اعرف إيه هو الـ Rage bait/ إثارة الغضب اللي بيحصل على السوشيـال ميديا؟

ساعات كده تبقى بتسكرول على السوشيال ميديا وتلاقي بوست من جروب “جيش الفنانة غادة عبدالرازق” بيقول إنها كوين ومعلمة على محمد سامي.. فتلاقي الناس في الكومنتات بتتخانق مع بعضها ويقولوا لأ ده هو اللي كينج القفلات الدرامية.. بعدها تقلب شوية وتلاقي إشاعات موت فنانين وماتبقاش فاهم هو إيه اللي دخلك في الحوارات دي.. كل بقى اللي بيحصل ده اسمه Rage bait/ إثارة الغضب

أصل كلمة Rage bait/ إثارة الغضب؟ وإيه أشكاله؟

مصطلح عامي أمريكي كان بيتقال زمان كتير في العلاقات ومعناه إنه سلوك مستفز الشريك بيعمله بشكل مقصود عشان يضايقك بدل ما يتواصل معاك بشكل صحي ومباشر عن مشكلتكم

• أشكاله:

• تجنب المواجهة ويفتح مشكلة قديمة وسط الخلاف عشان يبعدك عن مشكلتكم الأساسية
• التحريف في كلامك بشكل يقدر يستغله ضدك ويهاجمك
• يلعب دور الضحية زي ناس تعرفها كده  بالبلدي ضربني وبكى سبقني واشتكى وتكون بوستاته كلها “مشكلتي هي طيبتي” 

إثارة الغضب/ Rage bait في السوشيال ميديا

بعد ما المحتوى والسوشيال ميديا خدت مساحة أكبر في حياتنا الناس بقت بتعمل أي محتوى وخلاص مش مهم كويس أو لأ المهم يجيب أرقام ويبقى تريند حتى لو بيقول معلومة غلط أو ناقصة أو حتى مستفزة.. فبقى المصطلح ده استراتيجية محتوى بتتعمل مخصوص عشان ناس كتير تُستفز وتتفاعل معاها فالبوست يضرب وأرقامه تزيد.. وحسب cambridge dictionary فمصطلح Rage bait هو أي بوست أو فيديو أو صورة أو حتى ميم يضايق الناس ويستفزهم 

أمثلة لإثارة الغضب / Rage bait على السوشيال ميديا

• سيمون كوبلاند متخصص في البحث في التطرف على الإنترنت بالجامعة الوطنية الأسترالية قال إن من أشهر الأمثلة عن إثارة الغضب واللي بيشوفها بشكل كبير في أمريكا هي الوصفات الوحشة جدًا اللي البلوجرز بيجربوها 
• التعميمات المستفزة: زي كل الرجالة توكسيك أو اللي كل اللي بيشتغلوا مهنة معينة مش كويسين

• • الهجوم الشخصي المتنكر في شكل كويس/ The Personal Attack Disguised as Concern: اللي هو دس السم في العسل.. تلاقي بوست بيتكلم عن تشجيع الستات على الشغل بس في نُصه يتكلم إن في الآخر مكان الست المطبخ عشان ماتتعبش وخايف عليها 
  • مؤامرة رجل القش/ The Strawman Setup: تحريف مواقف أو قصص يبالغوا فيها وممكن ماتكونش حقيقية أصلًا ولا حصلت زي خبر عن ممثل أو مغني أو حادثة يهولوا ويأفوروا فيها وعن ضحاياها
    
    Clickbait: هي اللينكات اللي عناوينها مشطشطة وكاتبين الخبر بمعلومات ناقصة عشان يزودوا الدخول على الموقع ومتجاهلين باقي الخبر عشان يسيبوا الجزء اللي هيجيب لايكات

• Trolling/ التعليقات الاستفزازية: زي الناس اللي بتكتب تعليقات مستفزة بشكل متعمد عند أكاونت مغني مابيحبهوش عشان فانز المغني ده يتعصبوا ويضايقوا

• عداوات مصطنعة: زي اتنين صانعين محتوى يرسموا قدام الناس إنهم بيكرهوا بعض ومتخانقين عشان المشاهدات تولع عندهم ويتشهروا أكتر

ليه فيه ناس بتلجأ للـ Rage bait؟

• المشاهدات والكومنتات الكتيرة اللي بالتبعية هتخليهم يكسبوا فلوس  
• الخوف من الضعف: شايف إن التعبير عن مشاعره بشكل مباشر هيخلي شكله وحش وضعيف
• حب الاهتمام: فيه ناس لما بتحس بالإهمال بيحبوا يستفزوا اللي حواليهم عشان ياخدوا أي اهتمام والسلام حتى لو اهتمام سلبي هما بيكونوا متكيفين وواخدين الاهتمام اللي نفسهم فيه
• ماعندهمش مهارات تواصل: مابيعرفوش يعبروا عن مخاوفهم واحتياجاتهم بشكل ناضج وصحي
• التلاعب: أندريا جونز خبيرة التسويق بتقول إن المحتوى اللي بيستفزك وبيخليك غضبان بيكون متصمم بشكل أساسي عشان يتلاعب بيك
• حب السيطرة والقوة: التلاعب بمشاعر الناس والتحكم في سلوك اللي حواليهم بإنهم يطلعوا ردود فعل معينة بيدي إحساس بالقوة وارتياح كده بإنهم متحكمين في وعي وأفكار الناس
• الترفيه: يمكن هتستغرب بس فيه ناس ساديين بيحبوا يشوفوا اللي حواليهم مضايقين وبعدين أبسط مثال لما بتنزل صورة حلوة عشان الإكس يـ/تندم.. ولا بوستات التلقيح بتاعتك عن عين عمتك 

طب إزاي تعرف المعلومة أو الخبر الحقيقي من الفيك وإنه مش إثارة غضب؟

الدكتور “كوبلاند” بيقول شوية طرق تساعدك عشان ماتخليش حد يعرف يضحك عليك: 

• STOP Technique: اللي هي بتتقسم لحروف: S يعني وقف اللي انت بتعمله اللي هو السكرولنج جاية من “stop”.. و”T” جاية من “Take a breath” اللي هو خد نفسك كده.. وبعدها “O” جاية من “observe what’s happening” يعني لاحظ اللي بيحصل سواء حواليك أو جواك.. وآخر حاجة “P” جاية من “Proceed mindfully with intention, not reaction” يعني من الآخر كده كمل من غير ما تتفاعل.. وضاف إن ممكن تبقى عايز ترجع وتتفاعل مع المحتوى ده بس لما هترجع خطوة لوره وماتتفاعلش معاه ساعتها النوع ده من المحتوى هيقل ظهوره من الفيد بتاعك 
• خلي عندك فضول: اتحقق من مصداقية المصدر اللي شوفت منه الخبر أو البوست وبص على كذا مصدر عشان تتأكد هو خبر بجد ولا أي كلام
• الدكتور كمان نصحنا بحاجة مامتك أكيد قالتهالك وهي إنك تخف قعدة على السوشيال ميديا وتبدأ تشوف مصادر تانية غيرها تكون موثوقة تاخد منها الأخبار زي قنوات التلفزيون والجرايد الرسمية والكتب كمان

وبكده بقيت عارف اللي فيها عشان محدش يقدر يستفزك ولا يضحك عليك ويوقعك.. بس انت كمان بطل تستفز الإكس بصورك اللي نيتها تندمها \ يه لأنه فعلًا مش هيرجعلك