اختبار تعرفه منه هل أنت اللي فيك الخير ولا اللي فيك الشر؟
أكيد سألت نفسك في يوم من الأيام سؤال الفنان أحمد سعد أنا اللي فيا الخير ولا اللي فيا الشر وفضلت حبة عايز إجابة للسؤال ده ومع أي موقف بيحصل وحد بيشكك في نفسك أو بيقولك إن أنت اللي وحش أو أنت اللي غلطان بتبدأ تشك في نفسك أنت فعلا شرير ولا ماكنش قاصدك ولا أنت كنت قاصد تأذي الشخص ده وتسأل نفسك أسئلة وجودية
فبدل ما تفضل تسأل نفسك أنت فعلا طيب ولا شرير هنحاول نسهل عليك الموضوع شوية وهنقولك شوية أسئلة تسألها لنفسك تساعدك تتعرف على نفسك أكتر وعلى شوية جوانب شخصية مظلمة جواك حسب ما قال موقع “psychcentral” وموقع “verywellmind” في مقالاتهم عن الـ ” The Dark Triad”.. بس أهم حاجة حاول تكون صريح مع نفسك وأنت بتجاوب عليهم
السؤال الأول: هل بتحب تكون دايمًا في مركز الاهتمام؟
لو أنت بتحب تكون دايمًا تحت الأضواء ومش بتقبل بسهولة حد ياخد مكانك، ده ممكن يكون فيه جانب نرجسي جواك.. النرجسية مش دايمًا حاجة سيئة، لكن لو بتتصرف بأنانية أو بتحب تتحكم في اللي حواليك، فخلي بالك ده بيكون مؤشر على إن عندك ميول للشخصية المظلمة.
1- فهل أنت عادي تبقى في الأخر؟
2- ولا ساعات بتحب تهتم بنفسك، لكن مش دايمًا؟
3- ولا لازم تكون دايمًا الأفضل، وبتتضايق لو حد خد مكاني؟
السؤال الثاني: لو حد غاظك أو استفزك، بتتصرف معاه إزاي؟
الأشخاص اللي عندهم ميول للمكيافيلية بيحبوا يستخدموا الذكاء والتلاعب عشان يردوا على حد ضايقهم، وده بيظهر في قدرتهم على “اللعب” بالمواقف لصالحهم.
1- هل بتسيب الموضوع وتبعد عنه؟
2- ولا بتواجهه الحوارات بشكل هادي من غير مشاكل؟
3- ولا بتعامل برد ذكي، وتوري اللي قدامك إنك مش سهل؟
السؤال الثالث: بتستمتع لما تشوف حد بيقع في مشكلة وانت شايفه بيفشل؟
السادية أو الميل للمتعة من ألم الآخرين بيظهر عند بعض الناس، ولو بشكل بسيط.. السؤال ده بيوضح لو كنت بتفرح لما تشوف حد بيتعذب أو بيغلط.
1- فهل أنت بتحاول تساعده حتى لو مش صاحبك؟
2- بتعذر نفسك لإن كل واحد له ظروفه؟
3- ولا بتحس إنه استحق اللي حصله؟
السؤال الرابع: لو جاتلك فرصة تغش في موقف معين وماحدش هيكتشف، هتعمل إيه؟
الميول للتلاعب أو الكذب ممكن يكون جزء من الـ ” The Dark Triad” أو “الثالوث المظلم”. فلو كنت شايف إنك هتاخد مصلحتك من غير تردد، ده بيشير لجانب مكيافيلي أو نفسي في الشخصية.
1- فهل أنت ممكن تغش ؟
2- ولا ممكن تعمل كده لو مش حد متأثر؟
3- ولا أكيد هتستغل الفرصة؟
السؤال الخامس: لو حد عرض عليك مكسب على حساب غيرك، هتوافق؟
الشخص اللي عنده ميول دايماً لتحقيق مكاسبه حتى لو على حساب الناس بيكون عنده جانب أناني وعنده استعداد يأذي اللي حواليه عشان يوصل.
1- فهل مش هتحب تضر حد؟
2- ولا حسب الموقف ممكن توافق؟
3- ولا هتوافق أكيد لو هيفيدك؟
النتيجة:
لو كانت معظم إجاباتك رقم (3): واضح إنك عندك جوانب مظلمة؛ بتحب تحقق مكاسبك حتى لو ده ممكن يكون على حساب اللي حواليك. عندك قدر من التلاعب وحب السيطرة اللي ممكن يخلي فيه جانب شرير عندك، لكنه مش بالضرورة حاجة سلبية لو بتحافظ على تصرفاتك.
لو معظم إجاباتك رقم (2): إنت شخص وسط عندك توازن بين الخير والمصالح الشخصية، وبتقدر تحافظ على مصالحك من غير ما تأذي حد بزيادة.
لو معظم إجاباتك رقم (1): إنت طيب لدرجة إنك ممكن تكون مسالم بزيادة. لكن خلي بالك، ممكن الناس تستغل طيبتك لو مبترسمش حدود واضحة.
وفي الأخر ده اختبار بسيط برضه أكيد ماوضحش كل الجوانب ولا كل الصفات اللي جواك ولا كل اللي بتفكر فيه بس هو اختبار مبني على سمات حقيقية من علم النفس زي “النرجسية” و”المكيافيلية” و”السادية”، بس لو عايز اختبار دقيق أكتر أو فعلا شاكك في نفسك إنك شخص مؤذي أو شرير وحابب تاخد خطوات في تغيير ده أكيد ممكن تلجأ لمتخصص نفسي عشان تفهم شخصيتك بوضوح أكتر وتعرف تتعامل معاها.
