السر ورا “شايل طاجن ستك ليه؟”
أحيانًا بييجي علينا وقت بنكون مسهمين.. نخرج مع ناس بيتكلموا وبيهزروا وإحنا قاعدين ساكتين.. نبقى قاعدين مع أهلنا متنحين في السقف.. ونقول الحمد لله كويسين واحنا عينينا مليانة دموع.. وعشان شكلنا مش باين عليه إننا كويسين خالص بيتكرر سؤال مالك شايل طاجن ستك ليه؟
وطاجن ستك ده يطلع إيه؟
ده التراكمات النفسية اللي متحوشة جواك اللي ماعرفتش تتخلص منها وناتجة عن مشاكل أثناء طفولتك أو تجارب سيئة مريت بيها وبتحوش جواك مشاعر زي: حزن، غضب، خوف، إحباط.. أو تفكير زيادة في موضوع شاغل بالك
طب ونعرف منين إن عندنا تراكمات؟
الشخص اللي شايل طاجن سته بيتعرف من خلال العلامات دي:
- الشعور بالإجهاد معظم الوقت حتى لو مافيش السبب
- الشعور بالضيق لو حد سألك عن عامل إيه
- الشعور بالانزعاج وعدم الراحة لو حد اتكلم معاك عن مشاعره أو مشاكله
- الميل إلى النسيان
- تفضيل لحظات الهدوء معظم الوقت على أي شيء مزعج
- مواكبة المواقف بدل ما نعبر عن اللي محتاجينه
والتراكمات بتأثر علينا إزاي؟
حسب موقع هيلث لاين فالتراكمات والمشاعر المكبوتة بتأثر علينا كالتالي:
- الصحة الجسدية: فيه علاقة قوية بين التراكمات المشاعر المكبوتة وانخفاض المناعة وده بيخلينا عرضة للأمراض وحظنا أقل في الشفاء منها.. ده غير إننا بنعاني من اضطرابات زي: توتر وألم العضلات ومشاكل الجهاز الهضمي وتغيرات الشهية والغثيان ومشاكل النوم.
- الصحة النفسية: الشعور بالتوتر أو الاكتئاب وعدم الرضا عن النفس والحياة
- السلوك: تراكم المشاعر ممكن يخلينا ننفجر على أتفه الأسباب.. هيخلينا مانحطش نفسنا أولوية.. ونفضل مشاعر واهتمامات اللي حوالينا عننا.. هيفقدنا القدرة على تكوين علاقات صحية مع الناس.. وهيأثر على فهمنا وتقديرنا لمشاعر اللي حوالينا.. وهيقلل تشجيعنا لنفسنا ونزود في اللوم عليها
وإزاي نتخلص من التراكمات دي؟
- نعرف جذور المشكلة: وده هيحصل لما نواجه مشاكل وأزمات في حياتنا ونفهم أثرت علينا إزاي.. وندي مساحة لمشاعرنا وقتها خايفين نعترف بخوفنا.. زعلانين نعترف بزعلنا..نواجه مانهربش.. وهيساعدنا على ده إننا نكتب ونفرغ مشاعرنا كل يوم ونحاول نعالج الموضوع جوانا بدل مانسيبه ينهش في روحنا.
- تغيير نمط الحياة: يعني نمارس رياضة بنحبها نفرغ فيها طاقتنا ومشاعرنا المكبوتة.. نقرب للناس اللي بنحبهم ونرتاح معاهم عشان هيساعدونا نقضي وقت لطيف بعيد عن أي ضغوط زيادة.. أو نجرب حاجات جديدة تساعدنا في تجديد الطاقة.
- التسامح: سواء مع الذات ونهونا على نفسنا ومانقسوش على نفسنا في حاجات مالناش ذنب فيها.. أو ننعتذر للناس اللي أذيناهم بشكل أو بآخر.. كده ده هيقلل من ثقل التراكمات وهنحس إننا بقينا أحسن وأخف.
- طلب المساعدة: وده في حالة الحلول اللي فوق دي مانفعتش مش عيب نلجأ لإخصائي يساعدنا إننا نخرج كل التراكمات اللي جوانا.
