اعرف إزاي اتطورت أساليب البريد وتوصيل الرسائل في العالم!
زمان تطور نظام الممالك والامبراطوريات بسرعة وزادت التوسعات والفتوحات بشكل كبير والعالم ماكنش قرية صغيرة ومن هنا كانت فكرة المراسلة أو نشر التعليمات مهمة جدًا جوه البلاد عشان يعرفوا قرارات الحاكم على الشعب و الناس اللي بره البلد يعرفوا أخبار وأحوال باقي الإمبراطورية والأساليب وأنظمة البريد كترت واتطورت من زمن للتاني من دولة للتانية.
ويوم 9 أكتوبر هو اليوم العالمي للبريد وذكرى تأسيس الاتحاد البريدي العالمي سنة 1874 فبالمناسبة دي تعالوا نشوف الأساليب والأسس اللي كانت سبب في تطور البريد في العالم لحد دلوقتي…..
وسائل المراسلة اللي استخدمتها الشعوب اختلفت وكانت على أساس الطريقة المناسبة لبيئتهم أكتر وكان أبرزها:
1- الحمام الزاجل : هو نوع من الحمام وطني أوي بيطير ويرجع البلد بتاعته اللي طار منها فكانت الناس بتستخدمه للتواصل وده عن طريق إرسال جوابات عادية أو معلومات سرية وكانوا أول ناس استخدموه هم الإغريق عشان ينقلوا نتيجة الألعاب الأولمبية.
2– الساعي : أيام الفراعنة انتشر استخدام السعاة وكان الساعي بيستخدم النيل مسار ودليل في رحلته
عشان ينقل المراسيم اللي بيقولها الحاكم جوه البلاد وكان بياخد نفس طريق القوافل التجارية لو هينقل أي أخبار بره البلاد.
3- المرسال : العرب كمان كانو بيكتبوا رسايلهم على ألواح طينية واستخدموا كمان الجلود وكانت بتتغطي بغلاف أو هدايا من حاكم لحاكم وياخدها واحد على جمل ويوصلها لصاحبها.
وعدت سنين كتير أوي والعالم أصبح معقد ومليان تفاصيل سياسية وأحداث سرية ماينفعش حد يطلع عليها غير صاحبها واللي بيراسله وتنافس العلماء والمخترعين في تطوير الفكرة وظهرت أجهزة متنوعة منها:
4- التليغراف: وهو جهاز اتصالات استخدموه في نهاية القرن التاسع عشر وأوائل القرن العشرين، عشان يبعتوا معلومات سرية وبعدين الموضوع اتعمم واستخدموه علشان توصيل البرقيات وكانت فكرته اننا نبلغ موظف مختص رسالتنا وهو يحولها لإشارات كهربائية يستقبلها موظف الناحية التانية ويترجمها ويبلغها لصاحبها.
5- التلكس: وده جهاز شبه التليفون في طريقة الاستخدام وتطوير للتليغراف في القرن العشرين، ولكن من خلال كلام مكتوب مش بيتسمع وكان لازم نعرف الكود بتاع الجهاز اللي عايزين نتواصل معاه عشان نضمن وصول الرسالة.
6- الفاكس: وبعدين ظهر الفاكس اللي كان بيسمح بنقل الصور والوثائق من خلال التليفون.
7- البريد الإلكتروني: وعدت سنين كتير.. أوي.. والتكنولوجيا اتدخلت وقالت اللي يخرجني يفرجني وعملت طفرة في فكرة المراسلة والتواصل بقي من خلال ابتكار البريد الإلكتروني اللي بيخلينا نبعت ونستقبل الرسايل من خلال الانترنت وبعض وسائل التواصل الاجتماعي.
والجدير بالذكر إن ظهور أول نظام بريدي في العالم كان في سنة 2400 قبل الميلاد لإن كان لازم العالم يغير فكرة المراسلة ويبتكر نظام يحقق الغرض منها.. ناس كتير فكرت ولكن حضارة عظيمة زي الحضارة الفرعونية ماكنش ينفع يعدي عليها الموضوع ده كان عندنا وقت الفراعنة وكان بيتوظف له سعاة بينقلوا الأخبار والرسائل في مصر القديمة وبيعرفوا الناس بالضرايب كمان.
