اعرف أول دورة لمعرض الكتاب كانت عاملة إزاي؟

أجواء فريدة من نوعها…
• في يوم 22 يناير 1969 وتحديدًا قدام أكبر صرح ثقافي مصري وهو دار الأوبرا المصرية وعلى غير المتوقع بسبب الأجواء طابور طويل من المهتمين بالقراءة ورواد الصالونات الثقافية مش هاممهم ومستمتعين بالأجواء.. واقفين مستنيين دورهم علشان يحضروا الحدث الأول من نوعه في مصر وهو افتتاح المعرض الدولي للكتاب في دورته الأولى.. وده على حسب وصف مقال للمفكر والفيلسوف فؤاد زكريا اتنشر في عدد فبراير 1969 في مجلة الفكر المعاصر.

• وبيوصف الباحث محمد سيد ريان إن ماكنش فيه حد من الكُتاب والقراء كان يتوقع حضور الناس، لكن بالعكس جه آلاف المهتمين بالقراءة وكانت الحركة جوة المعرض بقوة الدفع.

• وبيحكي إن المعرض استمر 8 أيام وبأعداد كبيرة في ظل احتفال بالحدث الأول من نوعه رغم خروج الناس من احتفالات أعياد رأس السنة والميلاد المجيد ورغم قلة الباقي من المرتب آخر الشهر في الوقت ده.

الحكاية بدأت في الوقت ده…
• سنة 1969 كانت القاهرة بتحتفل بمرور 1000 سنة على تأسيسها على إيد جوهر الصقلي بأمر من الخليفة المعز لدين الله الفاطمي سنة 969م.

• حدث عظيم زي ده خلى وزير الثقافة وقتها يقرر الاحتفال بطريقة مختلفة .. طريقة ثقافية فريدة من نوعها وكلّف الكاتبة والباحثة سهير القلماوي بالإشراف على أول معرض دولي للكتاب.

• ومن ناحية تانية كان فيه اهتمام كبير بالثقافة ونشر الوعي خصوصًا بعد هزيمة 67 وحرصت الدولة على تسليح الشعب بالثقافة وتعريفه إزاي بيفكر العالم.

• وعشان كده كان مدعو حوالي 100 ناشر وشاركت 5 دول أجنبية و علي مساحة 2000 متر حسب تقرير أعدته الهيئة العامة للاستعلامات.

• وسددت الدول المشاركة فيه 30 ألف جنيه مقابل مساحات العرض وكان سعر تأجير المتر فى المعرض 20جنيه وقتها.

وبعدين…
• مكان المعرض اتغير أكتر من مرة زي ما اتكلمنا  فوق بدأ في أرض المعارض بالجزيرة اللي هي مكان دار الأوبرا المصرية حاليًا وبعد كده اتنقل لأرض المعارض في مدينة نصر …
وفي 2019 استقر في مكانه الحالي في مركز مصر للمعارض والمؤتمرات الدولية بالقاهرة الجديدة

• أنشطة المعرض قدمتها وزارة الثقافة على مدار سنين وعبارة عن ندوات ثقافية وأنشطة ترفيهية منها عروض السينما والمسرح والمعارض التشكيلية والعروض الموسيقية على مدار 12 يوم.

• تواريخ مميزة للمعرض:
2006 كان معرض القاهرة للكتاب ثاني أكبر معرض بعد معرض فرانكفورت الدولي للكتاب
2008 المعرض في دورته الـ 39 اختار سهير القلماوي اللي نفذت أول معرض شخصية العام
2021 اتأجلت الدورة الـ52 لمعرض الكتاب لـ 30 يونيو بدلًا من يناير بسبب تداعيات جائحة فيروس كورونا

معرض الكتاب السنة دي
• في دورته الـ54 هيستقبل الجمهور يوم 26 يناير ليوم 6 فبراير من الساعة 10 صباحً للساعة 9 مساء.
• شخصية المعرض السنة دي هي الراحل صلاح جاهين.
• هيكون معمول خطوط مواصلات تنقل الناس من مناطق كتير زي شبرا ومصر الجديدة والمعادي والجيزة ووسط البلد.
• ثمن التذكرة 5 جنيه هتتحجز من الموقع ده
https://cairobookfair.gebo.gov.eg/ticket
• نتمنى تقضوا وقت لطيف وتكون فرصة لمحبين القراءة إنهم يشوفوا كل جديد ويقابلوا الكُتاب المفضلين ليهم سواء من خلال كتبهم أو ندوات ليهم شخصيًا.