إيه هو مفهوم السعادة.. وإزاي نبقى أسعد في حياتنا؟

أوقات كتير لما بنمر بلحظات صعبة وأيام ثقال كل اللي بنتمناه إن حياتنا تكون سعيدة ويحصل حاجات تفرحنا تنسينا كل اللحظات السيئة اللي عدت علينا لأن السعادة بتعمل نوع من التوازن في حياتنا وبتخلينا متحمسين للي جاي وعندنا نشاط وحماس للمستقبل.. وفي ناس بتعيش حياتها كلها بتدور عليها.. بس هل احنا فعلا عارفين معنى السعادة وإزاي نحققها ولا احنا فاهمينها غلط؟… عشان كده في الموضوع ده هنقولك إيه هي السعادة وإزاي نبقى أشخاص أسعد وفقا لموقع  verywellmind و موقع healthline

إيه هي السعادة:
السعادة بتختلف من شخص للتاني على حسب وصف كل واحد ليها وعلى حسب رؤيته ليها من وجهة نظره لكن في حاجتين مهمين مرتبطين بالسعادة وهما..

توازن العواطف: كل شخص فينا بيمر بمجموعة من العواطف والمشاعر المختلفة الإيجابية والسلبية.. والسعادة بترتبط أكتر بالمشاعر الإيجابية

الرضا عن الحياة:  السعادة ليها علاقة بمدى شعورنا بالرضا عن الحاجات اللي في حياتنا زي علاقاتنا وشغلنا ونجاحاتنا وأي حاجة بنعتبرها مهمة من وجهة نظرنا

وفي تعريف تاني للسعادة قاله الفيلسوف أرسطو وهو” أن السعادة هي رغبة الإنسان الواحدة وجميع الرغبات الإنسانية الأخرى موجودة كوسيلة للحصول على السعادة..

والسعادة ليها أشكال كتير جدا:
الفرح: وده لما نتبسط بحاجة حصلت في الحاضر
الإثارة: لما بنكون متحمسين لحاجة وشايفين إنها إيجابية
التفاؤل:لما بنقدر نشوف الحياة بشكل إيجابي ونتوقع الأفضل
القناعة: وده السعادة النابعة عن الشعور بالرضا تجاه الحاجات اللي عندنا
الفخر: لما بنحس بالسعادة عشان أنجزنا شيء مهم بالنسبالنا

ودي شوية نصايح لحاجات لو عملتها هتبقى أسعد:

1- حاول تبتسم أكتر
دماغنا متعود على إننا بنبتسم لما تحصل حاجة سعيدة وبالتالي بتفرز الدوبامين اللي بيخلينا سعداء .. فحاول تبتسم كل ماتحس بالاحباط جايز ده يعمل تأثير عكسي..

2-ممارسة الرياضة والنوم المنتظم
ممارسة الرياضة بشكل منتظم بتساعد في تقليل التوتر والقلق وبتحسن من الحالة النفسية.. وكمان النوم المنتظم والكافي بيقلل من المشاعر السلبية وبيحافظ على صحتنا

3- حاول تاكل أكل صحي
الأكل زي ما بيأثر على صحة جسمنا كمان بيأثر على صحة دماغنا الكربوهيدرات مثلا بتحتوي على مادة السيروتونين وهو هرمون السعادة والأكل الغني بالبروتين بيحتوي على الدوبامين والنورإبينفرين اللي بيساعد على زيادة الطاقة والتركيز

4-إنك تكون ممتن للحاجات اللي حواليك وبتشكر الناس
الإمتنان بيخلينا نحس بالسعادة وبيدينا أمل وكمان لما بنشكر شخص ساعدنا أو نقوله كلام لطيف هيخلي الشخص سعيد وهيخليك أنت كمان تحس بالسعادة والرضا

5-اعترف بلحظات الحزن
لما تحصل حاجة تضايقك ماتمثلش إنك مبسوط وتعمل مش فارق معاك لا .. خد وقتك في الحزن وحاول تلاقي حل يخليك أحسن زي أنك تعمل حاجة بتحبها أو تقابل شخص بتحبه

6-متقارنش نفسك بحد
لأن ده هيسببلك قلق وتوتر وبيخليك تحس إنك أقل من الناس وبالتالي بتحس بعد الرضا اللي بيسبب التعاسة

7-حاول تواجه التوتر
الحياة دايما هتفضل مليانة ضغوطات ومش دايما بنقدر نتجنبها.. ولازم نفكر نفسنا إن كل شخص بيعاني من توتر بشكل مختلف عن غيره مش احنا لوحدنا وحاول تواجه مشاكلك بشكل مباشر

8-حاول تبسط نفسك بنفسك
حاول تخرج في أماكن بتحبها وتعمل حاجات بتحبها لأن ده هيساعد في تحسين حالتك النفسية وهيحسسك بالفرح


وعشان تحاول تتبسط في حياتك حاول في المطلق تبص لجانب الكوباية المليان وتسيب الفاضي وحتى لو لقيته مكسور ألزقه يا سيدي وحاول تتبسط