ليه “أدفوكات” قرر يسيب كوراساو قبل المونديال الأول ليهم بشكل مفاجئ؟

“لطالما قلت إن العائلة تأتي قبل كرة القدم.. لذلك فإن هذا قرار طبيعي ومع ذلك سأفتقد كوراساو وشعبها وزملائي كثيرا”.. ده كان تصريح من مدرب منتخب “كوراساو” الهولندي “ديك أدفوكات”.. المدرب اللي قرر يسيب منتخب لأول مرة يوصل كأس العالم ويستقيل ومش بس كده ده بعد ما يحقق له هو الإنجاز التاريخي ده.

دولة “كوراساو” واللي غالبًا ممكن تكون ماتعرفش مكانها فين على الخريطة هي جزيرة في جنوب البحر الكاريبي.. وعشان كده فبتأهلها لكأس العالم للمرة الأولى في تاريخها سجلت رقم قياسي بكونها أصغر دولة سكانيًا توصله.

منتخب كوراساو كسب 10 ماتشات ماخسرش ولا ماتش وسجل 15 هدف.. وأكيد مفيش شك إن زيادة عدد المنتخبات المشاركة في كأس العالم اللي جاي كان أحد الأسباب اللي ساعدت في ده.. بس كمان مانقدرش نقول إنه يقلل من أي إنجاز للمنتخب واللي أغلب الناس شافت إنه قدم أداء كبير فعلاً في التصفيات.

عشان وقبل كأس العالم بـ 4 شهور بيقرر مدربهم “ديك أدفوكات” إنه يستقيل.. تعب وشغل وتحقيق إنجاز تاريخي ممكن مايقدرش أدفوكات إنه يعمله مع أي منتخب تاني.. وآمال من شعب ومنتخب ولاعيبة في محاولة للتعرف على العالم وتقديم نفسهم من خلال كأس العالم وكل ده الأكيد إنه هيحصل ولكن هيبقى ناقص كتير بغياب واحد من أعمدة الإنجاز ده.

اتحاد منتخب كوراساو أعلن إن استقالة أدفوكات كان بسبب مرض ابنته واللي محتاج إنه يكرس وقته أكتر للإهتمام بيها.. وقال إن اللي عمله مع المنتخب من أبرز الإنجازات اللي عملها.. وإنه فخور بالطاقم بتاعه ومجلس الادارة اللي ادوله الفرصة دي ولاعبيه.

أدفوكات رحل عشان مش بس يسيب إنجازه التاريخي ده.. لا كمان ساب إنجاز شخصي تاني كان هيتسجل بإسمه إنه يبقى أكبر مدرب لمنتخب في نهائيات كأس العالم (78 سنة).. عشان يمشي أدفوكات بس يسيبنى مع سؤال مهم.

هو إيه الأولوية الحقيقة في حياتنا؟ إيه المعنى الأهم؟ وساعة الاختيار الحقيقي والصعب فعلاً في حياتنا بين اللي بنحبهم وبين المنطق والعقل والإنجازات هيبقى الاختيار الصح وقتها إيه؟.. أسئلة كتير جدًا صعبة الإجابة بس ده يمكن لينا إحنا من بعيد.. والأكيد إنها ماكنتش نفس الحسبة بالنسبة للأب أدفوكات مش المدرب واللي زي ما بدأنا بكلامه مهم ننهي بيه تاني ونكرر ونفكر نفسنا دايمًا إن الإجابة هتفضل طول عمرها هي الإجابة نفسها: “إن العائلة تأتي قبل كرة القدم”.