوده على السوشيال ميديا عشان يراقبك ويعرف أخبارك.. وبيسألك أسئلة مش من حقه ويقولك رأيه اللي انت ماطلبتوش وده بيسببلك شعور بعدم الراحة.. وبتحس إنه عايز يعرف عنك أكتر من اللي انت حابب تشاركه
5- لما تلاقي نفسك عامل mute لكل بوستاته والستوريز بتاعته عشان ترتاح من خلقته.. وممكن أصلا تلاقي نفسك عامل له mute على طول.. وده أكبر مؤشر إنك مش مرتاح لوجوده.. وتبقى بتسأل نفسك هو ليه لسه عندي أصلا؟
6- لما يكون بيظهر بشكل غير مرحب بيه في بوستاتك أو صورك أو الستوريز بتاعتك.. وبيدخل يكتب كومنتات بشكل سخيف أو مش في محله على صورك أو لحظاتك الشخصية اللي حابب تشاركها مع ناس معينين
7- لو دايما بيفهمك غلط وبيترجم كلامك بنية سلبية.. وبياخد كل كلمة بتقولها ويطلع منها حاجات مش قصدك توصلها.. فتحس إنك طول الوقت بتدافع عن نفسك وآرائك وبتحاول تشرح وتبرر نفسك
8- لما يكون دايما بيحاول يجادلك ويثبت إن وجهة نظره هو اللي صح ووجهة نظرك غلط في كل حاجة.. هو علطول شايف إن أي حاجة تقولها لازم يقول رأيه فيها ويعرفك الصح.. حتى لو الموضوع تافه
وتاني حاجة بتبقى متعلقة بالحاجات اللي هو نفسها بينزلها أو بيشاركها:
1- لما تحس إن الشخص ده بيملا الـ timeline بتاعك بوستات سلبية أو حاجات تحبطك.. كل بوستاته نكد أو شكوى.. وده بيأثر عليك بشكل سلبي وبيجيلك ضيق تنفس لما تشوف بوستاته
2- لو بتحس إنك في مقارنة طول الوقت معاه.. حتى لو هو مش السبب.. بس ممكن يكون بيشارك إنجازات ومواقف تخليك تقارن نفسك بيه.. وده بيأثر على نفسيتك.. فـ لو هو مش شخص مهم عندك على المستوى الشخصي مفيش مشكلة لو شيلته على المستوى الافتراضي
3- لما يبقى الشخص ده بيشارك حاجات بتسبب لك توتر أو حساسية أو ببساطة بتضايقك أو بتعصبك.. زي مثلا آراءه السياسية أو الدينية أو الاجتماعية.. اللي انت مش بترتاح ليها أو بتحس إنها بتضغط عليك أو بتضايقك لما تشوفها
وفي النهاية.. انت لوحدك اللي تقدر تحدد إذا كنت فعلا محتاج تعمل unfriend أو unfollow للشخص ولا ممكن تسيب الوضع زي ما هو وتتعامل بشكل أخف معاه.. وكل واحد له طريقته في التعامل مع السوشيال ميديا.. فيه ناس بتحب الـ timeline بتاعهم يبقى مليان آراء وأفكار متنوعة وممكن يتحملوا وجود اختلافات من غير ما يحسوا بأي ضغط.. بس لما وجود شخص معين يبتدي يسببلك ضيق أو شعور سلبي أو إحباط أو إنه بيسرق منك الراحة اللي بتحسها في مساحتك الشخصية على الإنترنت.. هنا ممكن تفكر فعلا إنك تبعده.. عشان في الآخر السوشيال ميديا بتاعتك هي المساحة اللي من حقك تسيطر عليها وتخليها على مزاجك وتبني فيها عالم افتراضي يبقى شبهك ومريح بالنسبالك.. يعني مش هنبقى متكدرين في حياتنا الواقعية والافتراضية كمان.
