إيه هو “صيام الدوبامين”؟ وهل مفيد فعلًا ولا مالوش لازمة؟
ما بين الصيام المتقطع وصيام السكريات وصيام الدهون وصيام المياه وغيرهم.. آخر كام سنة عمالة تظهر مصطلحات وأنظمة غذائية وطرق صيام هدفها إنها تخلصنا من السموم بكل أشكالها.. سواء اللي ليها علاقة بالأكل والشرب أو حتى اللي ليها علاقة بالعلاقات والسلوكيات.. وآخر حاجة ظهرت وبقالها فترة تريند هي “صيام الدوبامين”.
تعالوا نتكلم أكتر عن نظام الصيام ده وعن الدوبامين في المطلق حسب مواقع كتير زي Sandstone Care و Medical News Today و Cleveland Clinic
إيه هو الدوبامين؟
الدوبامين هو المادة اللي بتخلي الدماغ تحس بالمشاعر الحلوة.. لكن ساعات بيتحفز زيادة عن اللزوم لأسباب كتير.. والمشكلة بقى إن زيادة الدوبامين بشكل كبير ممكن تخليك تحس بإحساس أسوأ على المدى البعيد.
الدوبامين بيتصنع طبيعي في دماغنا.. وفيه حاجات تانية بتزود مستوياته بشكل كبير هنتكلم عليها كمان شوية.. الدوبامين بيشتغل مع مركز المكافآت في الدماغ فبالتالي هو بيساعد الجسم يحدد الحاجات اللي بيحبها ويحس بالمتعة واللذة.. وعشان كده بيتسمى “هرمون السعادة”.
زمان كان الدوبامين بيساعد الإنسان البدائي يحس بالسعادة لما يلاقي مصادر جديدة للأكل ويفتكر أماكنها علشان يرجعلها تاني.. دلوقتي دماغنا بتعمل نفس الحاجة لما نكتشف أنشطة بنحبها أو ناكل أكلات بنحبها أو نسمع موسيقى حلوة أو نتفرج على فيلم حلو.. لكن للأسف بسبب إن فيه أنشطة كتير محفزة حوالينا وأكبرهم طبعا السوشيال ميديا.. فجسمنا ساعات بيلاقي صعوبة في تنظيم الكميات الكبيرة من الدوبامين اللي بيفرزها.
ولما الجسم ياخد دوبامين كتير من أنشطة مختلفة.. هيبدأ يحتاج كمية أكبر علشان يحس بنفس المشاعر الحلوة.. وده معناه إن زيادة الدوبامين ممكن تعمل تأثيرات سلبية على الصحة العقلية والجسدية على المدى البعيد لأن حالتك المزاجية بتبدأ تقل وتتوتر وتتعصب لما ما تاخدش نفس “الجرعة” اللي انت متعود عليها.
طب تعرف منين لو عندك دوبامين عالي محتاج تنظمه؟ ممكن تحس بالأعراض دي: القلق – طاقة زيادة عن اللزوم – الهوس – التوتر – الأرق – العصبية
وهنا إنت محتاج تبدأ تظبط وتوازن مستويات الدوبامين عندك وده هيساعدك في تحسين صحتك النفسية والجسدية وكمان هيخليك تحس بالراحة والسعادة بشكل عام.. وده ياخدنا لصيام الدوبامين.
يعني إيه صيام الدوبامين؟
صيام الدوبامين أو زي ما بيتسمى أحيانًا “Dopamine Detox” كل الهدف منه إنه يساعد الناس اللي عندهم سلوكيات مش صحية علشان يبدأوا يتعودوا على عادات أحسن.. والصيام ده بيعتمد على إنك تبطل تعمل الأنشطة أو تستمتع بالحاجات اللي بتزود إفراز الدوبامين بشكل كبير بحيث تقل رغبتك في المكافآت السريعة.
الصيام ده بيخليك تقلل الأنشطة الإدمانية علشان تقدر تفهم إحساسك الحقيقي بالرغبة أو الاحتياج.. وبعد كده هتبدأ تكسر الأنماط اللي كنت عايش بيها.. والصيام ده مش معناه إنك تمنع نفسك عن كل حاجة حلوة في حياتك.. لأنك حتى لو عملت كده الدوبامين بيتصنع طبيعي في الدماغ.. يعني الدوبامين مش عدوك.. إنت بس محتاج تحطله حدود واضحة علشان مايزيدش عن حده.
