اعرف القصة ورا النشيد الوطني! وإيه هي المراحل اللي مر بيها؟
من زمان وإحنا في المدرسة في الطابور الصبح وتيجي فقرة النشيد.. بنعدل وقفتنا ونشد نفسنا ونرفع راسنا لعلم مصر ونقول كلمات النشيد.. “بلادي بلادي بلاااادي لكي حبي وفؤادي” لآخر النشيد.. وبالرغم إننا في الوقت ده ماكناش فاهمين معنى الكلمات أوي إلا إننا كنا بنحس بقشعرة وحالة من الفخر والوطنية.. وهو ده بالظبط المقصود من الأغاني والأناشيد الوطنية إنها تجمع الناس على حب الوطن والانتماء له وبشكل يناسب الفترة اللي ظهرت فيها..
عشان كده في اليوم الوطني للنشيد جمعنا لكم 7 مراحل للنشيد أو السلام الوطني في مصر وفقًا لموقع محافظة القاهرة ومقال في جريدة الأهرام لـ د.علاء فتحي استاذ الموسيقى العربية…
1- السلام الملكي (1869-1917) : وده لأن الخديوي اسماعيل سنة 1869م كلف الموسيقار الإيطالي فيردي ملحن أوبرا عايدة بتأليف وتلحين “سلام مخصوص خديوي” واتعزفت الألحان بس من غير كلمات في الافتتاح الاسطوري لقناة السويس قدام ملوك العالم
2- السلام السلطاني (1917-1923) : واتعمل بعد ما تولى حكم مصر فؤاد الأول ابن الخديوي إسماعيل في 1917م واللي غير نظام الحكم للسلطنة وكان عبارة عن مدح فيه ومش مهم البلد عادي
3- نشيد اسلمي يا مصر (1923-1936) : لو سمعت كلماته هتلاقيها مرتبطة بمشاهد الأفلام اللي اتعملت عن فترة ثورة 1919.. كله حماس وفخر بالبلد وكان بداية للتعبير عن الوطنية بعد ثورة 1919 لما نجحت مصر انها تاخد أول اعتراف من بريطانيا بحق الاستقلال واتعملت انتخابات نيابية فاز فيها سعد زغلول وحزب الوفد والنشيد ده كتبه مصطفى صادق الرافعي ولحنه الموسيقار صفر علي.. وعلى فكرة بيستخدم دلوقتي نشيد لكلية الشرطة.
4- رجوع السلام الملكي (1936-1953): وفضل مكمل النشيد ده لحد سنة 1936م لما جه الملك فاروق الأول لغاه ورجع السلام الملكي بتاع جدو الخديوي إسماعيل
5- نشيد الحرية (1953-1960) : حركة الملك فاروق بتاعت إلغاء النشيد اتردد له على يد الضباط الأحرار لما قامت الجمهورية 1952م وألغو السلام الملكي وألغوه هو شخصيًا وعبرت كلمات النشيد عن مدى كره حكم الملك وإحساس الحرية والنصر بعد عزله.. والنشيد اتعمل 1953م ومقتبس من قصيدة “كنت في صمتك مرغم” للشاعر كامل الشناوي ولحن محمد عبد الوهاب.
6- نشيد والله زمان يا سلاحي (1960-1979) : بعد أحداث العدوان الثلاثي وتأميم قناة السويس وهجوم إسرائيل وفرنسا وبريطانيا على مصر.. كان لازم يطلع نشيد حماسي يتجمع عليه الشعب ويشجعه على الدفاع عن البلد والوقوف ضد العدو.. ساعتها طلع قرار جمهوري بعمل نشيد وطني جديد وأًعلن عن مسابقة عامة لاختيار سلام وطني جديد واتقدم 170 لحن ووقع الاختيار على “الله أكبر” للملحن محمود الشريف وكلمات عبدالله شمس الدين ولكن تدخل الرئيس الراحل جمال عبد الناصر واختار نشيد الشعب ” والله زمان يا سلاحي” للملحن كمال الطويل وكلمات صلاح جاهين وكانت بتغنيه كوكب الشرق أم كلثوم في فترة العدوان الثلاثي ونال شعبية كبيرة جدًا.
7- نشيد بلادي بلادي (1979- دلوقتي) : وهو النشيد الحالي لمصر واللي بنردده في المناسبات الرسمية …بعد انتصار مصر في حرب أكتوبر عام 1973.. كانت الأجواء حماسية جدًا والجو مليان فخر بإننا أخيرا انتصرنا على أسطورة “العدو الذى لا يقهر ” .. وبعد رجوع الرئيس الراحل محمد أنور السادات من اتفاقية السلام 1979م .. طلب من الملحن محمد عبد الوهاب يعرض عليه مجموعة من الأناشيد الوطنية ووقع الاختيار على نشيد “بلادي بلادي” بعد إجراء التعديلات المناسبة في الكلمات والموسيقى اللي كانت في الأصل كلمات الشيخ يونس القاضي اللي كتبها وهو متأثر بخطاب ألقاه مصطفى كامل عام 1907م ولحّنه الموسيقار سيد درويش احتفالًا بعودة سعد زغلول من المنفى.
وتقدروا تسمعوا مجموعة الأناشيد من الفيديو ده
