اعرف شخصيتك من يوم ميلادك في أيام الأسبوع 

أوقات كتير بنبقى عايز اللي يحللك شخصيتك من غير ما تتعب وتعبر عنها ولا توصفها وده اللي عمله موقع “jagranjosh” في أحد مقالاته لما وصف شخصية كل واحد على حسب يوم ميلاده في أيام الأسبوع وقال إن ده بيفرق في شخصياتنا

1- لو مولود يوم الجمعة:

فأنت شخص حيوي وإيجابي ومبهج ومفيد وغالبا بتتحمس للسفر واكتشاف الأماكن الجديدة، وممكن تبقى شخص طموح جدا لكن مابتعرفش تحكم كويس، وبتقدركمان تتفاعل مع الأنشطة المختلفة زي الحفلات والشوبينج وغالبا ما بتكون نشيط جدا، ممكن كمان تبقى شخص بتحب الجمال والرومانسية والحاجات الغالية فده بيخليك شخص مادي شوية ومابتحبش تتشغل أوي عشان تحافظ على نمط حياتك أو بتحب الشغل اللي بيخليك تستمتع بحياتك الشخصية بس.

2- لو مولود يوم السبت:

فغالبًأ أنت شخص صارم وعاقل وواخد الحياة جد ومجتهد، وممكن كمان تبقى مابتحبش الكلام كتير بس بتتكلم لو كان عندك حاجة معقولة تضيفها للكلام، وبرضه أنت احتمال تبقى شخص تستنى أصغر التفاصيل، ولما بتكبر بتلاقي نفسك شخص متواضع وحكيم وعملي، وغالبًا هتبقى بتحب تسيطر وتبقى مسؤول وناضج، وممكن كمان تبقى شخص بتحب تلتزم بواجباتك وخجول شوية وبتفضل تبقى ورا الكواليس وماتظهرش كتير.

3- لو مولود يوم الأحد:

فغالبًأ أنت شخص كريم وذكي وواثق في نفسك جدا وعندك شخصية جذابة جدا، وغالبًا ما بتكون جرئ ومتفائل وعندك مهارات كويسة في التواصل مع الناس ولبق في الكلام، وبرضه ممكن تبقى شخص عنده أفكار مبدعة ومختلفة وبتميل إنك تظهر وسط الناس وغالبا بتبقى ملفت للنظر بسبب شخصيتك، وممكن برضه يبقى عندك شخصيتين الشخصية اللي بتنطلق أوي في الحياة الاجتماعية والخروج والشخصية المجتهدة جدا على المستوى المهني.

4- لو مولود يوم الاتنين:

تقريبًا كده أنت شخص متواضع ومسالم وطيب ولطيف واحتمال تبقى حساس وبتحب تاخد وقتك في القرارات، واحتمال كمان يبقى شكلك حلو وجذاب وبتحب تبقى غامض في مشاعرك، وممكن كمان تبقى شخص مزاجي وعاطفي وبتحب تقعد في البيت أكتر وسط أهلك خصوصًأ مامتك وبتحب تحس بالأمان في العلاقات، وبتحاول تحمي أسرتك على قد ما تقدر وبتقدر المشاعر عمومًا، واحتمال تواجه عدم الاستقرار العاطفي أو الانفعالات في أوقات غريبة.

5- لو مولود يوم التلات:

فده معناه إنك احتمال تبقي شخص ملتزم ومنفتح وصادق وقوي، وشخصيتك كلها طاقة وعندك كاريزما، وبتحب تقول الحاجات زي ما هي، وفي الغالب برضه أنت شخص شجاع وصبور، وغالبًأ ما بيكون عندك قوة خيالية في التأثير على الناس برأيك، وغالبًأ أنت شخص مادي بس بتحب تفكر قبل ما تتكلم واحتمال تبقى ماتبحبش حد ينتقدك وبتحب تجادل في بعض الأوقات.

6- لو مولود يوم الأربع:

فده معناه إن عندك مهارات تواصل استثنائية واحتمال تبقى شخص بتعرف تحقق أهدافك وبتحب تدور دايما على تجارب ومغامرات جديدة وده عشان بتحس بالملل بسهولة، وغالبًا برضه بتعرف تبقى بتعمل حاجات كتير في وقت واحد “Multitasker” يعني، وممكن برضه تبقى شخص مابيخافش من الفشل أو المخاطرة وبتحب تنعزل في أوقات كتير عشان تشحن نفسك.

7- لو مولود يوم الخميس:

فده معناه إنك شخص واقعي وعملي ومثالي ومبهج وعندك طاقة كبيرة من الانبساط والحنان والإنسانية، وغالبًا مابتحبش يبقى حواليك طاقة أو مشاعر سلبية وده لإنك شخص متفائل وبتحب تبص لنص الكوباية المليان، واحتمال شخصيتك تبقى مناسبة جدًأ في الأدوار القيادية والإدراية، وممكن تبقى شخص طموح وعينك بتعرف تكتشف فرص محدش شايفها وبتحب عيلتك جدا.