صيام الدوبامين بياخد وقت قد إيه؟
عادةً صيام الدوبامين بيكمل حوالي 90 يوم.. وفيه ناس بتجربه كام ساعة وفيه ناس بتجربه كام يوم.. كل شخص عنده علاقة مختلفة بالدوبامين في دماغه علشان كده مفيش وقت محدد يناسب الكل عشان يظبطوا مستوياته.. المدة بتختلف حسب احتياجات وأهداف كل فرد.
إزاي تعمل صيام دوبامين؟
لو عندك عادات مش صحية مسيطرة على حياتك اليومية.. فالصيام ده أساسه إنك تبطلها أو تقلل منها أو تستبدلها بعادات تانية صحية.. والتغييرات دي ممكن تحسسك بعدم الراحة عشان إنت مابقتش تعمل الحاجات اللي متعود عليها.. وأي عملية تنظيف للجسم ممكن تحصل أعراض انسحاب مع رجوع مستويات الدوبامين للوضع الطبيعي.
وعشان تعمل النوع ده من الصيام هتوقف أو تقلل النشاطات اللي بتزود إفراز الدوبامين زي: السوشيال ميديا – الحلويات – الكافيين – المخدرات – الكحول – الفيديو جيمز – وأي نشاط ممكن يدخلك في حالة شبه الإدمان.
آراء معارضة لصيام الدوبامين
بعض الباحثين بيقولوا إن مفيش أي دليل علمي بيدعم فكرة “صيام الدوبامين” وإنه مفيش عليه أبحاث علمية وأي فوايد بتتقال عنه بتكون مجرد تجارب شخصية مش أكتر.. وأغلب الفوايد دي بتيجي من إن الناس بتبعد عن أنشطة ممكن تسبب إدمان لكن الموضوع ملوش علاقة فعلية بتظبيط معدلات الدوبامين في الدماغ.. وقالوا كمان إن مفهوم “صيام الدوبامين” علميًا غلط وبيبسط طريقة عمل الدماغ بشكل مبالغ فيه عشان الدماغ أعقد بكتير من الفكرة اللي التريند ده بيحاول يوصلها.. وبعض الباحثين شايفين إنه مستحيل تعمل “صيام دوبامين” فعلي عشان الدماغ بينتج دوبامين طول الوقت.. لكن البعد عن الأنشطة اللي بتعتمد على الإدمان ممكن يكون مفيد لفترات قصيرة.. وبما إن فيه أنشطة وحاجات كتير ممكن تتحول لإدمان مع الوقت.. فالبُعد مؤقتا عن حاجات زي السوشيال ميديا والأكل السريع والسكريات وغيرهم بيكون ليه تأثير إيجابي على العقل وطريقة حياتنا عمومًا مش على الدوبامين لأنه مش طريقة علمية مثبتة وكتير من اللي بيتقال عنه مضلل ومش كامل.
طب بعيدا عن كل ده.. إزاي تزود الدوبامين بشكل طبيعي؟.. ده ممكن يحصل من خلال كذا طريقة:
أكلات بتزود الدوبامين:
إنتاج الدوبامين بيتطلب بروتين L-tyrosine وده اللي موجود في أكلات زي: اللوز – الأفوكادو – الموز – البيض – الفراخ – الشوكولاتة – اللحم البقري
أنشطة بتفرز أكتر كمية دوبامين:
الرياضة – الموسيقى – تقضية وقت في الطبيعة وتحت الشمس – النوم الكفاية – التمشية – بريك من السوشيال ميديا – التأمل – الكتابة
وفي النهاية.. سواء كنت مؤيد لفكرة صيام الدوبامين أو شايفها مجرد موضة وتريند وملهاش أساس علمي.. المهم إنك تبقى واعي بسلوكياتك اليومية وتقدر توازن بين الحاجات اللي بتستمتع بيها وبين الحفاظ على صحتك النفسية والجسدية.. والحل مش دايما في التريندات لكن في إنك تبني عادات صحية تناسب حياتك.
