إيه هي قصة موبايل ترامب الجديد؟ وسر رقم 47:45 اللي منتشر عنه؟
على الرغم من إن العالم كله في حالة قلق ونوش إلا إنه من يومين انتشرت أخبار عن تليفون جديد هينزل السوق عليه العلامة التجارية لرئيس أمريكا “دونالد ترامب” واللي سبب من 90% من مشاكل الكوكب.. التليفون باسم “Trump Mobile” وفيه تساؤلات حواليه.. هيتصنع فين؟ وإيه تفاصيله؟
تصنيعه؟
ما بين أمريكا والصين.. كلنا عارفين المشاكل اللي حاصلة في حوارات الضرائب والتعامل في التجارة بين أمريكا والصين تحديدًا وعشان كده عائلة ترامب أو ترامب نفسه عايزين يتم تصنيعه كله بالكامل في أمريكا لكن كل التحليلات اللي بتحصل والخبراء حتى في أمريكا مقتنعين تمامًا إن الصين لازم هي اللي تصنعه أو على الأقل تكون مشاركة بنسبة كبيرة في التصنيع لأنه مستحيل أمريكا تصنعه بالكامل عندها
مواصفاته:
التليفون اسمه T1 وعبارة عن شاشة Amoled ومقاسها 6.8 بوصة ومعدل تحديث 120 هرتز وبطاريته 5000 مللي أمبير والكاميرا الأساسية بتاعته 50 ميجا بيكسل والأمامية 16 ميجا بيكسل ولونه ذهبي وفيه Finger print وكمان AI Face print وهيكله المعدني غالبًا هيكون شبه أجهزة آيفون وشاحنه 20 وراماته 12 جيجا ومساحة تخزين 256 جيجا
سعره:
التليفون سعره 499 دولار وغالبا هيكون المعالج بتاعه من النوع Qualcomm وده بيتصنع في تايوان والناس شايفين إن سعر التليفون ده ضعف تقريبًا مميزاته يعني هو المفروض يكون بنص التمن.. أما فيه خدمة بقى اسمها باقة HE47 “باقة ترامب” وسعرها هيكون 47.45 دولار شهريًا ودي برضه ضعف العروض اللي شركات الاتصالات بتقدمها هناك في أمريكا والسبب إن السعر يكون كده هو إن ترامب في ولايته السابقة كانت الـ 45 ودلوقتي هو الرئيس رقم 47 في تاريخ الولايات المتحدة
ترامب بقاله سنين كده من قبل ما يمسك الرئاسة بيعمل مشاريع وبيزنس كتير لدرجة إنه حقق 600 مليون دولار السنة اللي فاتت.. وعامل كذا مشروع بيبيع ساعات وأحذية رياضية وعطور ويعني حاجة كده زي نشاط اقتصادي جنب شغلته الأساسية اللي هي إنه رئيس أمريكا.
