إيه هي قاعدة BE FAST؟ وإزاي تنقذ أي شخص من جلطة المـخ؟

دايمًا في الأفلام بتلاقى فيه كارثة بتحصل وناس كتيرة ملمومين وواقفين يتفرجوا عليها.. بس كان بيبقى فيه شخص.. اللي هو غالبًا البطل يعني.. هو اللي هيتدخل وينقذ الموقف والشارع كله هيسقفله في الأخر.

حركات “السوبر هيروز” دي كانت بتجننا وإحنا عيال وبنبقى نفسنا الناس تسقفلنا إحنا كمان.. فعشان تبقى سوبر هيرو من أبو جد وتنقذ ناس حقيقين.. الموضوع هيحتاج إنك تتعلم أصلًا إزاي تتصرف في المواقف الصعبة.

وواحدة من المواقف دي هو إن شخص فجأة وبدون سابق إنذار وانتو بتتكلموا.. يسكت.. ويتوه.. ونكتشف أخر اليوم إن جتله جلطة في المخ وهتأثر عليه باقى عمره!

فـ إزاي تعرف إن اللي قدامك ده بيجيله جلطة دلوقتي حالًا؟

أبسط وأسرع طريقة تعرف بيها هي حاجة إسمها: قاعدة BE FAST

واللي كل حرف فيها بيرمز لعلامة معينة بتقولك إن الشخص ده عنده جلطة في مكان ما في المخ.

• B (Balance)

لو لاحظت إن الشخص ده دايخ بزيادة أو أغمى عليه فجأة أو وسط كلامكو العادي تاه ومابقاش مركز.. ممكن دي تكون علامة إن في جلطة حصلت دلوقتي.

• E (Eyes)

أو لو ظهرت مشكلة في الرؤية في عين من العينين.. أو حتى الاتنين سوا ومابقاش شايف بيهم كويس وفجأة بدون أي سبب كده.

• F (Face)

لو شكيت بقى للحظة إن فيه حاجة غريبة بتحصل.. اطلب من الشخص ده إنه يضحك أو يبتسم.

لو ابتسم عادي تمام.. أمان.. طب لو لقيت نص وشه ابتسم ونص تاني ثابت؟ يبقى بنسبة كبيرة الشخص ده عنده جلطة مأثرة على الجزء الثابت في وشه.

• A (Arms) 

رابع علامة هي إنك تطلب منه يرفع إيديه الاتنين.. نفس الكلام.. لو رفع إيد واحدة يبقى غالبًا عنده مشكلة مأثرة على الإيد التانية فمش عارف يحركها.

• S (Speech)

اطلب منه يقول حاجة هو استحالة يتلخبط فيها.. اسمه بالكامل مثلًا.. أو عنوانه أو رقم تليفونه.. لو لقيت لسانه تقيل أو ناسي أو متلخبط.. يبقى دي العلامة الخامسة.

• T (Time)

أخر حاجة وأهمهم إنك لو حسيت بأي علامة من دول.. حتى لو علامة واحدة بس.. اتصل بالإسعاف على طول أو انقله أقرب مستشفى جنبك.

وماتنساش تقول للمسعف أو دكتور المستشفى إنك شاكك يكون فيه جلطة وإحكيله العلامات اللي شوفتها.. ده هيسهل إنهم يلحقوه أسرع!

خلي بالك من 4:

• الوقت عامل مهم جدًا في الموضوع ده.. لأن فيه 2 مليون خلية عصبية بتموت في الدقيقة الواحدة.. فكل ما اتعالج أسرع كل ما نسبة إن مايحصلش إعاقات أو وفاة بقت أكبر.

بمعنى إن لو الشخص ده راح المستشفى في أول ساعة من الجلطة فرصته أحسن من اللي راح في تاني ساعة.. وأحسن وأحسن من اللي عدى عليه 6 ساعات!

• لو اختفت الأعراض دي بعد دقايق.. يبقى دي كانت “سكتة دماغية عابرة”.. بس مارحتش لحالها.. فماتتجاهلهاش لأن ممكن تكون تحذير لجلطة أكبر جاية.
• ماينفعش تدي للشخص ده دواء سيولة اعتقادًا إنك كده بتدوب الجلطة.. لأن فيه أنواع جلطات بتحصل أصلًا بسبب نزيف.. فخلى موضوع الأدوية ده للدكاترة أحسن.
• إنك تروح مشوار لحد المستشفى عشان “شاكك” في جلطة ويطلع مفيش حاجة.. أحسن بكتير من إنك تستنى عَرَض كبير وبعدها تقرر تروح.. لأن زي ما قولنا الوقت مش في صالحك.

كده يبقى معاك أول حاجة تقدر تنقذ بيها حد تاني وتبقى سوبر هيرو بحق وحقيقي.. ابسط يا عم!