اعرف عن أول مسلسل تليفزيوني أتعرض فى مصر

كتبت: ندى خالد

بعد ما دورنا كتير علشان نعرف إيه هو أول مسلسل تليفزيوني طويل أتعرض فى التليفزيون المصري  لقينا وفقا لموقع  fanack وموقع اليوم السابع إن أقدم مسلسل أتعرض على التليفزيون المصري هو مسلسل “هارب من الأيام” اللي تم عرضه فى الذكرى الثامنة لإنتهاء الحكم الملكي يوم ٢٣ يوليو سنة ١٩٦٢م.

المسلسل كان من بطولة مجموعة من الفنانين الكبار فى الوقت ده زى عبد الله غيث، توفيق الدقن، مديحة سالم، حسين رياض وكمان شارك فيه النجم سعيد صالح فى بداياته الفنية.

والمسلسل كان من إخراج نور الدمرداش ومن تأليف الكاتب الكبير فيصل ندا اللي عجبته الرواية جدا وقرر يحولها لمسلسل لأن المسلسل كان مأخوذ عن قصة للأديب الكبير ثروت أباظة بنفس الاسم وقال عنها عميد الأدب طه حسين “إنها أحسن ما كتب عن القرية في الأدب العربي”

والمسلسل كان بيحكي عن المشاكل اللي بتواجه القرية المصرية وايه اللي بيحصل فيها لما يكون عمدتها شخص متسلط وبيستغل نفوذه وكانت الشخصية الرئيسية لطبال فقير عايش فى القرية وبيتعرض للتنمر والسخرية من أهل قريته وخلال المسلسل بنشوف أحوال أهل القرية و معاناتهم مع السرقة وخوفهم لأنهم مش عارفين مين اللي بيسرقهم ولكن فى النهاية بيعرفوا إن الطبال هو السبب فى كل ده.

المسلسل حقق نجاح وشهرة كبيرة وقت عرضه ويقال إن الشوارع المصرية كانت بتفضى وقت عرض المسلسل لأنهم كانوا متحمسين يعرفوا ايه اللي حصل فى الحلقة الجديدة

وقال عنه المؤلف فيصل ندا إنه عمله مشاكل سياسية كبيرة وأترفض أول اتعرض على الرقابة لأنهم اعتقدوا إنه بينتقد نظام الحكم لدرجة إنه أتقبض عليه بعد الحلقة السابعة وخرج على طول.

وبعد نجاح المسلسل اتحول لفيلم بنفس الاسم  سنة ١٩٦٥ وكان من بطولة النجم فريد شوقي اللي رفض المسلسل فى البداية لأنه خاف من تجربة المسلسلات ومن إن نجوميته فى السينما تقل لأنه كان ملك السينما فى الوقت ده.