إيه هم القراءات العشر للقرآن الكريم؟
كام مرة كنت معدي في المطبخ تجيب كوباية ماية بليل ولا راكب عربيتك ورايح شغلك الصبح.. ولا حتى ماشي جنب قهوة في الشارع.. وسمعت صوت بيقول “إذاعة القرآن الكريم من القاهرة.. يتلو علينا القارئ الشيخ محمود خليل الحصري.. ما تيسر من سورة البقرة برواية حفص عن عاصم”؟
عمرك بقى سألت نفسك هو مين حفص عن عاصم ده؟ أو يعني إيه رواية؟ طب هو فيه روايات تانية؟
الإجابة آه فيه.. لأن القرآن الكريم بيتقرأ بعشر قراءات!
والقراءات العشرة دي عبارة عن طرق مختلفة لنطق بعض الكلمات في القرآن الكريم.. أو اختلاف بسيط في حركات الحروف زي التشكيل مثلًا.. وأحيانًا في صيغة الكلمة نفسها.
طب ليه فيه قراءات كتيرة؟
لأن زمان كان فيه قبائل مختلفة وكل قبيلة ليها طريقة نطق معينة.. زي ماتقول كده الفرق بين الإسكندراني والصعيدي والقاهري مثلًا.. فالقراءات المختلفة بتسهل النطق على لهجات كتير.
ومن باب التيسير والرحمة على كبار السن والأطفال والناس اللي متعودين على لهجة معينة.
لازم ناخد في اعتبارنا 3 حاجات عشان نقول إن القراءة دي صحيحة:
1. موافقة اللغة العربية
لازم القراءة تكون ماشية مع قواعد النحو واللغة العربية اللي العرب كانوا بيتكلموا بيها وقت نزول القرآن الكريم.
2. موافقة الرسم العثماني
والرسم مش بمعناه اللي نعرفه.. الرسم هنا معناه طريقة الكتابة.. لازم القراءة تكون متوافقة مع طريقة كتابة المصحف اللي سيدنا عثمان بن عفان رضي الله عنه جمعه.
واللي ببساطة هي إن زمان المصاحف العثمانية كانت مكتوبة من غير “نقط” ولا “تشكيل” ولا “ألف”.. وده عشان يبقى للكلمة الواحدة أكتر من نطق أو قراءة.
يعني مثلًا في سورة “الفاتحة” الآية الرابعة: مَٰلِكِ يَومِ ٱلدِّينِ.
“مَٰلِكِ” هنا ممكن تتقرأ بقراءتين.. مالك أو ملك.. والاتنين صح.
3. التواتر “أهم شرط”
لازم تكون القراءة اتنقلت من النبي صلى الله عليه وسلم عن طريق “جمع” من الناس.. وجمع ينقل لجمع وهكذا.. ماينفعش تكون رواية شخص واحد بس.
طب إيه هما أئمة القراءات العشر الصحيحة؟
- نافع المدني: راوياه قالون وورش.
- ابن كثير المكي: راوياه البزي وقنبل.
- أبو عمرو البصري: راوياه الدوري والسوسي.
- ابن عامر الدمشقي: راوياه هشام وابن ذكوان.
- عاصم بن أبي النجود الكوفي: راوياه حفص وشعبة.
- حمزة الزيات الكوفي: راوياه خلف وخلاد.
- الكسائي الكوفي: راوياه الدوري وأبو الحارث.
@hambash83 من سورة الحجرات بقراءة حمزة الكوفي (فتثبتوا) قرأها حمزة والكسائي وخلف العاشر #القران_الكريم #اذاعة_القرأن_الكريم #المنشاوي_قرآن_كريم_رحمة_الله_عليه #المنشاوي_قرآن_كريم #alminshawi_المنشاوي #free_palestine🇵🇸 #محمد_صديق_المنشاوي
- أبو جعفر المدني: (أحد القراء الثلاثة المتممة للعشرة).
- يعقوب الحضرمي البصري: (أحد القراء الثلاثة المتممة للعشرة).
- خلف العاشر: (أحد القراء الثلاثة المتممة للعشرة).
بس يا سيدي.. أديك عرفت يعني إيه رواية.. وعرفت الرواة نفسهم كمان.. بعد كده مقدمة إذاعة القرآن الكريم مش هتعدي عليك عادي تاني!
