إيه هي أيام الكلب وإيه علاقتها بشهر يوليو والحر اللي إحنا فيه؟

من ساعة ما يوليو بدأ والصيف داخل حامي علينا ومابيسميش على حد.. جو لا يحتمل أي مناهدات أو نقاشات ودي رسالة بنوصلها للكل.. ولسة كمان لما أغسطس يشد.. الفترة الصعبة دي اسمها أيام الكلب

إيه هي أيام الكلب؟

أيام الكلب أو Dogs days of summer هي فترة موسمية كده بتتميز بإنها أكتر فترة حر وصهد في السنة والرطوبة بتكون عالية فيها جدًا.. بتبدأ في نص الكرة الشمالي من يوم 3 يوليو وبتكمل لحد نص شهر أغسطس.. أما في نص الكرة الجنوبي من الأرض فبتكون في شهر يناير وفبراير حسب موقع Farmer’s Almanac

ليه اتسمت بـ “الكلب”؟

مصطلح “أيام الكلب” بيرجع لظهور نجم اسمه نجم “الشعري اليمانية” وده أكتر نجم بيلمع في كوكبة اسمها “الكلب الأكبر” ودي مجموعة نجوم بتنور جامد في السما بتظهر في جنوب خط الاستواء الشمالي من الكرة الأرضية.. وفي الحضارات القديمة زي الإغريقية والرومانية والمصرية لاحظوا إن النجم ده بيظهر في أكتر أيام الصيف المصهدة والحر..  فربطوا بين ظهور النجم وموجات الحر فسموا الأيام دي بـ “أيام الكلب”

اختلاف معاني الظاهرة في الثقافات

في الحضارة المصرية: ظهور نجم “الشعري اليمانية” كان علامة على فيضان النيل وده كان حدث موسمي بيدل على موسم خصب

في الحضارات الإغريقية والرومانية: كان ظهور النجم بيعبر عن فترة من عدم الاستقرار والقلق وانتشار الأمراض وده يمكن لإن ارتفاع نسبة الرطوبة مع الحر الفظيع بيزود من الأمراض الجلدية وكمان ضربات الشمس وبيأثر على المزاج والنوم بسبب الحرارة العالية.. ده غير إن إنتاجيتهم في الشغل خاصة أي نشاط بيحصل في الشمس كانت بتقل وده هيبقى عذرك الحالي لمديرك لما يكلمك عن الشغل 

العرب: ماستخدموش مصطلح “أيام الكلب” بس هما قسموا أكتر أيام الصيف حر لمراحل زي “القيظ” و”جمرة القيظ” 

أيام الكلب والحالة النفسية

فيه دراسة نفسية انتشرت في مجلة journal of the american medical association إن أكتر أيام الصيف حر ارتبطت بارتفاع معدلات زيارة أقسام الطوارئ المتعلقة بالصحة النفسية اللي منها الاكتئاب والقلق والعنف المنزلي والعدوان.. وفسر ده الطبيب النفسي “بوبي نيكس” بإن الحر بيخلي الجسم يفرز هرمون التوتر

في الآخر مانقدرش نقولك غير قلل كلام ونقاشات وكتر شرب مياه وكمان حط للحيوانات والطيور مياة سقعة لحد ما الصيف يخلص على خير