إيه هو الكذب اللاإرادي وإيه علاماته وأسبابه؟
خلينا متفقين إن الكذب تصرف مؤذي وغلط مهما اختلفت نواياه وأشكاله.. ففيه الكذب الأبيض اللي ممكن حد يضطر ليه عشان يتجنب إنه يجرح حد من غير أي نية للأذى وفيه الكذبة السوداء اللي ممكن حد يستخدمه بقصد عشان يضر الناس اللي حواليه ويأذيهم.. لكن بقى فيه ناس الكذب يومهم ميقدرش يعدي من غير كذب وهو ده الكذب اللاإرادي اللي هنكلمك عنه وعن علاماته وأسبابه
إيه هو الكذب اللاإرادي أو Munchausen Syndrome؟
هوس الكذب أو الكذب المرضي ده اضطراب نفسي مزمن بيزيف فيه الشخص ويختلق أحداث معينة ماحصلتش أو يبالغ بالكذب في أحداث حصلت عشان يبان بطل أو ياخد القبول والتعاطف وساعات تانية بيكذب من أجل إنه أدمن الكذب مش عشان هدف معين.. والاضطراب ده مش بس بيصف إدعاء المرض هو كمان بيصف المرضى اللي بيختلقوا أحداث وهمية
ظهر إمتى الاضطراب ده؟
الاضطراب ده ظهر في القرن الـ 18 واتسمى بمتلازمة “Munchausen ” نسبة للظابط الألماني “Munchausen ” اللي شارك في صفوف الجيش الروسي في حملاته ضد الدولة العثمانية .. ولما رجع ألمانيا كان بيبالغ في حكيه عن مغامراته العسكرية ومابيقولش الحقيقة زي ما هي وكاتب ألماني اسمه “رودولف راسبي” ألف كتاب عنوان “مغامرات مونشهاوزن” مستوحى من قصص البارون الدرامية والخيالية فاختاروا الاسم ده عشان يعبر عن اختلاق المريض وكذبه للأحداث أو حتى الأمراض زي ما الكاتب الألماني عبر عن أفورة البارون في حكاياته بالكتاب
أنواع الكذب اللاإرادي
1- التظاهر بأعراض جسدية.. زي الصداع أو ألم المعدة أو الصدر
2- التظاهر بأعراض نفسية.. زي الهلوسة أو سماع أصوات
3- إدعاء أمراض/ أحداث ماحصلتش أصلًا.. زي إنهم ياكلوا أكل مسمم عشان يتقيأوا ويبانوا إنهم تعبانين
إيه علاماته طيب؟
- الإحساس بالندم: ملغي من عندهم بخصوص أي كذبة ليهم أو حتى خداعهم للناس اللي حواليهم وبيعتبروا ده نوع من أنواع الذكاء.. وبيدافعوا عن كذبهم جامد وكأنهم بيدافعوا عن حاجة حقيقية
- الكذب الدايم: حتى في المواضيع اللي مش مهمة اللي مش محتاجة كذب زي المواعيد والأماكن مثلًا
- التظاهر بإنهم بياخدوا الأدوية وبعد كده يخبوها أو يبصقوها
- المبالغة: في سرد الأحداث وبتبقى غير واقعية
- إدعاء الشعور بأعراض مش موجودة
- التلاعب بالفحوصات الطبية
- تغيير الهوية أو تزويرها
- إيذاء النفس
وإيه أسبابه؟
المصابين بالاضطراب ده بيبقوا عارفين إن هما كذابين وبيسعوا إنهم يحققوا مكاسب عاطفية وشعورية مش مكاسب مادية.. ولحد دلوقتي الدكاترة مايعرفوش السبب الدقيق لهوس الكذب بس فيه عوامل نفسية بتأثر على الأفكار والسلوكيات زي:
- ممكن تكون علامة على الإصابة بمرض من الأمراض النفسية زي:
1- اضطراب الشخصية الحدية وهنا المريض بيستخدم الكذب كطريقة لتجنب المواقف الصعبة
2- اضطراب الشخصية النرجسية: وهنا المريض بيستخدم الكذب لتغطية عيوبة وأخطائه قدام الناس
3- اضطراب الشخصية المعادية للمجتمع: وهنا المريض بيستخدم الكذب للتسلية الشخصية والتلاعب باللي حواليهم ويأذوا مشاعرهم
- تخفيف القلق: الناتج عن الخوف من إن اللي حواليه يسيبوه ويبعدوا عنه
- الرغبة في إن حد تاني يلبي احتياجاته الجسدية والعاطفية.. ورغبتهم كمان في خلق هوية جديدة.. وتركيزه على إنه عايز يتفوق على كل اللي حواليه
- الحفاظ على السمعة والمكانة الاجتماعية في المجتمع
- غياب الثقة بالنفس وقلة تقدير الذات
- الصدمات النفسية: خاصة اللي بتحصل في مرحلة الطفولة أو المراهقة.. زي طلاق الوالدين أو التحرش الجنسي
طب إيه الحل؟
1- العلاج السلوكي المعرفي (CBT): بيساعد المريض إنه يحدد طرق التفكير الغلط ويغيرها.. زي رغبته في الاهتمام وجذب الانتباه اللي بتخليه يكذب ويحدد طرق تانية صحية بدالها
2- العلاج الجماعي: وكمان العلاج الأسري.. خاصة إن الاضطراب ده بيحصل بسبب مشاكل في البيت ودي مشكلة بتمس المجتمع فعلاجها بيبدأ من المكانين دول عشان يساعد المريض إنه يحدد طرق صح يتعاملوا بيها مع المجتمع
3- العلاج السلوكي الجدلي (DBT): والنوع ده من العلاج بيساعد مرضى اضطراب الشخصية الحدية
3- العلاج النفسي مع دكاترة نفسية متخصصة وموثوقة حل ضروري في حالة صعوبة السيطرة على الكذب وتكراره خاصة لو كان بيضر الأشخاص حوالين المريض
الكذب مشكلة كبيرة بتأثر على حياة ناس كتير وبتبوظها فماينفعش نستخف بيها أو نتجاهلها ونتعامل مع كل كذبة إنها بيضا فنعديها.. لأن بغض النظر عن لونها أو نيتك هي في الأول والآخر كذبة
