الخوف من الخسارة بيخسرك أكتر
هل عصفور في اليد خير من ألف على شجرة فعلًا؟ أو خليني أسألك..
تفتكر انت ممكن تقبل خسارة حاجة مضمونة في إيدك, عشان
مكسب محتمل يكون مساوي للخسارة اللي هتخسرها؟
لو اجابتك لأ.. خليك واثق إن ده منطقي وطبيعي جدًا.. هي دي آلية إتخاذ القرارات عند الإنسان في العادي.. إنه هيميل يتجنب الخسارة لو المكسب اللي هيجيله على الأقل هو ضعف الخسارة اللي هيخسرها
ودي النظرية اللي طورها علماء النفس “آموس تفيرسكي” و “دانيال كانيمان” سنة “1979” وعملوا منها نموذج سموه “نظرية الاحتمالات”
واستنتجوا منه إن الإنسان مش هيعمل أي مخاطرة إلا لما يحسب قيمة الخسارة قبل ما يحسب قيمة المكسب.. وده اللي بيتسمى بالـ “Loss Aversion“
في مقالة اتنشرت على موقع “Psychological Today” اتكلم فيها الدكتور “Shahram Heshmat” عن تجنب الخسارة وضرب المثل بالسلوك الشرائي للمستهلكين.. إن الناس بتميل إنها تشتري أكتر لما الأسعار تزيد مش لما ترخص.. وده لإنهم بيحسوا إنهم ممكن يخسروا أكتر لو الحاجة غليت أكتر بعدين..
كمان بيظهر مبدأ تجنب الخسارة ده في حاجات أبسط من كده.. زي إنك تستغنى عن كراكيب عندك في البيت.. أو تبيع حاجة ممكن ماتكونش محتاجها أوي.. أو حتى حاجة ضاعت منك وانت أصلًا كنت ناسيها.. ده هيحسسك بألم نفسي.. وعشان تتجنب الألم ده بتفضل واقف خايف تاخد قرارات كتير
وهنا بتظهر المشكلة الحقيقية.. حسب مقالة اتنشرت على موقع “The Decision Lab” إن الخوف أو الحرص على عدم الخسارة بيأثر على قرارتك في الحياة.. وبالتالي بتميل إنك تاخد قرارت متحفظة واللي بدورها بتضيع عليك مكاسب محتملة ممكن تكون أكبر بكتير من اللي حافظت عليها
طب الحل إيه؟
رغم إن الحرص مش غلط ومش عيب.. بس زي ما شوفنا زيادته ممكن يعمل إيه.. في حاجات بيقترحها علماء النفس تساعدك تغير من سلوكيات تفكيرك في المكسب والخسارة..
أول حاجة منهم الكلام اللي انت بتقوله لنفسك وانت بتفكر.. لو كلامك كله فيه كلمة خسارة كتير هتلاقي دماغك بشكل تلقائي بتزود التفكير في اتجاه القرار اللي يجنبك الخسارة.. عكس ما تبدأ تقول لنفسك كلام محفز عن ايجابيات القرار اللي انت هتاخده والمكاسب اللي ممكن تكسبها..
تاني حاجة إنك تحط الخسارة في مكانها الصح.. فكر بطريقة إيه أكتر حاجة ممكن نخسرها يعني؟.. لو فكرت كده وحسبت الخساير بشكل منطقي بدون مبالغة في المشاعر اللي ممكن تحسها حتى لو خسرت.. هتلاقي الموضوع بقى أسهل..
وفي النهاية هي رحلة.. هنخسر ساعات ونكسب ساعات ومفيش حاجة هتدوم.. فماتكبرش الموضوع وحاول تتبسط أكتر من كده.
