إيه هي حملة “موفمبر”.. وعلاقتها بالرجالة والشنب!
في 2003، اتنين صحاب في أستراليا اسمهم “ترافيس جارون ولوك سلاتري” قاعدين في روقان وبيشربوا بيرة سخنة وبيتكلموا عن اتجاهات الموضة في الوقت بتاعهم واللي ماكنش منها “تربية الشنب” واللي كان منتشر قبل 2003 وفكروا إنهم يرجعوه موضة تاني.
وبعدين قرروا يكلموا صحابهم إن كل واحد فيهم يربي شنبه، وكان ليهم صديق، والدته بتجمع تبرعات لمساعدة المصابات بسرطان الثدي، قرر “ترافيس” و”لوك” يعملوا مبادرة اسمها “موفمبر” عن التوعية بصحة الرجال وسرطان البروستاتا
وعملوا لوجو للحملة وبعتوا إيميلات لعدد كبير من الرجالة وانضم لهم 30 شخص في التحدي في البداية، وأصبحوا مؤسسة خيرية بشكل رسمي بداية من 2006 ولحد دلوقتي، وصلوا لـ6.5 مليون مشارك في الحملة من 2003 من مختلف دول العالم، وتم تمويل 1250 مشروع متعلق بصحة الرجال من 2003 لحد دلوقتي.
ومن هنا، الشنب بقى هو رمز لحركة “موفمبر” واللي اسمها بيجي من دمج كلمتين “November” وكلمة شنب بالإنجليزي “Moustache”.
والحركة هدفها دعم صحة الرجال والتركيز على بعض الأمراض اللي ممكن تصيب الرجالة زي:
– الاضطرابات النفسية: زي الاكتئاب والانتحار
– سرطان البروستاتا: واللي هو أكتر نوع من السرطان منتشر بين الرجالة بعد سرطان الرئة
– سرطان الخصيتين: وده نوع من السرطان مش منتشر ولكنه بيصيب الرجالة في سن صغير ومش بيتم اكتشافه في نفس الوقت، فلازم أي راجل يعمل فحوصات مبكرة بشكل مستمر عن القصة دي.
طيب إزاي تشارك في “موفمبر”؟
– ربي شنبك لحد 30 نوفمبر، واستخدمه كنقطة نقاش مهمة وافتح بيها مواضيع مع صحابك وزملائك في الشغل من الرجالة عن أهمية صحة الرجال وأهمية إنهم يكشفوا ويعملوا فحوصات دورية.
– ممكن تسيب دقنك كمان كمشاركة في حملة No Shave November واللي هي بتختلف عن مبادرة “موفمبر” ولكن حاول تبرز شنبك ويكون ده بداية النقاش في الموضوع مع اللي حواليك، والفلوس اللي بتصرفها على شفرات الحلاقة وكريم الحلاقة اتبرع بيها.
– اتبع نظام غذائي صحي ومارس الرياضة ولو مافيش وقت أوي.. امشي ولو نص ساعة.
الخلاصة، إنك ماتهملش نفسك واهتم بيها وبصحتك، بإنك تعمل فحوصات كل فترة عشان تتطمن على نفسك، ولو بتعاني من أي اضطرابات نفسية، فمن المهم إنك تتواصل مع مختص أو طبيب، لإن حسب موقع مبادرة “موفمبر”، كل دقيقة بينتحر راجل، و75% من إجمالي المنتحرين بيكون من الرجال.
وعلى الصعيد العالمي، فالرجالة بيموتوا قبل الستات بخمس سنين وبيكون لأسباب ممكن الوقاية منها زي اللي اتكلمنا عنها فوق.. فمن المهم تهتم بنفسك وبصحتك عشان تعيش حياة صحية وسعيدة.
