إيه هي خدمة مكالمات الواي فاي أو WiFi Calling؟
بعد ما أطلق جهاز تنظيم الاتصالات خدمة الـ eSIM في ديسمبر اللي فات أعلن النهاردة جهاز تنظيم الاتصالات عن خدمة جديدة اسمها “Wifi Calling” اللي هي عبارة عن مكالمات بتتم من خلال الواي فاي.. فتعالوا كده نعرف أكتر عن الخدمة واستخدامها بيكون إزاي
إيه هي خدمة الـ Wifi Calling؟
هي ميزة بتسمحلك تعمل مكالماتك وتبعت أو تستقبل الرسائل النصية باستخدام شبكة الواي فاي بدل شبكة التليفون العادية “الشريحة” وده بيكون في حالة إن الشبكة بتاعتك ضعيفة زي الأماكن اللي بتكون فيها الشبكة ضعيفة أو مش موجودة أصلا زي البلايستيشنات ومستشفيات وحاجات تانية بيكون فيها الشبكة ضايعة فده البديل والحل ليها وهو الواي فاي
مميزاتها:
1- بتحسن جودة الاتصال:
أي مكان محدوف بعيد أو الأدوار اللي بتبقى سفلية زي البدروم وغيرها من الأماكن المحدوفة بتكون فيها الشبكة العادية بتاع التليفون ضعيفة.. خدمة اتصال الواي فاي هتحل الموضوع ده وهتحسن جودة الاتصال أكتر
2- مش محتاج Apps إضافية:
مش محتاج تنزل أي أبليكشن معين أو حاجة معينة عشان الخدمة دي تشتغل وهتعرف تستخدمها من التليفون نفسه مباشرة عادي وهنقول بتشتغل إزاي كمان حبة
3- بنفس رقمك عادي:
هتتصل وتبعت رسائل بنفس رقمك اللي بتستخدمه عادي مش هتحتاج حاجة إضافية
4- نفس تكلفة المكالمة العادية:
كمان من مميزاتها إن الخدمة محطوطة في إطار خطتك الهاتفية العادية.. يعني لو عامل باقة أو بتتكلم بفلوس هتبقى هي هي التكلفة ومش هتزيد أي رسوم
5- بتدعم كل التليفونات تقريبًا:
الخاصية متاحة لكل الـ Smart Phones تقريبًا سواء Android أو iOS المهم يكون فيها خدمة الواي واي وفيه شريحة بتدعم الخاصية نفسها
إزاي نشغلها؟
بعد الإعلان عن تطبيقها هتظهر تلقائيا على الموبايلات اللي بتدعم الخاصية دي.. وممكن تتأكد من دليل الهاتف أو من موقع الشركة المصنعة له وبعد ما تتأكد دي الخطوات اللي ممكن تشغلها بيها:
- أول حاجة تتأكد إن الشريحة بتاعتك بتدعم الخدمة دي ويفضل تتصل بخدمة العملاء لشركة الاتصالات نفسها عشان تتأكد وتفعّل الخدمة معاهم
- بعد كده افتح الإعدادات “Settings” وبعدها الشبكات والاتصالات أو إعداد المكالمات “Connections” أو حسب ما هي مكتوبة عندك
- هتلاقي اختيار WiFi Calling أو الاتصال عبر الواي فاي هتفعّلها
- أو ممكن فوق في البار بتاع السيرش تكتب “WiFi Calling” وتبحث ولما تظهرلك تفعلها.. ممكن يكون فيه تليفونات بتحتاج إعدادات زيادة عشان تشتغل
- بعد ما تفعلها هتستخدم التطبيق الافتراضي اللي بتتصل بيه أيًا كان هو إيه عشان تعمل المكالمات وساعتها هتشتغل معاك
- أهم حاجة تكون شبكة الواي فاي بتاعتك شغالة كويس وهو هيختار الأفضل فيهم سواء الشبكة العادية بتاع التليفون أو الواي فاي
في النهاية الخدمة دي أكيد مهمة ومفيدة لأنها هتحسن جودة المكالمات أكتر وخصوصًا في الأماكن اللي فيها زحمة أو فيها تغطية ضعيفة للشبكة أو الأماكن البعيدة وهتظبط الدنيا أكتر خصوصًا إنها متوفرة تقريبًا في معظم التليفونات الذكية.. قولنا حاسس إنها هتعمل فرق فعلًا وهتكون مفيدة ولا عادي؟
