اعرف الحجر الكريم المناسب ليك من شهر ميلادك
![](https://theglocal.com/wp-content/uploads/2024/07/Website-Thumb-7.png)
الأحجار الكريمة ليها تاريخ طويل أوي حوالين العالم .. وكان بيتم استخدامها من زمان أوي في اليونان وروما القديمة وكمان القدماء المصريين كانوا بيستخدموها للتزيين أو لصناعة الجعران وكمان بعض الحجارة كان بيتم صناعة مساحيق التجميل منها.. والأحجار الكريمة ليها أشكال وأنواع مختلفة.. وكل حجر ليه شهر متعلق بيه.. عشان كده في الموضوع ده هنقولك كل حجر ونوعه وبيرمز لإيه وكمان الشهر المرتبط بيه وفقا لـ موقع nyu و gemselect.
حجر العقيق:
يقال إن حجر الجارنيت أو العقيق بيساعد في الحماية من الطاقة السلبية وبيحافظ على الحالة النفسية.. وبيعمل توازن في الجسم والعقل يعني حجر أخر روقان.. ومرتبط بمواليد شهر يناير.
حجر الجيمشت:
الحجر ده بيهدي المشاعر وبيشجع على صفاء الذهن.. ولو أنت شخص بيحب الحكمة هيكون مناسب ليك لأنه بيوحي بالرصانة في التفكير وبيقلل من التوتر.. ومرتبط بمواليد شهر فبراير.
حجر الأكوامارين:
الحجر ده مرتبط بحماية الصحة والحفاظ عليها وبيوحي بالأمل.. والصيادين الإغريق كانوا بيعتبروه صديق للبحار وكانوا شايفينه حماية ليهم عشان يكون سفرهم آمن
والحجر مرتبط بمواليد شهر مارس.
حجر المويسانتي:
وهو حجر بيشبه الماس وتم اكتشافه في حفرة من نيزك عمرها 50000 سنة..
وبيوحي بالقوة والوضوح فلو أنت شخص بتحب رموز القوة والعلم هايكون مناسب ليك وكمان مناسب للأشخاص اللي محتاجين ياخدوا ثقة في نفسهم وبيساعد في التخلص من الأفكار السلبية .. ومرتبط بمواليد شهر إبريل.
حجر الزمرد الأخضر:
حجر الزمرد الأخضر بيمثل الأمل والبدايات الجديدة وكمان الحظ السعيد.. عشان كده يقال إنه مناسب إنك تبدأ بيه بداية جديدة في حياتك لأن اللون الأخضر بيمثل التطور والحاجات الجديدة وكمان رمز مناسب للعيلة.. ومرتبط بمواليد شهر مايو.
اللؤلؤ:
هي أحجار كريمة من الرخويات ويُقال إنها بتمثل الحكمة والنقاء والبراءة ومناسبة للأشخاص اللي بتحب الحاجات المميزة الكلاسيكية.. ومرتبط اللون الأبيض فيه بالبساطة والنقاء و مناسب للأشخاص اللي بتدور على الطاقة الهادية في حياتهم ومابيحبوش الحوارات الكتير.. ومرتبط بمواليد شهر يونيو.
حجر الياقوت الأحمر:
من مميزات الحجر ده إنه دايما موضة.. وبيمثل مشاعر الحب والشجاعة يعني حجر رومانسي في نفسه من الأخر.. فهيكون مناسب للأشخاص الحساسين واللي بيدلدقوا مشاعر .. وكمان بيرتبط بالطاقة والحيوية فمناسب للأشخاص النشيطة..ومرتبط بمواليد شهر يوليو.
حجر الزبرجد:
كان بيعتبر رمز للصحة والسلام.. وكمان البهجة وبيعتبر اختيار مثالي للشخص اللي عايز حاجة مبهجة ومختلفة.. ومرتبط بمواليد شهر أغسطس.
حجر الأوبال:
من الأحجار اللي ليها ألوان متنوعة زي الأبيض والأسود والأزرق وألوانه بتوحي بالهدوء والحكمة ويقال إنه بيمثل رمز الإلهام والقدرة على الإبداع.. فلو بتدور على حجر يكون كريتيف وهادي وفي نفس الوقت ملفت للنظر هيكون أنسب اختيار .. ومرتبط بمواليد شهر أكتوبر.
حجر الياقوت الأزرق:
الياقوت الأزرق من الأحجار المميزة والفريدة من زمان.. ويعتبر من الألوان الملكية اللي بتمثل الولاء والإخلاص والثقة في النفس وهيكون مناسب للتعبير عن قوة العلاقات والهدوء والثقة.. ومرتبط بمواليد شهر سبتمبر.
حجر الكهرمان:
بيمثل القوة والشجاعة والقدرة على الشفاء.. فبيكون مثالي للأشخاص اللي بيمروا بأوقات صعبة أو عايزين حاجة تدعمهم يفضلوا أقوياء وتعبر عن الأمل والضوء وده لإن لونه مرتبط بالشمس اللي بتعبر عن الدفا والإيجابية في الحياة.. والحجر مرتبط بشهر نوفمبر.
حجر التوباز الأزرق:
يقال عن حجر التوباز الأزرق إنه بيساعد في تنقية الذهن وبيتناسب مع الأشخاص الحكيمة وبيحبوا الإلهام وكمان بيرمز للصدق.. وهو مرتبط بشهر ديسمبر