اعرف أكتر عن حلاوة إنك ماتعملش حاجة!

لما بنقعد مع نفسنا بنفكر في كل حاجة بنعملها بشكل سلبي.. وبنبتدي نحس إننا مقصرين وإن في حاجات المفروض نكون حققناها دلوقتي ولسه ماحصلتش.. وبنبدأ واحدة واحدة نجلد ذاتنا ونقولها إنها مقصرة ومتأخرة عن غيرها من الناس..
مع إن لو بصينا للحقيقة هنلاقي إننا بنعمل حاجات كتير واحنا مش واخدين بالنا منها ويمكن كل اللي محتاجين نعمله إننا نكون بس بنقدر الحاجات اللي في أيدينا دلوقتي ونعرف قيمتها..

في مصطلح بيعبر عن المعنى ده اسمه “Dolce Far Niente” وهو مصطلح إيطالي اتشهر أوي من خلال فيلم جوليا روبرتس “Eat Pray Love”  والناس ابتدت تتكلم عنه من وقتها وتعجب بيه..


Dolce Far Niente هو مصطلح إيطالي معناه بالعربي”حلاوة عدم القيام بشيء” ودي مش بس مقولة بيقولها الإيطاليين لا ده شيء بيحاولوا يطبقوه في حياتهم بشكل تلقائي.. وبترجع المقولة دي لروما القديمة لأن وقت الفراغ كان له قيمة كبيرة عندهم زمان وبيعتبروه وقت مخصص للنمو الشخصي وتطوير الذات..

وكانوا بيعتقدوا إن تخصيص وقت للاسترخاء والاستمتاع بالحياة البسيطة شيء ضروري للحفاظ على الصحة النفسية والعقلية خاصة للأشخاص المبدعين زي الفنانين والفلاسفة عشان كده يقال إن وقتها كان في مبدعين كتير بسبب إنهم بيطبقوا الأسلوب ده في حياتهم وكمان في جزء كبير منهم اتكلموا عن كونسبت الراحة في رواياتهم وأشعارهم وكمان لوحاتهم.

زي لوحة “Dolce Far Niente” للفنان الإنجليزي John William Godward اللي عملها سنة 1904م

وعلى الرغم من إن الحياة بتجري بينا وتخلينا لازم نجري معاها بالعافية لكن المقولة دي بتقولك خد نفسك شوية واستمتع باللحظة دلوقتي من غير ما تشغل بالك بحاجات توترك وتعكنن عليك.. والحاجة المهمة فعلا إننا نقدر اللحظة اللي احنا فيها في صمت من غير ما نفكر كتير في حاجات تقلب مزاجنا وتخلينا نخسر اللي معانا.. عشان كده مهم نخلي وقت لنفسنا مانعملش فيه حاجة ونصفي ذهننا حتى لو هنتأمل في الحاجات الحلوة بس.. وماتنسوش كل يوم زي ما بتخلوا وقت للأحزان تخلوا وقت لـ “Dolce Far Niente”..

ولو عايز تعمل حاجات تساعدك تطبق الكونسبت ده.. دي شوية حاجات تعملها تساعدك تستمتع بالولا حاجة وفقا لموقع Self

1-حاول ماتحسش بالذنب لمجرد إنك مرتاح:
عالمة النفس الإكلينيكي “آديا جودن” بتقول: إننا اتعودنا على إننا نبقى مشغولين وده بيخلي الراحة بالنسبالنا شيء غريب وغير مريح لأن الناس بتربط الشعور بالنجاح والاستحقاق بمدى إنتاجيتهم والوقت اللي اشتغلوه.. عشان كده بيحسوا بالتقصير لما بيريحوا شوية..
دكتور  علم النفس “زوكر” بيقول “إن العقلية الموجهة نحو الإنجاز بتميل لاعتبار عدم القيام بأي شيء بمثابة إضاعة للوقت”..  والدكتور “نيل بارنيت” بيقول إن وسائل التواصل الاجتماعي ممكن تؤدي للشعور بالـ Fomo اللي هو الـ Fear of Missing Out أو بالعربي الخوف من ضياع الفرص فبتخلي الناس عايزة تجري وخلاص وهي مش عارفة ليه!

2-خصص وقت للراحة ولتصفية المشاعر السلبية:
لما مابنريحش ده بيفوت علينا حاجات كتير من ضمنها إننا نتبسط لأن طول ماحنا مشغولين مش هيبقى عندنا وقت نتبسط فيه.. ونفس الكلام مع مشاعر الحزن أو الغضب لو ماديناهومش وقتهم صح هنتعب جامد بعدين ومش هانعرف نحل المشاكل وهتكبر مننا.

3- اعمل لنفسك وقت مخصوص ليها:
خصص وقت لنفسك تقعد فيه لوحدك حتى لو هتقعد متنح مابتعملش حاجة أو حتى تقفل موبايلك وتنام لأن ده هيساعدك تشحن طاقتك من تاني.

4-لو حبيت تعمل حاجة خليها حاجة أنت بتحبها:
الراحة مش دايما معناها إننا مانعملش حاجة خالص.. لكن معناها تعمل حاجة أو ماتعملهاش بس تكون في الحالتين راضي عنها.. عشان كده ممكن تبدأ تعمل حاجة أنت عايزها أو حاسس إنها هتبسطك زي أكلة حلوة أو إنك تقعد عالكنبة وتشوف فيلم.. أو أي حاجة حاسس إنها هتريحك بغض النظر عن رأي باقي الناس فيها.