اعرف كل نوع قهوة فيه كافيين قد إيه!

لو أنت من محبين القهوة وعشاقها فغالبا هتبقى بتشرب في اليوم كذا كوباية قهوة وهتنوع بقي بين كذا نوع ليها وبطريقة مختلفة وترجع تسأل نفسك بليل هو انا ليه مش عارف أنام؟ يمكن ده من الكافيين مثلا؟

فلو بتحبها أوي كده أكيد عارف إنك ممكن تشرب قهوة زي ما تحب الصبح وتحاول تمنعها بليل عشان تعرف تنام كويس.. بس ساعات مابتقدرش تقاوم نفسك وبتبقى عايز كوباية كمان وتفضل تقول طاب نخليها أيس كوفي، طاب خلاص قهوة فرنساوي، أو خلاص اشربها (Decaf) وتفضل تتحايل على القهوة عشان تشربها وقت ما تحب.

فلو الموضوع محير بالنسبة لك.. تعالى نقولك كل نوع من أنواع القهوة فيه نسبة كافيين قد إيه وإيه الفرق بينه وبين غيره حسب ما قال موقع “coffeeresearch” وموقع “international coffe organization”:

1-الإسبريسو: من أكتر الأنواع تركيزًا، وكوباية صغيرة (حوالي 30 مل) فيها من 63 لـ 75 مجم كافيين.. بس لو قارنت بالكوباية الكبيرة هتلاقي إن الأنواع التانية فيها كافيين أكتر عموما

2- القهوة الأمريكية (Coffee Brewed): الكوباية العادية (حوالي 240 مل) فيها 95 لـ 200 مجم كافيين، حسب النوع وطريقة التحضير

3- القهوة سريعة التحضير: بتكون أقل شوية في الكافيين، كوباية (240 مل) فيها حوالي 30 لـ 90 مجم.

4- القهوة منزوعة الكافيين أو الـ (Decaf): مش معناها بدون كافيين نهائي، كوباية (240 مل) فيها حوالي 2 لـ 5 مجم كافيين.

5- الكابتشينو (Cappuccino): بيتحضر من الإسبريسو مع اللبن.. نسبة الكافيين فيه بين 65-80 مجم في الكوباية (حوالي 180 مل)، لأن الأساس هو شوت إسبريسو واحد

6- اللاتيه (Latte): قريب جدًا من الكابتشينو، لكن اللبن فيه أكتر.. نسبة الكافيين فيه تقريبًا 63-75 مجم، حسب عدد شوتات الإسبريسو المستخدمة

7- القهوة المفلترة (Filtered Coffee): زي اللي بتتعمل بالماكينات أو الـ French Press.. كوباية كبيرة (حوالي 240 مل) ممكن يبقى فيها بين 150-200 مجم كافيين.

الماكياتو (Macchiato): أساسه شوت إسبريسو مع بوق صغير جدًا من اللبن.. نسبة الكافيين فيه بتبقى بين حوالي 63-75 مجم.

8- القهوة الباردة (Cold Brew): بتتحضر بنقع البن في مايه باردة لفترة طويلة (12-24 ساعة).. نسبة الكافيين فيها أعلى من القهوة السخنة، بيبقى حوالي 150-240 مجم في الكوباية اللي حجمها (240 مل).

9- الموكا (Mocha): هي خليط من الإسبريسو على الشوكولاتة على اللبن.. ونسبة الكافيين فيها حوالي 70-90 مجم في الكوباية.

10- القهوة التركية: ودي بقى قوية جدًا ومركزة عشان بتتحضر من غير فلترة.. فنسبة الكافيين في الفنجان الصغير (50 مل) حوالي 50-65 مجم.

فلو بتحب القهوة وبتحاول تقلل الكافيين اختار الأنواع اللي فيها لبن أكتر زي اللاتيه أو الكابتشينو، أما لو محتاج طاقة سريعة ومش فارق معاك لا كافيين ولا حاجة الإسبريسو أو القهوة الباردة اختيار مناسب أكتر ليك.

وعموما فهم نسبة الكافيين في كل نوع من أنواع القهوة مهم عشان تعرف تختار النوع اللي يناسب احتياجاتك اليومية وماتشربش القهوة كده كل شوية عمال على بطال.. بس خلينا برضه نقولك إيه الكمية اللي محتاجها جسمك من الكافيين في اليوم واختار أنت تشرب إيه حسب ما تحب:

إدارة الغذاء والدواء الأمريكية (FDA) قالت إن الكمية الآمنة للبالغين هي حوالي 400 مجم يوميًا من الكافيين.
أما موقع “Mayo Clinic” اتكلم شوية بشكل تفصيلي عن نسبة الكافيين وقال إنها بعتمد على سنك، ووزنك، وحالتك الصحية.. بس بشكل عام أكد إن الشخص الطبيعي يقدر يشرب لحد 400 مجم كافيين يوميًا، يعني:
1- حوالي 4 فناجين قهوة مفلترة (زي اللي بنعملها في البيت).
2- أو 3 كوبايات قهوة باردة أو كابتشينو

وبالنسبة للناس اللي محتاجة تقلل الكافيين هم:
1- الستات الحوامل: المفروض مايشربوش أكتر من 200 مجم كافيين في اليوم (يعني فنجانين قهوة بالكثير)
2- المراهقين: الكمية المسموحة ليهم حوالي 100 مجم يوميًا (فنجان صغير قهوة أو كوباية شاي)
3- الأطفال: الكافيين مش مستحب ليهم خالص

وأخيرًا لو زوت نسبة الكافيين عن 600 مجم في اليوم ممكن تحس بأعراض زي الأرق، وضربات القلب السريعة، والصداع، أو حتى توتر زيادة وكمان لو عندك مشاكل زي الضغط العالي أو القلب، حاول تقلل الكافيين قدر الإمكان.