إيه هي متلازمة “غيلان باريه” اللي حصل بسببها 3 حالات وفاة في غزة.. 2 منهم أقل من 15 سنة
يوم الاثنين 4 أغسطس أعلنت وزارة الصحة بغزة وفاة 3 أشخاص بسبب حاجة اسمها “متلازمة غيلان” وحذرت من تصاعد خطير في حالات الشلل الرخو الحاد ومتلازمة غيلان باريه بين الأطفال في القطاع.. فإيه تفاصيل الوفيات والمرض؟
اللي بيحصل في غزة
بعد إعلان حالة الوفاة والتحذير من التصاعد في حالات الشلل الرخو ومتلازمة غيلان باريه في القطاع قالت وزارة الصحة إن ده نتيجة التهابات غير نمطية وتفاقم وضع سوء التغذية الحاد.. وإن الفحوصات الطبية كشفت عن وجود فيروسات معوية غير شلل الأطفال واللي بيأكد وجود بيئة خصبة لانتشار الأمراض المعدية بشكل خارج عن السيطرة
التفاصيل
حالتين من حالات الوفاة كانت لأطفال سنهم مايكملش 15 سنة واللي توفوا بعد فشل محاولات إنقاذهم بسبب عدم توفر العلاج اللازم بسبب الحصار
كمان حذرت من إن استمرار الوضع البيئي ده وعدم توفر العلاجات اللازمة تهدد بالانتشار الواسع للمرض داخل القطاع
واختتمت البيان بـ “هذه ليست مجرد حالات وفاة.. بل هي إنذارٌ بكارثة حقيقية مُعْدِية مُحتملة”
حسب المعاهد الوطنية للصحة – National Institutes of Health
إيه هي متلازمة غيلان باريه؟
هي حالة نادرة بيهاجم فيها الجهاز المناعي الأعصاب الطرفية “ودي اللي بتوصل المخ والحبل الشوكي بباقي الجسم” ممكن تسبب ضعف عضلي مفاجئ أو شلل
الأعراض؟
- أول الأعراض في الغالب بيكون ضعف أو وخز في الرجلين والإيدين
- ممكن تتطور بسرعة في أيام أو أسابيع وتوصل لشلل تام
- فيه بعض الحالات بتأثر على التنفس ودي بتبقى حالة طارئة
- صعوبة في عضلات العين والرؤية
- صعوبة في البلع أو التحدث أو المضغ
- الألم اللي ممكن يكون شديد خاصة بالليل
- مشاكل التنسيق وعدم الثبات أو الاتزان
- معدل ضربات القلب أو ضغط الدم غير الطبيعي
- مشاكل في الهضم أو في التحكم ب
- المثانة
الأسباب
السبب مش معروف بالظبط لحد دلوقتي بس فيه حالات كتير بتظهر لما يحصل:
1- عدوى فيروسية أو بكتيرية “زي إنفلونزا أو كورونا أو عدوى الجهاز الهضمي
2- تطعيمات ودي بتكون حالة نادرة جدًا
العلاج
مفيش علاج أو دواء مباشر للمرض بس فيه علاجات متاحة بتساعد في تقليل الأعراض وتقليل مدة المرض ومنها:
– تبادل البلازما Plasmapheresis
– العلاج المناعي “IVIG”
– العلاج الطبيعي والتأهيلي مهم أوي بعد الخطوات دي
- فيه ناس بتخف منه أو بيتحسنوا بشكل كبير خلال شهور
- وفيه ناس تانية بيفضل المرض مكمل معاها ويكون مزمن
في النهاية العلماء لسه بيدرسوا متلازمة غيلان باريه عشان يفهموها أكتر خاصة علاقتها ببعض الفيروسات زي كوفيد-19.. وفيه تجارب وأبحاث بتتعمل عشان تحسين فرص الشفاء الكامل.. لكن مع عدم توفر أي أدوات أو إمكانيات في غزة لو تفاقم الوضع والإصابات زادت هيكون مستحيل علاج الحالات دي وهينتشر ومش هيكون فيه فرصة إنهم يلحقوه
