اعرف دقنك بتقول إيه عن شخصيتك!
عالم النفس “روبرت جي بيلجريني” بيقول إن داخل كل راجل بيحلق دقنه خالص فيه دقن بتصرخ عشان تطلع، والطبيعي إن مش كل الرجالة دقنها في نفس الطول ولا زي بعض، بس أي راجل عنده دقن وشنب عارف قوتهم وتأثيرهم من غير ما يقول ولا كلمة.. وقال كمان عالم النفس “روبرت جي بيلجريني” إن الدقن بتنقل صورة عن الشخص إنه شخص قوي ومستقل ورائع، وأغلب الناس بتعتبرها رمز كلاسيكي متفق عليها للرجولة.
وعشان كده أغلب الرجالة بيربوا دقنهم أو على الأقل بيسبوها شوية، بس كل واحد بيسبها بالشكل اللي بيليق عليه، وبالرغم إنه أغلب الرجالة بيدوروا على الشكل المناسب ليهم إلا إن كل شكل للدقن بيقول عن شخصية الراجل شوية صفات زي ما قال موقع “cheat sheet” في واحد من مقالاته واللي هما:
1- الدقن الطويلة:
اللي هي الدقن بتاعت الإنسان البدائي اللي بتبقى كاملة وطويلة، الراجل اللي بيربي دقنة بالشكل ده غالبا بيكون شخص مبدع وغير مُتوقع وبيكون مستريح جدا في الحاجة اللي بيعملها أيا كان إيه هي.. وفي أغلب الأوقات الناس بتحكم عليه إنه شخص فوضوي وأشعث عشان كده بيواجه عقبة البدايات الجديدة سواء في علاقات أو شغل.
ويمكن “اللوك” ده رجالة كتير بتعتمده أثناء فترة البطالة أو بعد الانفصال.
2- دقن الـ”جينتل مان”
ودي الدقن اللي بتبقى مكتملة النمو وطويلة لكن صاحبها بيعتني بيها دايما، وأغلب الوقت بيبقى صاحبها عارف وضعه في العالم وغالبا بيكون شخص ذكي وصارم وواعي كويس للتفاصيل خصوصا إنه عشان يطلع بدقن طول الوقت متظبطة كده فده محتاج صبر وعناية بمستوى عالي.
3- دقن الـ”سكسوكة”:
بالرغم إنها بقيت قديمة شوية لإنها كانت موضة في نص التسعينيات إلا إن لسه فيه رجالة بتحبها وبتعتمدها في شكلها الأساسي، وغالبا صاحبها بيكون عنده فوبيا من الالتزامات، لكن متمسك بالشكل ده من زمان لإن لسه مافيش “لوك” تاني شكله أحسن فيه فهو مستني الأفضل يجي، وبيحس إن الشكل ده بيديه مظهر ذكوري.. وعموما صاحب السكسوكة بيلاقيها حل سهل في النص عشان يبقى عنده دقن ولو مزاجه مضطرب ممكن يحلقها خالص بسهولة.
4- الدقن المتحددة:
الشخص اللي بيحدد دقنة بالظبط ده بيقضي وقت كتير قدام المرايا عشان يقص ويحدد ويظبط دقنه في كل المناطق بالدقة دي فغالبا ما بيكون شخص نرجسي من كتر البص في المرايا.. ده غير كمان إنه بيبذل مجهود وبياخد منه وقت فبالتالي لازم يتباهي بنفسه وبالمجهود اللي عامله ده!
5- الدقن والشنب:
وده “لوك” الفنان أمير كرارة في باشا مصر، شنب كبير دقن خفيفة.. غالبا الشخص ده بيحب يبقى مرح وقليل ما بياخد نفسه أو الحياة عموما على محمل الجد، وبالنسبة للراجل اللي بيربي شنبه ودقنه، فالشنب بالنسبة له بيرفع من ثقته في نفسه وبيحسسه إنه روش ومستقل.
وبالنسبة لمحبين موسيقى الجاز فالمظهر ده عبارة عن مرحلة انتقالية لدقن أكتر كمالًا.
6- الدقن الصغيرة:
اللي هي بتكون حتة دقن في النص كده تحت الشفايف بس، وممكن بعض الناس بتسميها “الدبانة”، وبالرغم إن فيه ناس بتشوفها إنه فكرة قديمة سخيفة بس فيه ناس لسه بتحب تعملها.
احتمال يكون صاحب النوع ده من الدقن شخصيته مختلفة جدا وبيخاف من الالتزامات برضه لإنه بيعمل حاجة تخليه مش ملتزم بشكل معين ولا قواعد معينة، وبيكون شخص متمرد بما فيه الكفاية إنه يقدر يجازف ويسيب نفسه لشكل غير متعارف عليه.
7- الدقن الأنيقة:
تعتبر دي الدقن المثالية لوش أي راجل، ومنتشرة جدا عند أغلب الرجالة، وأغلب الرجالة اللي دقنهم كده بيكون ليهم توجهات أساسية وواضحة والشياكة بتكون عنوانه، وبشكل عام بيكون راجل هادي وشخصيته جذابة وممكن يبقى “سينجل” لإنه بيحافظ على كل حاجة فيه بعناية.
8- الدقن الخفيفة:
هي الدقن الخفيفة فوضوية في الغالب صاحبها شغله بيكون بدري أوي وبينزل بدري وبرضه بيروح متأخر، وبيرجع البيت متأخر، وغالبا بيكون معتقد إن شكله أحلى من ما هو عليه، بس هو مش مهتم أصلا ومش فارق معاه، ودي بتبقى مؤشرات لإنه شخص مش لبق ومش فارق معاه “يهندل” الناس وكمان صعب الاعتماد عليه بسبب قلة وقته.
9- الدقن بسوالف:
السوالف في الدقن حاجة موقفها غريب شوية ومش محدد هل هي قديمة ولا قديمة أوي؟ ولكن الناس اللي بتسب سوالفها بتعمل المظهر ده بثقة مطلقة، وفي الغالب هما لسه عايشين في حياة السبعينيات أو بيعيشوا لسه دور الشباب اللي في المدرسة الثانوي أو في الجامعة في السبعينيات برضه.
