إيه هو السبب العلمي وراء حب الناس في الفرجة على برامج المقالب؟

بما إننا داخلين على رمضان واللي معروف بالعزومات والسهرات والتليفزيون، فكرنا “ليه في ناس بتحب تتفرج على برامج المقالب” أصل ليه أشوف حد بيجري من حيوان ولا بيغرق وتبقى حاجة بتضحك؟!

من زمان ورمضان معروف بموسم المقالب مع اختلاف المسميات والبرامج والأفكار، لكن الفكرة دايمًا بتكون هي هي.. شخص بيحصل معاه موقف هو مش عامل حسابه عليه ويتفاجئ بيه والمحتوى بيكون رد فعله وطريقة تفاعله مع الموقف.

الباحثة الأمريكية “مينا سيكارا” بتقول في بحثها “Their pain, our pleasure: stereotype content and schadenfreude”
إن ده في علم النفس معروف بـ “الشادنفرود”، وهو مصطلح ألماني بمعنى “الضرر + الفرح”  وبيتم استخدامه في علم النفس لتفسير سعادة بعض الأشخاص من مصايب ناس تانية ومصايب هنا بتمتد من أول ما عربية تتخبط لحد المقالب اللي بنشوفها في التليفزيون.. بمعنى أصح هي التشفي في شخص تاني.

بس برضه، إيه علاقة ده ببرامج المقالب؟ أنا قاعد بتفرج وبشرب شاي..ماعملتش حاجة.

الكاتب “دين برنيت” بيشرح في مقال ليه في BBC Science Focus إن الإنسان بأصله كائن اجتماعي وبيقارن نفسه بالناس.. حتى اللي بيقولوا إنهم مش بيهمهم رأي الناس، هم جوا بيهمهم عادي.. وإننا دايمًا على دراية بالناس اللي حوالينا ومكانتنا الاجتماعية.. ومن هنا تيجي النقطة المهمة.. احنا طول الوقت عايزين نترقى اجتماعيًا وده بيحصل من خلال طريقتين، يا بنعمل انجازات تعلينا، يا الناس التانية بتعمل حاجة تقلل مكانتهم فبالتالي مكانتنا بترتفع، وده مش لازم يكون ملحوظ بشكل مادي ولكن حتى بيننا وبين نفسنا.

بمعنى تاني، انت لما بتشوف حد في مقلب اتضحك عليه أو معرفش إن ده مش حقيقي وتحس إنك لو مكانه كنت قفشتها من أول دقيقة، بيبقى فيه انبساط بينك وبين نفسك وبتشوف إنك أذكى أو أحسن منه.

وكمان انت بتفصل نفسك عن الشخص ومش بتحط نفسك مكانه وده بيكون بسبب إنك شايفه من جماعة تانية أو مش شبهك، علشان لو حطيت نفسك مكانه فأكيد انت مش هتضحك لو واحد عمال يزحلقك ويغرقك.

الموضوع ده متأصل في الدماغ البشرية ومعروف بـ “فرضية العالم العادل” وهو إن الناس بتشوف إن العالم منصف والإنسان بياخد اللي يستاهله فأكيد اللي بنضحك عليه ده “يستاهل” وكمان بنبقى عارفين إن اللي بيحصل مش موقف حقيقي بمعنى إن في الأخر الشخص اللي بيتعمل فيه المقلب مش هيحصله أذى جسدي حقيقي وده بيخلي الموضوع شوية مضحك بالنسبة لناس كتير وهم بيتفرجوا على واحد بيقنعوه إنه مخطوف مثلًا.

 بعد ما عرفتوا بقى كل الحاجات دي قولولنا..بتحبوا برامج المقالب و مستنيين برامج رمضان السنادي ولا كده كده مالكوش فيها لا؟!