إيه حكاية الـ Labubu Doll اللي منتشرة الفترة دي على التيك توك؟
الأيام دي منتشر على تيك توك فيديوهات لعروسة شكلها غريب ومرعب حبة بتتعلق في الشنط واسمها “لابوبو- Labubu” وجربها مشاهير وناس كتير على السوشيال ميديا بألوان مختلفة.. أسعارها خزعبلية بس بيقولوا إنها هتبقى تريند جديد في الموضة.. طب إيه قصة العروسة دي وإمتى دخلت في حياتنا كده؟
إمتى ظهرت؟
عروسة “لابوبو” ظهرت في 2015 لما اخترعها الرسام “كاسينج لونج” كشخصية في سلسلة “الوحوش” اللي ابتكرها في كتب مصورة ليه مستوحاة من الأساطير الإسكندنافية.. اللي هي يعني الأساطير والمعتقدات اللي كانت موجودة في السويد
والدنمارك وأيسلندا والنرويج
مين هي الـ “لابوبو”؟
شخصية قزمة وبالنسبة للكتب فهي بنت.. ودانها كبيرة وواضحين وأسنانها مسننة ومدببة كده ومعندهاش ديل.. وعروسة “لابوبو” دي أصدروا منها أكتر من 300 شكل ولون وبأحجام مختلفة
ليه بقت تريند في الموضة؟
العروسة بقت تريند بعد ما “ليزا” من فرقة “Black pink” نزلت صورة ليها وهي حطاها في شنطتها.. ومن بعدها مشاهير كتير بدأوا يعلقوها في شنطهم.. وبدأت البراندات العالمية تتعاون مع “بوب مارت” الشركة المنتجة للعروسة عشان تكسب من شعبيتها
الـ “لابوبو” بتجيلك إزاي؟
في بوكس غامض كده مابتبقاش عارف إيه جواه وبتتفاجئ بلونها وشكلها.. وده عنصر المفاجأة والحماس في الموضوع.. وفيه لون مميز لو جالك تبقى أنت محظوظ يا معلم… والعروسة دلوقتي بقت بتتباع بشكل خرافي لدرجة إنها خلصت من السوق وابتدت مصانع تبيع النسخة المضروبة منها
في الآخر سواء خوفت من الـ “لابوبو” أو حبيتها فدايمًا إحنا بنحب نصرف فلوسنا على أي حاجة تافهة وبعدها نعلن إفلاسنا في نص الشهر.. وتبدأ تطلب “خمسمياية سلف” من ماما وبابا لحد أول الشهر
