اعرف إزاي تنجو من أي أزمة عديت بيها من غير ما تظن إنك نجوت!

كل شخص مهما كانت قوته وصلابة شخصيته أكيد مر بأزمات ومواقف حس إنها نهاية الدنيا وكانت بالنسبة له الضربة القاضية والدنيا مش هتتحرك بعدها تانية، وبعد الأزمات دي بيحس باليأس والاكتئاب وانعدام الرغبة في الشئ اللي سبب له الأزمة ويمكن يوصل لانعدام الرغبة في الحياة كمان، بس في بعض الأوقات بنحتاج نوصل لقاع الانهيار عشان نقدر نرجع تاني للحياة زي ما كانت وأحسن أو بمعنى أصح ننجو من الدمار اللي شل الحياة في نظرنا لفترة.

النجاة من الأزمات والمشاكل نظريًا شئ يبدو سهل، بس أثناء ما أي حد بيحاول يحقق النجاة ويطلع من الأزمة بأقل الخساير النفسية بتبقى عملية صعبة ومرهقة فعلا، خصوصا إنها بتبقى عايزة الشخص يمر بـ 3 مراحل واللي هما إنك بتنهار خالص وتقع في القاع، وإنه يسيب نفسه للقاع شوية من غير ما يقاوم ويضغط على نفسه، والمرحلة الأخيرة هو إنه يقاوم ويرجع يبني تاني حياته.. بس خلينا نقولك إزاي تعدي من أي تجربة سيئة وتتخطاها حسب ما قال موقع “Brightside” في واحد من مقالاته:

1- اتكلم أقل:

اتلكم عن التجربة اللي عديت بيها أقل عشان ماتبقاش شخص “ايموشنال” وكل شوية تتضايق نفسك، فخاول تاخد وقت تهدي فيه وتفكر، خصوصا إنك لو اتكلمت بمشاعرك وانفعالاتك ممكن تندم بعد كده، وفي النهاية ده أفضل لإنه هيشغلك عن التجربة السيئة.

2- اصبر واستني شوف إيه اللي هيحصل:

غالبا بنبقى عايزين نرد على المواقف واللي اتقال أو أفعال الشخص اللي قدامنا على طول، ولما ده بيحصل غالبًا بناخد قرارات متهورة، فعلماء النفس بيقترحوا إنه بلاش نتسرع وإنك محتاج تدي نفسك وقت للتفكير، وتشوف إيه اللي هيحصل.

3- بطل تدور على حاجة تلومها:

غالبًا تحليل الماضي طول الوقت هيخليك تدور على حاجة تلومها، وبما فيهم هتلاقي طريقة عشان تلوم نفسك، فأنت محتاج تقبل وتعرف إن اللي حصل حصل والمهم دلوقتي إنك تلاقي حل.

4- أوصل بنفسك لاستنتاجات:

اسأل نفسك هل لو حد فهم اللي أنت بتفكر فيه ودوافعك هيوصل لاستنجات صح، احتمال أصلا مايكونش عنده أدنى فكرة عن اللي أنت حاسه، عشان كده حاول أنت بنفسمك توصل لاستنتاجات، وبلاش تتعب الناس معاك عشان أنت كده  بتضيع وقت.

5- اتعامل مع أكبر مشكلة:

أكبر مشكلة أغلبنا المفروض يتعامل معاها هي الغضب، لإن ده بيخفف كل المشاعر التانية، فحاول تهدي غضبك عن طريق المشي مسافات طويلة أو التأمل أو إنك تلعب أي رياضة أو أي نشاط عموما لإن ده هيساعدك تهدى.

6- طور مهارات جديدة:

طور من نفسك ومن مهاراتك مثلا العب رياضة لإن عقلك لما بيتقل لدراسة حاجة جديدة فعدد الأفكار غير المرغوب فيها بيقل في دماغك تدريجيًا، وفي كل مرة بندخل في تجربة جديدة بنطلع بأفكار وخبرات جديدة ونفس الكلام بيحصل لما بتعمل مجهود بدني.

7- افتكر إن أفكارك والحقيقة مش نفس الحاجة:

عواطفنا لها تأثير جسدي علينا وبتكون في شكل توتر وقلق وتوتر وخوف، وبنحس بيه في كل حتة في جسمنا، وده بيخلينا نحس أوقات كتير إن الأفكار دي حقيقة، لكن حاول تفكر في أي حاجة بموضوعية وهتدرك إن الأمور مختلفة.

8- اكتشف الدروس المستفادة من التجربة:

فكر في الدروس المستفادة اللي اتعلمتها من تجاربك القديمة، وحاول تشوف اللي حصل إنه تجربة غنية للمستقبل، وخليك عارف إن أي فشل هو فرصة جديدة لتصحيح المواقف وإنك فعلا ماشي في الطريق السليم عشان تتطور بشكل إيجابي في المستقبل.

9- ماتعيش في الماضي:

بلاش تعيش في الماضي والذكريات كتير، خصوصًا إننا لما بنفكر في الماضي بنفضل نتخيل كان المفروض نعمل إيه أو نقول إيه عشان نتجنب الأشياء السيئة اللي حصلت، لكن ماحدش بيقدر يرجع بالزمن خلاص.. لما يخترعوا آلة الزمن ابقى فكر وارجع عيد المواقف تاني.

10- بدل الأفكار السلبية بأفكار إيجابية:

علماء النفس بيقولوا إن الأفكار الإيجابية القوية بتبعدك عن أي سكة للأفكار السلبية، فحاول تتخيل نفسك في المستقبل بتعمل حاجات كويسة وتخطط لحاجات ممتعة فعلا بتحبها وتبعد دماغك عن سحلة الأفكار السلبية.

11- فكر نفسك باللي كنت عليه قبل العلاقة دي:

حاول تفتكر نفسك كنت بتعمل إيه وكنت فين قبل ما تدخل العلاقة اللي انتهت دي واللي حسستك بالألم كبير، وماتحسش إن الشخص ده غريب لإنك ممكن ترجع للشخصية دي مرة تانية وبالشكل ده أصلا أنت بتدي نفسك فرصة ترجع الشخص ده مرة تانية.

في النهاية محتاجين نقولك إن الضربات اللي مابتموتش بتقوي وإنك فعلا هتقدر تنجو وتبقى أحسن مما كنت سواء كانت التجربة دي علاقة عاطفية أو صداقة أو أزمة مادية أو أزمة شغل أو أي نوع من أنواع الأزمات.. أنت قدها وقدود.