إيه حكاية الـBossaball اللي بتجمع الكورة والترامبولين والمزيكا؟
لو شفت قبل كده ناس بتلعب كورة وهما بيطيروا في الهوا وبيعملوا حركات شبه الجمباز أو السيرك فغالبًا كنت بتتفرج على لعبة اسمها Bossaball.
اللعبة دي مختلفة تمامًا عن أي رياضة تانية لأنها خليط بين الكرة الطائرة وكرة القدم والجمباز.. وكمان فيها لمسة من رقصات الكابويرا البرازيلية.
والأغرب إن كل ده بيتلعب على ملعب فيه ترامبولين ضخم يخلي اللعيبة تنط مترات في الهوا.
إيه هي لعبة Bossaball؟
Bossaball لعبة جماعية بين فريقين وكل فريق فيه من 3 لـ5 لاعبين.. والهدف بسيط: تحاول توقع الكرة في ملعب الفريق التاني وتسجل نقطة.
لكن المختلف هنا إن أرضية الملعب نفسها هوائية شبه المراتب الكبيرة وفي نصها ترامبولين يخلي اللاعب يطير في الهوا ويضرب الكرة بقوة وحركات استعراضية.
كورة بالرجِل والإيد والرأس
الميزة في اللعبة إن اللاعب يقدر يستخدم أي جزء من جسمه:
إيده.. رجله.. رأسه أو صدره.. وده اللي بيخليها خليط واضح بين كرة القدم والكرة الطائرة.. ومعاهم شوية جمباز واستعراضات في الهوا.
فكرة اللعبة جت إزاي؟
اللعبة اتاخترعت سنة 2004 على إيد البلجيكي فيليب إيكمانز.. وإيكمانز كان بيحب الرياضة والموسيقى.. ولما سافر البرازيل اتأثر جدًا بثقافة الشواطئ هناك.
شاف الناس بتلعب كورة وطائرة.. وفي نفس الوقت فيه رقص ومزيكا.. ففكر يعمل لعبة تجمع كل الحاجات دي في رياضة واحدة.
ليه اسمها Bossaball؟
اسم اللعبة جاي من كلمة “Bossa” في البرتغالية.. ومعناها الأسلوب أو الروح.. وهي نفس الكلمة المرتبطة بموسيقى البوسا نوفا البرازيلية.. يعني الاسم نفسه بيعبر عن فكرة اللعبة: رياضة + مزيكا + استعراض في الهوا.
ملعب مختلف
ملعب Bossaball مش شبه أي ملعب رياضي.. يعني هو عبارة عن أرضية هوائية كبيرة زي المراتب.. وفي نص كل جانب ترامبولين.
الترامبولين ده أهم جزء في اللعبة لأنه بيسمح للاعبين يطيروا عالي جدًا في الهوا ويعملوا ضربات قوية أو حركات أكروباتية.
قوانين اللعبة باختصار
قوانين Bossaball قريبة شوية من الكرة الطائرة.. بيكون كل فريق ممكن يلمس الكرة لحد 5 مرات قبل ما يرجعها للخصم.
النقاط بتتحسب حسب مكان سقوط الكرة: نقطة لو وقعت في أرض ملعب الخصم و3 نقاط لو وقعت على الترامبولين عندهم.
ليه الناس بتحب تتفرج عليها؟
المباراة بيكون فيها مزيكا شغالة طول الوقت.. وأحيانًا الحكم نفسه بيبقى شبه الـDJ.. وغير كده اللعيبة بتعمل حركات مذهلة في الهوا زي دوران كامل أو ضربة مقصية وهم طايرين على الترامبولين.. عشان كده اللعبة بتبقى ممتعة جدًا في الشواطئ والمهرجانات الرياضية.
انتشار اللعبة في العالم
رغم إن اللعبة جديدة نسبيًا لكنها بدأت تنتشر في دول كتير زي البرازيل وإسبانيا وهولندا وألمانيا وفرنسا.. وكمان ظهرت في دول عربية زي قطر والسعودية وحتى مصر بدأت تستضيف عروض للعبة في بعض الفعاليات.
بطولات وعروض عالمية
من سنة 2005 بدأت تتعمل بطولات Bossaball في أكتر من دولة ومن أهمها كأس العالم Bossaball 2009 وبعدها كأس أوروبا في 2010 و2011.. وفي 2016 ظهرت اللعبة قدام جمهور عالمي خلال فعاليات أولمبياد ريو كعرض رياضي جذب انتباه ناس كتير.
هل ممكن تبقى رياضة أولمبية؟
لحد دلوقتي Bossaball مش رياضة أولمبية ومفيش اتحاد دولي رسمي زي باقي الألعاب لكن مع انتشارها في البطولات والمهرجانات وتعاونها مع اتحادات رياضية كبيرة ممكن في المستقبل تبقى لعبة معترف بيها بشكل أوسع.. ويمكن يوم من الأيام نشوف مباريات طيران بالكورة في الأولمبياد.
