اكتشاف جديد في الفضاء واحتمال وجود حياة على كوكب تاني

يوم الخميس 17-4-2025 طلع رئيس فريق بحثي من جامعة كامبريدج ..وقال إنهم اكتشفوا باستخدام تليسكوب وجود غازات بتنتجها كائنات حية في الغلاف الجوي لكوكب k2-18b 

كوكب k2-18b هو كوكب سطحه مغطى بمحيط مائي وبيحيطه غلاف جوي غني بالهيدروجين وكتلته أكبر من كتلة الأرض بـ 8.6 مرة وبيبعد عن الأرض حوالي 120 سنة ضوئية

باستخدام التلسكوب المتطور “جيمس ويب” قدروا يشوفوا مركبات كيميائية للغلاف الجوي للكوكب منها:
– الميثان (CH₄) وثاني أكسيد الكربون (CO₂) والنسبة اللي شافوها بتقول إن فيه تفاعلات كيميائية ناتجة عن عمليات جيولوجية أو بيولوجية

– ثنائي ميثيل الكبريت (DMS) وثنائي ميثيل ثاني الكبريتيد (DMDS): ودول اللي بينتجهم على كوكب الأرض بشكل رئيسي مصدرين، الكائنات البحرية الدقيقة زي العوالق البحرية والبكتيريا

العلماء قدروا يشوفوا المركبات دي باستخدام تقنية التحليل الطيفي في النطاق المتوسط للأشعة تحت الحمراء وده اللي خلاهم يقدروا يحددوا تركيبها الكيميائي بدقة

اكتشافهم للمركبات الكيميائية دي خلاهم يقولوا إن ده دليل على وجود حياة على الكوكب.. بس المشكلة هنا إنهم متأكدين بنسبة (99.7%) بس.. ودي نسبة ماتقدرش تأكد وجود حياة لأن النسبة المطلوبة علميًا هي (5 سيجما) أو (99.99994%)

رغم إن مركب الـ DMS يعتبر دليل قوي في كوكب الأرض على وجود مصدر بيولوجي بينتجه.. بس بعض الدراسات اكتشفت إنه ممكن يتوجد بدون مصادر بيولوجية زي العمليات الكيميائية في المذنبات.. عشان كده العلماء المستقلين بيقولوا إن دي مش أدلة كافية ولسه بدري عشان نقول إن في حياة على الكوكب

وعشان كده الفريق قال إن الخطوات الجاية هيتم ملاحظ الكوكب باستخدام تليسكوب جيمس ويب على مدار السنتين الجايين وهيقارنوا النتايج بتاعة كوكب K2-18b مع كواكب تانية زيه ويحللوها بشكل فيزيائي وكيميائي أعمق

والاكتشاف ده يعتبر خطوة مهمة للاستاذ مدحت صالح وجميع الباحثين عن حياة في كوكب تاني