السعرات الحرارية في أكل العيد والنشاط اللازم عشان تحرقه

الكحك والبسكوت والبتيفور والغريبة وأنواع تانية كتير منهم اللي بالشوكولاتة واللي بالملبن واللي بالعجوة والكوكيز طقس أساسي من طقوس العيد مع كوباية شاي سادة أو كوباية شاي بلبن الصبح ومفيش مشاكل لو حلينا بيهم بعد الغدا كمان اللي هو بعد الرنجة أو الكشري.

وعلى قد ما طعمهم بيبقى حلو واللمة الحلوة في الأعياد بتأكل كويس لكن ده مايمنعش إنك محتاج تعرف أنت بتاكل ايه في يومك وكمية السعرات اللي بتدخلها لجسمك في يوم واحد

وزارة الصحة المصرية نشرت بوست على فيسبوك عرفتنا فيه السعرات الحرارية في كل قطعة من حلويات العيد وهما:

 القطعة الواحدة من الكحك فيها  200 سعرة حرارية

 الكحك اللي بالتمر 200 سعرة حرارية

 الغربية 150 سعرة حرارية

 البيتى فور أو البسكويت 60 سعرة حرارية

وعشان تحرق الـ 200 سعر اللي في كحكة واحدة قدامك 3 طرق: 

1- تمشي لمدة ساعتين

2- تمارس رياضة لمدة ساعتين

3- تنزل السلم وتطلعه 4 مرات 

أما عشان تحرق 150 سعر حراري في الغريبة الواحدة فقدامك برضه 3 طرق:

1- تركب عجلة لمدة نص ساعة 

2- تعوم لمدة 19 دقيقة 

3- المشي لمدة 24 دقيقة 

أما بقى عشان تحرق بسكوتة أو بيتفوراية فقدامك طريقتين:

1- تجري على المشاية بسرعة 6 ميل لمدة 5 دقايق 

2- تعمل تمارين رياضية لمدة 5 دقايق 

ده كان بالنسبة للكحك والبسكوت والغريبة والحلويات أما بالنسبة لوجبات أول يوم العيد في الغدا مثلا فزي الرنجة والفسيخ والكشري فتعالى برضه نقولك السعرات الحرارية في كل حاجة فيهم قد إيه:

الـ 28 جرام من الرنجة على 82 سعر حراري

الـ 100 جرام من الفسيخ فيهم  139 سعر حراري

أما الكشري فالطبق الصغير فيه 200 سعر حراري والطبق المتوسط فيه من 300-500 سعر حراري والطبق الكبير فيه حوالي 1000 سعر حراري 

وعشان تحرق الكلام ده بقى تعالى نقولك محتاج نشاط قد إيه: 

الـ 28 جرام رنجة فيه 3 طرق عشان تحرقهم:

1- مشي لمدة 22 دقيقة 

2- 8 دقايق جري 

3- 11 دقيقة ركوب عجلة 

الـ 100 جرام فسيخ فيه 3 طرق برضه عشان تحرقهم:

1- تطلع وتنزل السلم لمدة 3 دقايق 

2- ترقص لمدة نص ساعة 

3- تنط الحبل 7 دقايق 

وعشان تحرق طبق صغير من الكشري قدامك برضه 3 طريق وهما:

1- تنط الحبل من 10 لـ 15 دقيقة 

2- تنزل وتطلع السلم لمدة نص ساعة 

3- تلعب تنس لمدة 25 دقيقة