اعرف أكتر عن خسوف القمر اللي شهدته مصر فجر النهاردة الأربع

النهاردة العالم شهد ظاهرة خسوف القمر .. ووفقًا لوكالة ناسا والمعهد القومي للبحوث الفلكية المصرية، مش هيشوف الظاهرة دي إلا بعض مناطق العالم في أوروبا والأمريكتين وأفريقيا وكمان مصر هيكون ليها نصيب.. فتعالوا بقى نعرف أكتر عن خسوف القمر..

أول حاجة.. الخسوف بيحصل امتى؟

الخسوف بيحصل في مرحلة اكتمال القمر.. ولما تكون الأرض في النص بين القمر والشمس.. فتحجب أشعة الشمس ويسقط ظل الأرض على سطح القمر، 

وبالتالي يظهر بشكل خافت أو جزء منه وأحيانًا يتحول لـ اللون الأحمر.

طب إيه أنواع خسوف القمر؟

فيه 3 أنواع من خسوف القمر: الخسوف الكلي وخسوف شبه الظل والخسوف الجزئي..

وعشان نفهم  الفرق بينهم.. محتاجين نعرف إن لما يحجب كوكبنا ضوء الشمس بيلقي على القمر ظلين مختلفين.. الأول ظل أكبر يمتد بعيد عن الأرض بزاوية تُعرف باسم (شبه الظل) والتاني بيكون ورا الأرض مباشرة وبيكون ظل أغمق وأضيق يوده الخسوف الكلي.

الخسوف الكلي:

هنا القمر بيكون ورا الأرض فبيغطي ظلها سطح القمر كله تقريبا.. وبيوصل للقمر ضوء بسيط أوي من الشمس اللي  بيمر عبر الغلاف الجوي للأرض وينوره بشكل خافت وممكن يتحول لـ اللون الأحمر.. 

وبشكل مبسط بنشوف القمر الدموي ده لما ضوء الشمس يخبط في الغلاف الجوي فالألوان اللي أطوالها الموجية أطول زي الأزرق والبنفسجي بتتناثر أما الألوان اللي أطوالها الموجية أقصر زي البرتقالي والأحمر بتنكسر في الغلاف الجوي للأرض وبينور القمر بيها فبيظهر بالشكل واللون ده.

الخسوف شبه الظلي:

وده بيحصل لما يتحرك القمر من خلال الجزء الخارجي الخافت من ظل الأرض أو الزاوية الأكبر من الظل.. وبيكون ضوء القمر خافت شوية لدرجة لدرجة أنه ممكن يكون من الصعب ملاحظته حتى باستخدام التلسكوب.

الخسوف الجزئي:

وده بيحصل لما يكون الشمس والأرض والقمر مش مصطفين ورا بعض بالظبط وبيمر القمر من خلال جزء فقط من ظل الأرض. وبالتالي الظل مش بيغطي القمر بالكامل.

ووفقًا للمعهد القومي للبحوث الفلكية فإن الخسوف اللي حصل فجر النهاردة كانت نتيجة  حجب ظل الأرض نسبة 3,5 % من مساحة قرص القمر كان وشهدنا نوعين: خسوف شبه ظلي حصل من الساعة 3:41

وخسوف جزئي حصل الساعة 5:12 وذروته كانت الساعة 5:44

والقمر أغرب الساعة 6:47 صباحاً وكان في مرحلة الخسوف شبه الظلي لحد ما اختفى تمامًا