الحقيقة ورا يوم الـ “No Bra Day”.. وإزاي الناس بتحتفل بيه
كل سنة فيه مئات الآلاف من الستات اللي بيعانوا من سرطان الثدي، ويمكن بسبب الكشف الدوري والمتابعة فيه عدد كبير من الناجيات من سرطان الثدي قدروا يعيشوا ويكملوا حياتهم بعد الشفاء منه، ولدعم ومساعدة كل ست حربت أو بتحارب سرطان الثدي فالعالم يوم 13 أكتوبر بيحتفل بيوم الـ “No Bra Day” أو “يوم لا للبرا”.
الهدف الأساسي من الاحتفال بـ “No Bra Day” مش زي ما السوشيال ميديا صورت للناس بطريقة جنسية بسبب نشر الستات صورها من غير “برا”، ولكن هو يوم توعية بسرطان الثدي والتحديات والصعوبات اللي الستات اللي بيعانوا من سرطان الثدي بتقابلها، ونشر الوعي بالخطوات والاجراءات اللي كل ست المفروض تعملها للوقاية منه، ده غير دعم وتكريم الناجيات منه.
كان الاحتفال بـ”No Bra Day” بيبقى كل سنة في 9 يوليو لحد سنة 2011 وبعد كده بقى يتم الاحتفال بيه في 13 أكتوبر عشان يبقى في الشهر المحلي للتوعية بمخاطر سرطان الثدي، ولكن الحدث الأصلي اللي اسمه “No Bra” بدأ على ايد دكتور كندي جراح اسمه ” ميتشل براون” كان بيفكر إزاي ممكن يشجع الناجيات من سرطان الثدي على الجراحة الترميمية، وعمل يوم اسمه “Breast Reconstruction Awareness” واختصاره “BRA” في مستشفى “تورنتو العام”
وهدف اليوم ده هو زيادة الوعي بفحص الثدي وتنبيه الستات بأعراض سرطان الثدي وتشجعهم على إجراء فحوصات ذاتية منتظمة، وبعدها الحدث ده تم تبنيه من أمريكا واليوم بقى يوم عالمي اسمه “No Bra Day” وبقى يوم 13 أكتوبر بداية من سنة 2012.
وبعيداً عن التعب المميت اللي بيحس بيه الستات اللي عانوا من سرطان الثدي، فهو كمان بيأثر على صورتها قدام نفسها وعلى نفسيتها خصوصا لو وصلت لمرحلة متأخرة واضطرت تستأصل ثديها، لإنه بيمنعها من حاجات كتير زي الرضاعة الطبيعية مثلا أو بيخليها تحس إنها مش في صورة المرأة الطبيعية وده بيخليها تواجه مشاكل تانية زي ثقتها في نفسها وتقديرها لنفسها والاكتئاب.
ولإن الستات اللي استأصلوا ثديهم بيضطروا لتركيب طرف صناعي عشان يخفوا أثر العملية، فدايما بيضطروا يلبسوا “برا” ومايقدروش يقعدوا أو يخرجوا من غيره، فمن ضمن الأسباب اللي بتخلي الناس يحتفلوا بالـ “No Bra Day” هو زيادة الوعي ومنع باقي الستات من إنهم يخوضوا التجربة دي.
الناس بتحتفل باليوم ده عن طريق تفعيل هاشتاج #NoBraDay والهاشتاج ده بيتيح الفرصة للناجيات من سرطان الثدي إنهم يحكوا قصتهم معاه وإزاي تعافوا منه وبيديهم الفرصة إنهم ينشروا صور لعمليات استئصال ثديهم، وبيخليهم يشجعوا الناس على الكشف الدوري والاختبارات والتبرع لمؤسسات أبحاث سرطان الثدي.
وطبعا من ضمن الطرق اللي ممكن يستخدمها الشخص في التوعية باليوم على السوشيال ميديا هي مشاركة أرقام ومعلومات عن مرض سرطان الثدي، وبعيد عن السوشيال ميديا ممكن يتم الاحتفال عن طريق الكشف أو تحديد ميعاد لفحص الثدي وتشجيع الأهل والصحاب على الفحص لإن اكتشاف سرطان الثدي مش حاجة صعبة وكل ما تم اكتشافه بدري أكتر كل ما كان الخروج والعلاج منه أسهل وهيبقى من غير أي مضاعفات.
