اعرف إزاي تتجنب الضغط الواطي في الحر 

زي ما ناس كتير بتحب الصيف عشان بياخدوا إجازة وبيصيفوا وبيخرجوا وبيقعدوا في التكييف وكل الحاجات الحلوة دي فيه ناس تانية مابتحبش الصيف بس لأسباب ليها علاقة بصحتهم ومالهاش علاقة بالخروج والسفر.. ناس كتير دخلة الصيف بالنسبة لها يعني ضغط واطي وأوقات بتوصل للأغماء عشان كده مابيقدروش يخرجوا في الحر والشمس كتير

وبما إن الجو بدأ يحرر فخلينا نتكلم شوية عن العوامل والأسباب اللي بتخلي الناس ضغطها يوطى في الصيف زي ما قال موقع “onlymyhealth” في أحد مقالاته:

1- الجفاف:

الحر بيسبب زيادة العرق وده اللي بيسبب الجفاف، وده بيسبب انخفاض حجم الدم اللي بيسبب بعد كده الضغط الواطي.

2- تمدد الأوعية الدموية: 

في درجات الحرارة العالية الأوعية الدموية بتميل إنها تتمدد عشان تساعد في تبريد الجسم، والتمدد ده ممكن يسبب انخفاض في ضغط الدم

3- قلة تناول الملح:

العرق الزيادة في الأنشطة الصيفية بيأدي لاستنزاف الملح، والصوديوم بيلعب دور مهم في المحافظة على ضغط الدم والمستويات القليلة منه بتساعد في انخفاض ضغط الدم.

ولو أنت شخص مابتحسش إنك ضغط واطي وبتلاقي نفسك بيغمى عليك مرة واحدة.. فيه علامات بتأكد من الأول إنك ضغط وطي والعلامات دي زي:

الدوخة

التعب أو الضعف

عدم وضوح الرؤية

الإغماء أو الشعور بالإغماء

الغثيان

 التنفس السريع أو بصعوبة 

وعشان تتجنب انخفاض الضغط في الحر فيه شوية حاجات محتاج تغيرهم في الـ Life style بتاعك عشان تحافظ على صحتك وهما:

1- اشرب مياه كويس:

شرب كميات مياه كتير وكفاية طول اليوم هيخليك تتجنب الجفاف وتحافظ على حجم الدم. ولازم تخلي شربك للكافيين محدود عشان بيساهم في الجفاف

2- كل كميات معتدلة من الأملاح:

لو الدكتور بتاعك وافق على زيادة كمية الملح اللي بتاكلها بشكل قليل عشان ترفعلك الضغط فاعمل كده بس ضروري تستشير دكتور عشان الملح مايتسببلكش في أي مشاكل صحية تاني.

3- البس شرابات ضيقة:

الشرابات الضيقة ممكن تساعد على تحسين الدورة الدموية وبتمنع تجمد الدم في الأطراف السفلية وبالتالي بتقلل خطر انخفاض ضغط الدم

4- اتجنب الوقوف أو الجلوس لفترات طويلة:

لو قدرت كل فترة تحرك نفسك اعمل كده وخد فترات راحة كمان وحاول تعمل سترتشات وتتحرك عشان تدفق الدم

5- ابعد عن الحر:

اتجنب التعرض للحرارة بشكل مفرط وحاول تدور على الضل واستخدام المراوح أو التكييف والبس هدوم خفيفة حتى في الوزن عشان تسمح إن الهواء يدخل لإن ده كله بيساعد في تقليل توسع الأوعية وبيحافظ على ضغط الدم

6- مارس الرياضة بانتظام:

ممكن النشاط البدني المنتظم يساعد في تحسين صحة القلب والأوعية الدموية ويحافظ على ضغط الدم ومع ذلك برضه مهم إنك تسأل دكتور قبل ما تبدأ أي نظام تمرين جديد.