إيه هو الفرق بين الإحساس بالتقصير السلبي والإيجابي؟

أغلبنا بيحس بتقصير في حاجات وضميره بيبدأ يزاوله شوية حلوين وساعتها بيوصل لمرحلة “جلد الذات” بس في ناس سهلة كده بتعرف تستغل فكرة تأنيب الضمير أو التقصير ده في إنها تاخد زقة محترمة لقدام وتطور نفسها أكتر وتبقى أجمد من الأول.. فا يلا بينا نشوف إيه الفرق بين الإحساس بالتقصير السلبي والإيجابي.. وإزاي تتحول من السلبي للإيجابي عشان تستغل الموضوع!

حسب موقع ScienceDirect وCNN

الإحساس بالتقصير السلبي وجلد الذات:

أول حاجة النقد السلبي ده هو إنك بتمسك دماغك تربطها وتقعد تجلد فيها بقى فا تبدأ تحس إنك فاشل ومالكش قيمة وتحس بالذنب إن توقعاتك خيشت ويٌقال إن “النقد الذاتي السلبي” مرتبط بتطور الاكتئاب فا على إيه البهدلة وتعب النفسية؟

كمان في علاقة بين القبول والمشاعر السلبية مع النقد الذاتي اللي بيكون سلبي.. فا هتلاقيك مش طايق نفسك وحاسس بشعور وحش ومتضايق وده يخلينا نتأكد إنه مش بس سلبي لأ وكمان مؤذي من كذا ناحية

من الأضرار السخيفة للنقد الذاتي هو إن احترامك وثقتك بنفسك بيقلوا.. فا هتلاقي صعوبة في الحاجات الاجتماعية اللي هتتعامل معاها سواء في شغلك أو لما تيجي تكون صداقات وكمان لما تيجي تاخد قرار.. ده يخلينا نبتدي نعرّف الجانب التاني من النقد وهو “النقد الذاتي الإيجابي”

“النقد الذاتي” أو الإحساس بالتقصير الإيجابي:

هو بوابتك الأولى لتطوير نفسك واكتساب حاجات كتير.. عشان النقد الذاتي مش دايمًا بيكون سلبي فا لو استخدمته بطريقة مفيدة عشان تخلص شغلك وتنجز حاجات وتحقق أهداف معينة هتوصل لحاجات إيجابية

لأنك ممكن تستخدمه كطريقة تقيم بيها قراراتك وسلوكياتك وتشوف “هل إنت محتاج تغيير أو تتغير بشكل معين؟” وساعتها تطلع نقط معينة محتاجة تتغير فعلًا وتبتدأ تشتغل عليها وتظبطها كويس 

في الأخر بيكون محاولة استغلال إنه يكون بالتركيز على حاجات واضحة وليها أساس ظاهر إنها مشكلة ومحتاجة تتغير وتتعدل بحاجة أفضل مش إنك بتتشد لحاجات قديمة حصلت وغلطات قديمة وتبدأ باللوم والزعل وهو ده الفرق بينه وبين النقذ السلبي.. وتعالى نقولك إزاي تنتقد نفسك بشكل إيجابي

إزاي تروح من هنا لـ هنا عشان تعرف تستفاد؟ 

حسب ChoosingTherapy

المرحلة الأهم لو تفكيرك سلبي.. 

1- تكون صادق مع نفسك في الحاجة اللي بتفكر فيها.. بمعنى ما تطبلش لنفسك على حاجة غلط ولا تعمل العكس بإنك تنتقد حاجة كويسة عملتها.. وبرضه خد بالك من مزاجك وقتها عامل إزاي

2- تاني حاجة تصفي دماغك كده وتروق بالك ودي حاجة اسمها “الرعاية العاطفية” وتبدأ تتأمل وتفكر بهدوء ويا سلام لو شوية كتابة على ورق عشان تفرغ الأفكار وكمان ترتبها

3- اتعلم تحب نفسك.. عادي جدا تغلط عشان كلنا بنغلط وابدأ قدّر نفسك كويس وبعدها رتب النقط اللي شايفها سلبية قدامك بحيث تحولها لحاجة إيجابية بعد التفكير وبعدها توصل لحلول فعلية مش مجرد بتلوم نفسك إنك غلطت وخلاص

4- اهرب من الرغبة في الكمال.. ماحدش كامل فا خليك واقعي واعرف قيمة نفسك كويس وقدرها بس ما تعليش توقعاتك أزيد من اللازم عشان ماتقعش على وشك 

5- بلاش مقارنات.. المقارنة الوحيدة الإيجابية هي “أنا كنت فين؟” و”دلوقتي بقيت فين؟” وبعدها ترتب بقى إنت محتاج تعمل مجهود زيادة شوية وعندك مساحة لكده ولا هتحمل نفسك فوق طاقتها وترهق نفسك!

في الأخر الكلام مع الناس المحيطة بيك “الشاطرين” و”اللي بيخافوا على مصلحتك” هيكون مفيد ليك جدا عشان تقدر تعرف إنت غلطت امتى ومحتاج تصلح ده امتى وكمان تفهم السبب وساعتها هتتعرف على نقاط قوتك وتحاول تتغير للأحسن وتوصل لـ “النقد الذاتي الإيجابي” وتبقى الدنيا إيزي بيزي خاااااالص…