السر وراء أسطورة زوجة الأب الشريرة

من واحنا صغيرين واحنا اتربينا على فكرة بنشوفها في الأفلام والمسلسلات إن زوجة الأب لازم تكون شريرة وعايزة تأذي الطفل طالما مش ابنها الحقيقي وده خلى في العالم كله مش بس مصر صورة نمطية عن إن كل زوجات الأب أشخاص شريرة والناس كلها بتبصلهم بنظرة عدائية من غير ما يعرفوا عنهم حاجة ولا حتى يعرفوهم شخصيا
عشان كده في الموضوع ده هنتكلم عن بداية أسطورة زوجة الأب الشريرة وفقا لموقع BBC وموقع GivenGuidance

من بداية ما وعينا على الدنيا وشوفنا الكارتون المشهور سنو وايت واحنا بنشوف فيه قد إيه زوجة الأب شريرة.. لا كمان ساحرة ومؤذية ونفسها تنتقم من الأميرة بأي طريقة.. وبعدها كبرنا شوية وشوفنا سندريلا وهي بتتعامل معاملة سيئة من زوجة أبوها وكمان بتفضّل بناتها التانيين عليها وبتخليها هي تعمل كل حاجة وكمان بتخلي بناتها يعاملوها بتمييز وتجنب.. ومش بس الفيلمين دول.. لا في أفلام كتيرة ومختلفة بتعرض نفس الفكرة فتخيل من وأنت طفل ولسه بتبدأ حياتك الفكرة دي متأصلة في
دماغك.. طبيعي تكبر بيها غصب عنك ويبقى صعب تغيرها..

وكمان مش بالنسبة للعرب بس.. موقع BBC بيقول إن حتى اللغة فيها تحيز لزوجات الأب لأن كلمة Stepmother مكونة من كلمة “Step” اللي اتطورت من كلمة “Steop” وهى كلمة إنجليزية قديمة بتصور الشعور بالخسارة والحرمان.. وبالعامية في اللغة الإنجليزية وصف أي حاجة بإنها “ابن الزوجة” مجازا لإننا نوصف الشيء ده بالدونية..

وبتقول الدكتورة النفسية “ليزا دودسون” إن الباحثين اطلقوا اسم “تأثير سندريلا” كـ إسم لحالات إساءة معاملة للأطفال من زوج الأم.. والدراسات قالت إن عدد الأزواج اللي بيسيئوا معاملة الأطفال أكبر بكتير من نسبة زوجات الأب..

وبيقول “تود جنسن” أستاذ مساعد وباحث في جامعة نورث كارولينا بالولايات المتحدة واللي بيدرس أنماط العلاقات بين أزواج الأم وأبناء زوجاتهم إن “زوجات الأب الشريرات لا يظهرن في البيانات” وفي استطلاع اتعمل سنة 2021 شمل 295 من أبناء الزوج لقوا أن معظمهم علاقاتهم إيجابية مع زوجات أبيهم.. ولما اتسألوا المشاركون عن مدى قربهم منهم ومدى اهتمامهم بيهم كانت جودة علاقتهم حوالي 3.91 من 5.

ودراسات تانية كتير بتثبت خطأ أسطورة زوجة الأب الشريرة.. بس عمرك سألت نفسك زوجة الأب نفسها بتحس بإيه بسبب القالب اللي محطوطة فيه؟

الدراسات النفسية بتقول إن الصورة النمطية  لزوجة الأب بتخليها تحس بضغوط كبيرة ممكن توصل معاها لقلق واكتئاب وده مش هيأثر عليها لوحدها كمان هيأثر على ولادها وعلاقاتها معاهم وباقي أفراد الأسرة ممكن تبوظ خالص ويبقوا معزولين عن بعضهم بسبب التعليقات السلبية اللي بيسمعهوها..

يمكن اللي محتاجين نعمله كجيل جديد طالع بفكر جديد وعنده فرص أكبر يغير المفاهيم الغلط في المجتمع إننا ننفي الفكرة دي ونطلع أجيال بيرفضوها لأن زوجة الأب شخص زي أي شخص.. وارد يبقى شخص طيب وبيحب ولاده أو أولاد زوجه وبيحاول يعاملهم بطريقة أحسن من الأم البيولوجية.. وأكيد بنشوف نماذج زي دي كتير حوالينا وبنبقى فرحانين بيهم قد إيه بيعاملوهم أحسن من الأمهات البيولوجية ولو حتى شوفنا نماذج سلبية فعلا ده مش معناه إننا نحط حكم مطلق على زوجات الأب كلها إنهم أشرار.. كفاية نحط الحاجات في سياقها العادي ونبطل نحكم من برا لأن كلنا بشر وفينا الحلو والوحش حتى الأبهات والأمهات البيولوجيين ممكن يسببوا مشاكل لأولادهم من غير مايحسوا وبسببهم يتعالجوا بعدها سنين.