الصحاب بالعدد.. اعرف إيه هي نظرية “الرقم السحري” اللي بيحدد عدد لعلاقاتك!
طول ما انت ماشي في الدنيا هتعرف ناس كتير فيه منهم اللي هتلاقي بينكم كيمياء وبيبقوا عيلتك التانية وفيه تانيين هتحس إنك ولا بتحبهم ولا بتكرههم فهيبقوا معارف علاقتكم سطحية على قد السلام.. وفيه ناس تانية كنتوا صحاب والأيام بعدت بينكم.. ولو بتفكر يا ترى صحابك هيفضلوا في حياتك للأبد ولا لأ اعرف إيه هي نظرية الرقم السحري!
إيه هي نظرية الرقم السحري أو “Dunbar’s number”؟
عالم الأنثروبولوجيا وعلم النفس التطوري البريطاني “روبن دنبار” سنة 1993 أسس دراسة بتقول إن العدد الأقصى للأشخاص اللي تقدر تحافظ على علاقات مستقرة معاهم هو 150 فرد وسماها نظرية “رقم دنبار” أو “الرقم السحري”.. وقصده بالعلاقات المستقرة دي إنهم الناس اللي عارفهم كويس وبتحس إنك على طبيعتك من غير ما تتحرج
دوائر نظرية الرقم السحري
دنبار قسم العلاقات لطبقات أو دوائر متداخلة على حسب القرب العاطفي:
- الدائرة المقربة: دي أضيق دائرة وفيها الأهل والصحاب المقربين اللي بتحتاجهم وترجعلهم وقت الأزمات.. ودول بيتكونوا من 5 أشخاص
- دائرة التعاطف: دي الدائرة اللي فيها الصحاب اللي بتحبهم جدًا من قلبك وبتقابلهم كل شوية ولو خسرت حد فيهم هتزعل.. ودول بيتكونوا من 15 شخص
- الدائرة الاجتماعية: دول الأشخاص اللي بتتواصل معاهم ممكن مرة في الشهر بس علاقتهم مش عميقة أوي بس تعزمهم على مناسباتك.. ودول بيتكونوا من 50 شخص
- دائرة المعارف: دول الناس اللي علاقتك بيهم سطحية جدًا وممكن تكون قابلتهم مرة واحدة أو مرتين في حياتك.. وهما 150 شخص وده الحد الأقصى اللي الدماغ البشري تقدر توصلها في إدارة العلاقات
إيه درجة القرب بينك وبين كل دائرة من دول؟
مش لازم العلاقات دي تبقى قد بعض في الأهمية أو درجة القرب.. ممكن تبقى العلاقات اللي محافظ عليها عشان بتساعدك أو ضروري تفضل على اتصال بيهم زي زمايل الشغل مثلًا
طب إشمعنا رقم 150 بالذات؟
دكتور “دنبار” حدد الرقم ده على أساس دراسة عملها على مجموعة من القرود ولقى إن حجم القشرة المخية الحديثة_ وده الجزء من الدماغ المسؤول عن التفكير الواعي والإدراك واللغة عند الثدييات_ مرتبط بعدد العلاقات اللي موجودين فيها.. وطبعًا عشان حجم القشرة المخية الحديثة عند البشر أكبر فحدد “دنبار” إن عدد العلاقات المثالي المتوسط هو 150 شخص
نقد نظرية الرقم السحري
- دراسة انتشرت في مجلة Science Alert سنة 2021 بتقول إن حجم العلاقات البشرية المستقرة أقل بكتير من رقم دنبار وإنه بيوصل لـ 42 شخص
- أستاذ بجامعة ستوكهولم “باتريك ليندنفورز” قال إن حجم القشرة المخية الحديثة مابتحددش عدد العلاقات اللي الشخص يقدر يحافظ عليها طول حياته.. وإن نظرية الرقم السحري اتعملت في التسعينات ودلوقتي السوشيال ميديا غيرت ده
وفي الآخر حياتك زي البيت والعلاقات زي الزوار كل حد فيهم بيسيب بصمة مميزة عمرك ماهتنساها فاختيارك ليهم مهم عشان البصمة تكون جميلة.. والصحاب مش بالعدد لا الكُترة ولكن بوقفتهم جنبك وقت الشدة
