اعرف ليه بيحصل الزلزال؟ ليه مناطق بتتأثر بيه أكتر من التانية؟

صحينا النهاردة على كارثة سببها زلزال قوته 7.7 ريختر ضرب منطقة كهرمان مرعش في تركيا وأثر على سوريا ولبنان وحسينا بيه في مصر  في ساعات الفجر ونتج عنه ضحايا كتير جدا لقوا مصرعهم حوالي 900 شخص في تركيا و600 شخص في سوريا وعدد المصابين بالآلاف ومازالت الأعداد في زيادة وبيطلعوا من تحت الأنقاض.. ده غير العقارات والأماكن الأثرية اللي اتعرضت للدمار نتيجة الزلزال.

وده يخلينا نسأل نفسنا إيه أسباب حدوث الزلزال؟ حسب مقال في موقع infocuriosity.com
1- الحركات التكتونية: ببساطة كده الزلزال بيحصل لما تتكسر صخور تحت القشرة الأرضية وبعدين الصخور دي بتتدافع وتتراكم وتضغط على بعضها ونتيجة الضغط ده بتتكسر الصفائح والصخور دي وتتحرك بشكل مفاجئ وبينتج عنها موجات اهتزازية وبالتالي بنحس بالهزة والزلزال.

2- البراكين: بتولد طاقة كبيرة جدا تحت وبيتقلص حجم الغاز بين الصخور وبيضغط على القشرة الأرضية وبيعمل موجات اهتزازية.

3- بسبب الإنسان: الانفجارات اللي بتحصل بهدف تكسير الصخور وشق الطرق وفتح الأنفاق وبناء السكك الحديدية أو تفجير الألغام، لكن ده بيولد هزة خفيفة في محيط المكان وكمان الرؤوس النووية اللي ممكن تعمل تغيير كامل في شكل صخور القشرة الأرضية عشان كده هي محرم استخدامها.

ونسأل نفسنا كمان هل فيه أماكن بتتأثر  بالزلزال أكتر من التانية؟

• الموجات الاهتزازية بتنتشر في القشرة الأرضية وبتأثر على الأماكن القريبة من بؤرة الزلزال والنطاق المحيط اسمه حزام الزلزال زي ماحصل في سوريا النهاردة اللي اتأثرت بشكل كبير عكس لبنان ومصر حسينا بهزة أخف وماحصلش أي خساير  وده يفسر برضه احساس سكان اسكندرية بالزلزال لقربهم من البحر المتوسط أكتر من سكان القاهرة الكبرى .. وأكد الدكتور شريف الهادي رئيس قسم الزلازل في المعهد القومي للبحوث الفلكية والجيوفيزيقية في تصريحات للمصري اليوم وصدى البلد إن مصر مش هتدخل حزام الزلزال.

• ومن كام يوم الباحث الهولندي Frank Hoogerbeets تنبأ بحدوث زلزال في تركيا ولبنان وسوريا والأردن، وده يودينا لنقطة إن فيه أماكن موجودة دايمًا في حزام الزلزال وبالتالي دي مناطق نشطة وعندها فرصة أكبر لحدوث زلزال لأن الصفائح والصخور في القشرة الأرضية متقاربة زي ما شرحنا وهي منطقة البحر المتوسط وجبال الهيمالايا والمناطق القريبة من المحيط الهادي.

• وبحسب المعهد القومي للبحوث الفلكية بالنسبة لمصر الأماكن المعرضة للزلزال أكتر من غيرها هي منطقة البحر الأحمر  وخليج العقبة زي شرم الشيخ  والمحافظات القريبة من البحر المتوسط زي اسكندرية وبتقل تدريجيًا في إتجاه الجنوب.

في النهاية تعازينا للضحايا وتمنياتنا للمصابين بالشفاء العاجل…