ازاي تحافظ على صداقاتك وتستمر علاقتك بصحابك أطول وقت ممكن؟

العادي إنك تفكر في صحابك وتفتكرهم.. تفكر ازاي تخرج معاهم أو تتبسطوا سوا وتشوفوا حاجة تضيعوا وقتكم فيها.. بس السؤال المهم هل احنا محتاجين نبذل مجهود عشان نحافظ على صحابنا وعلى وجودهم؟

ممكن ناس مننا تكون مش عارفه أو مش واخده بالها إننا المفروض نعمل مجهود عشان نحافظ على صداقاتنا.. يعني بيتعاملوا إن الصحاب كده كده موجوده ومش هيحصل حاجة وعلى الأغلب الصداقات دي بتنتهي والشخص ممكن يستغرب.. إيه السبب!

حسب موقع Thriveworks في 6 حاجات تعملهم عشان تحافظ على صداقاتك وتخليها تستمر:

في الأول خلينا نتفق إن مش كل صداقة هتستمر مدى الحياة وممكن الظروف تكون أكبر مننا وتنهي أي علاقة بأي حد مهما كان قريب لينا.. بس ده مش معناه إنك ماتعملش مجهود عشان تحافظ على صحابك وعلى اللي بينكم بالعكس إنك تحاول وتبذل طاقة عشان تحافظ على صداقتك بشخص هي حاجة ضرورية بتزود قوة الرابط اللي بينكم وبتخليك صديق كويس..

1- الوقت

طبعًا ممكن تكون محظوظ ويكون عندك صاحب مش محتاجين تعملوا مجهود ولا تتقابلوا كل يوم أو حتى كل فترة قصيرة عشان تحافظوا على علاقتكم.. ممكن تتكلموا أو تتقابلوا كل فترة وده هيكون كافي بالنسبالكم..

لكن العادي هو إنكم تتفقوا على وقت وتتواصلوا فيه أو تتقابلوا فيه وتعرفوا تفاصيل بعض.. سواء هتتكلموا شات أو مكالمة تعرفوا فيها أخبار بعض وتبينوا اهتمامكم وممكن كمان تتفقوا على ميعاد بشكل دوري سواء كل أسبوع أو كل شهر تتقابلوا وتخرجوا تتكلموا وتعملوا أي نشاط سوا.

2- الصدق

تحس الكلمة نفسها جزء من كلمة “الصداقة” وده حقيقي.. عشان تقدر تعبر عن اللي جواك وتتكلم براحتك سواء هتشتكي من حاجة مضايقاك من صاحبك نفسه أو حد تاني محتاج يكون في مساحة آمنة والأهم صدق عشان الحاجة تتصدق وانت بتحكيها.. عشان كده من أهم عوامل الصداقة الصحية إنك تكون صادق وتعبر وتسمع كويس لما يكون في حاجة إنما معروف في كل حاجة مش الصداقات بس إنك لو كتمت مشاعر سلبية أو حاجة مضايقاك ساعتها مش هتقدر تتعامل وتكون كويس ولا حتى هتقدر تحافظ على صاحبك.

3- الاهتمام

لو انت مهتم تبني وتحافظ على علاقة صداقة قوية لازم تبين اللي قدامك إنك مهتم.. الموضوع مش محتاج تدور على حاجات صعبة وتقيلة وتعملها.. الموضوع أبسط من كده بكتير انت بس محتاج تشوف الحاجات البسيطة اللي بتفرح الشخص اللي معاك وتبسطه وتحاول تعملها.. في عيد ميلاده مثلا تجيب هدية ولو بسيطة أو حتى تفتكر وتحتفل بيه مش أكتر حتى لو بمجرد كلام.. والأهم من المناسبات السعيدة هو إنك تكون موجود في الأوقات الصعبة وتقف جنب الشخص وتحاول تقدم المساعدة اللي تقدر عليها والاهتمام.

4- التجارب

ممكن تكون حاجة واضحة بس انت محتاج علاقتك بصحابك تكون فيها متعة يعني تجربوا حاجات جديدة مع بعض وتتبسطوا حتى لو الحاجة مش حلوة المواقف نفسها مابتتنسيش وبتتخزن في الذاكرة كموقف حلو بنحكيه ونضحك عليه بعدين.. يعني ممكن تتفقوا تعملوا أكل بنفسكم أو تروحوا رحلة انت وصحابك وهي دي الحاجات اللي بتعمل روابط قوية للصداقة.

5- الدعم

الدعم والتشجيع حاجات ضرورية للإنسان عشان يستمر إنه يقدم حاجة ويتطور وينجح.. ومافيش أصدق وأقوى من دعم وتشجيع الصحاب بل إنه ممكن يساوي ويكون أكبر من تشجيع ودعم الأهالي فا لازم دايماً تدعموا بعض وتشجعوا بعض في كل حاجة.. تحاول تكون جنبه في المواقف اللي بيسيب فيها شغلة أو بينفصل أو حتى تشجعه لشغل جديد أو علاقة جديدة هيدخلها.. دعم الصحاب دايمًا بيزقك خطوة قدام

6- التقدير

التقدير عمره ما هيخسرنا كتير.. كل الحاجات البسيطة اللي بتتعمل محتاجة تقدير عشان تحافظ عليها وتحافظ على الصحوبية بتاعتك انت وصحابك فا لما تنزلوا على القهوة ما تستقلش بالقعدة دي بالعكس دي حاجة كبيرة محتاج تقدرها وتديها إهتمام وكمان في حب ودعم وحاجات استثنائية بتاخدها من صحابك لازم تقدرها لأن مش دايمًا بناخد بالها مننا وبنفكرها واجب على صحابنا ولازم يعملوه.. لكن لازم ناخد بالنا إن الحاجات البسيطة دي مش بتيجي من أي حد ومش بتيجي بالاستمرارية دي دايمًا من حد غير من صحابنا وأهالينا.

في النهاية الصداقة شيء له قيمة كبيرة جدًا عمره ماهيتلخص في نقط معدودة ومحددة كده بالعكس الموضوع معقد وكبير وبيحتاج للتأمل فيه مع نفسك وتشوف من مكانك إيه اللي علاقاتك محتاجاه وإيه اللي مش محتاجاه عشان تكمل وتكون قوية بل وتطور وتبقى أفضل بشكل مستمر.