اعرف شخصيتك من نوع المسلسلات اللي بتتابعها

دايما بنسمع جملة أصل الشخص ده رومانسي عشان كده بيحب الأفلام الرومانسية والشخص ده غامض فتلاقيه بيحب يشوف مسلسلات فيها plot twists وحاجات مش مفهومة.. فهل فعلا شخصيتنا بتقول حاجة عن الحاجات اللي بنحب نتابعها؟.. عشان كده في الموضوع ده هنقولك شخصيتك وفقا لنوع المسلسلات والأفلام اللي بتفضلها وفقا لموقع dailymail وtv-bee

-محبي الإثارة والتشويق:
علماء النفس بيقولوا إن الأشخاص اللي بيحبوا يتفرجوا على أفلام ومسلسلات الإثارة غالبا بيبقوا أشخاص اجتماعيين ومنفتحين على العالم حواليهم وبيحبوا المغامرة

-محبي المسلسلات الطويلة:
ومحبين المسلسلات المستمرة لفترات طويلة وليها أجزاء كتير غالبا أشخاص بيحبوا الروتين ومابيحبوش يغيروا وغالبا هما الأشخاص الأسعد من غيرهم لأنهم بيحبوا علاقاتهم تكون قوية مع اللي حواليهم

-محبي الجريمة:
غالبا بيحاولوا يهربوا من حياتهم اللي فيها قلق وتوتر من خلالها وبيخليهم يتحرروا من الضغوطات اللي عندهم لما الجريمة بتتحل.. وكمان بيكونوا أشخاص عندهم قدرة على التركيز في التفاصيل واالتنبؤ بيها

-محبي الأعمال الوثائقية:
بيكونوا أشخاص عندهم رغبة في المعرفة واستكشاف حاجات جديدة بشكل عميق وبيكونوا أكتر الأشخاص اللي عندهم قدرة على الاسترخاء وشخصيتهم مريحة وعندهم قدرة كبيرة من الوعي والانفتاح

-محبي الكوميديا:
لو كنت بتحب المسلسلات الكوميدي الخفيفة فأنت تعتبر  شخص غير تقليدي ومفكر وكمان منفتح .. وعندك قدرات فنية وفكرية مختلفة وغالبا بتكون شخص بيحب ياخد الريسك

-محبي الخيال العلمي:
غالبا شخصيتك متمردة على الواقع ومش راضية عنها وبتسعى تغير ده من خلال مشاهدة عوالم مختلفة فيها غالبا أحداث فيها دمار للعالم وتغيير فيه

محبي الرعب:
لو بتحب الأعمال الرعب يبقى أنت غالبا شخص بتحب تستمتع بالخوف واندفاع الأدرينالين اللي بيسببهولك بيخليك حاسس بحماس وإثارة

محبي الكارتون:
لو لسه بتحب تشوف الكارتون وأفلام الأنيميشن غالبا أنت شخص مبدع ومنفتح على الحاجات المختلفة ولسه مافقدتش الحث طفولي اللي جواك ودي حاجة حلوة ليك

لو عجبك الموضوع قولنا في كومنت شخصيتك طلعت مين فيهم ؟