الحل السحري لتجنب الخناقات العائلية وقت الإجازات الرسمية

الأيام دي إحنا في إجازة عيد وطبعًا معروف إن ده الوقت السنوي
للتجمعات العائلية وصلة الرحم والخناقات والحروب الداخلية بينكوا في نفس الوقت.. وبما إننا عارفين إن في ناس كتير بتقضي الوقت مع عيلتها في البيت أو بتسافر معاهم في الوقت ده فجبنالكم الحل السحري لتجنب أي صدامات معاهم ورفع شعار N كابيتال O كابيتال NO للخناقات العائلية وفقًا لموقع verywellmind وموقع self..

1- خلي عندك توقعات منطقية:
لو كل سنة متعود إنك تتخانق مع عيلتك ماتتوقعش إن السنة دي هتبقوا عصافير وهتقضي الإجازة بتستجم ومفيش حاجة هتحصل فالأحسن تفتكر كنتوا بتتخانقوا على إيه وتحاول تتجنبه السنة دي وطبعًا مش هتعرف تتجنب كل حاجة فخليك عاطف في نفسك.

2-اعمل نفسك فيك اللي مكفيك لو حسيت إنهم عايزين رأيك:
عادة القعدة مع الأهل متخلاش من المواضيع الحساسة فلو حسيت إنهم دخلوك في الموضوع والدنيا ابتدت تقلب دراما تجنبهم واعمل نفسك متأثر بالكلام ومش قادر تتكلم.

3-حاول تغير الموضوع بذكاء:
حاول على قد ما تقدر تحط حدود لنفسك لو لقيتهم مصّرين على فتح مواضيع عارف إنها بتجيب حوارات عرفهم بشكل فيه ذوق واحترام إن في مواضيع معينة مابتحبش تتكلم عنها أو تشارك فيها أو لو مش هتقدر تعمل ده غير الموضوع وشتتهم بذكاء لحاجة تانية.

4-حاول تتمرن على إنك تهدي نفسك:
لما تلاقي الوضع خرج عن السيطرة حاول تتنفس كويس بهدوء وتفكر نفسك إنك مش هتقدر تغير عيلتك بس اللي تقدر تعمله إنك تتحكم في ردود أفعالك وتخليك واعي إن ده مشكلة بسيطة وهتتحل.

5- فكر نفسك بالهدف الحقيقي من الإجازة:
أوقات الخناقات والضغوطات بتخلينا ننسى إننا بنقضي وقت مع ناس بنحبها وبقالنا كتير مشغولين عن بعض فكل ماتحس إنك هتتعصب افتكر إنك مش هتضيع الإجازة في النكد وتبص للجانب الإيجابي زي اللمة وحب العيلة.

6-حاول تنسحب في الوقت المناسب:
أهم وآخر حاجة كده كده أي تجمع عائلي لازم هيكون فيه تعليقات مش هتحبها أو أسئلة مش هتعجبك فممكن تتمرن على إنك تنسحب في الوقت اللي هتبدأ فيه شعلة المعركة زي إنك تستأذن وتروح الحمام أو تجيلك مكالمة مهمة من ناسا وترجع بعد ما يكونوا اتسحلوا في حوار تاني وبكده نبقى قللنا أكبر قدر من الخساير.