إيه هو الـ Mansplain؟ وهل دي حاجة موجودة عند الرجالة بس ولا الستات كمان؟

الفترة الأخيرة انتشر على “تيكتوك” تريند تحت اسم “Mansplain” للستات اللي بتتعرض للـ Mansplaining من الرجالة.. بس يطلع إيه الـ Mansplain ده؟

يعني إيه Mansplain؟

الـ Mansplain هو مصطلح متكون من كلمتين.. “Man” و “Explain”.. ومعناه إن حد بيشرح حاجة لشخص بطريقة تحسسه إنه غبي أو قليل.. والمصطلح مرتبط بطريقة شرح الرجالة للستات حاجة بتعالي وإنه فاهم أكتر منها وهي عارفاها بالفعل

ظهر إمتى المصطلح ده؟

الكاتبة الأمريكية “ريبيكا سولنت” كتبت مقال سنة 2008 بعنوان “Men Explain Things to Me” واللي اتحول لكتاب بنفس الاسم.. بتوصف فيه المصطلح بشكل دقيق لما حكت إنها كانت في حفلة وقابلت رجل بيقولها إنه سمع إنها أصدرت كتب جديدة.. فبدأت “ريبيكا” تحكيله عن أجدد كتبها واللي كان عن العالم البريطاني “إدوارد مويبريدج”.. فقاطعها الرجل بسرعة وقالها “سمعتي عن كتاب مهم جدًا عن العالم البريطاني إدوارد مويبريدج نزل السنة دي؟” وبدأ يشرحلها عن الكتاب وماهتمش بفكرة إنها المؤلفة.. “ريبيكا” ماستخدمتش المصطلح نفسه لكنها وصفت معنى المصطلح بشكل واضح في مقالها.. والمصطلح اتضاف لقاموس أكسفورد الإنجليزي سنة 2018 

إيه أشكال الـ Mansplain؟

• شرح البديهيات

بيشرح بشكل مفصل للطرف التاني اللي هو فاهمه بالفعل.. وبيعرفه معلومة واضحة تخص شغله في مجال معين اللي هو بقاله كتير بيعمله

• المقاطعة للتوضيح أو التصحيح

طبيعي تحصل مقاطعات في أي حوار بنعمله في يومنا.. لكن في الـ Mansplain الراجل بيقاطع عشان يحرف وجهة نظر الست اللي قدامه حتى لو وجهة نظرها دقيقة وصحيحة ويركز على وجهة نظر الراجل اللي في الأغلب بيكون أقل دراية منها.. وده عشان يفرض سيطرته على الحوار 

• تجاهل خبرة الست أو استبعادها:

لو الراجل لقى ست عندها خبرة ودراية بمجال أو موضوع معين بيستبعدها ويتجاهلها لصالح إن رجل تاني هو اللي يتكلم حتى لو معلوماته عن المجال أو الموضوع أقل منها.. وده ممكن يأثر على التقدم المهني للست 

• اللهجة واللغة المتعالية:

لما الراجل يشرح الموضوع بتبسيط مبالغ فيه واستخدام كلمات معينة يوصف بيها الست كأنه بيعامل طفل زي “حبيبتي”

هي الستات ممكن تعمل Mansplain؟

الأبحاث بتقول إن السلوك ده مالهوش علاقة بالجنس.. وإنه مرتبط بالسلطة الاجتماعية للشكل اللي بيتكلم.. وتفسير المستمع للسلطة الاجتماعية دي.. وفيه مصطلح برضو اسمه Womansplain وهو إظهار الست تفوقها في مجال معين من خلال شرح خبرتها دي بشكل متعالي يقلل من اللي قدامها وده نتيجة الظلم والتقليل اللي بتتعرضله كست ومحاولاتها لإثبات نفسها

إمتى تشرح لحد حاجة؟ وإزاي؟

• اشرح للي قدامك لما هو يطلب منك بشكل مباشر إنه محتاج توضيح للي بتقوله من غير ما تفترض إنه مش فاهم.. لأن الإصرار على الشرح بعد توضيح الشخص إنه مش محتاج شرح فدي إشارة على عدم احترام عقلية الطرف التاني.
• ولما تيجي تشرح لحد حاجة اشرحها بشكل خالي من التكبر أو التعالي وماتستخدمش مصطلحات زي “إزاي مش عارف” وماتوصلهوش إنه جاهل لكونه ماعندوش دراية بالمعلومة دي

وفي الآخر العالم بيتغير بسرعة كبيرة وكل يوم بتطلع معلومات جديدة صعب إن حد يقدر يكون مُلم بيها كلها.. فشئ لطيف منك لو كنت سبب في توصيل معلومة جديدة لحد بشكل راقي بدون تقليل