العفريت هيمشي إمتى عن مانشستر يونايتد؟

إقالة روبن أموريم من تدريب مانشستر يونايتد ما كانتش مفاجأة ولا قرار فني مفصول عن السياق.. دي كانت نتيجة طبيعية لمسار طويل من التخبط بدأ من لحظة رحيل السير أليكس فيرجسون في صيف 2013.. ساعتها يونايتد كان بطل دوري لكنه سايب فراغ إداري وفني ضخم.. فراغ النادي فشل في إنه يملاه لحد النهاردة.

القرار رجّع نفس السؤال اللي بيتكرر كل موسم.. ليه مانشستر يونايتد  بيلف في نفس الدايرة وأندية تانية كبيرة وقعت وقامت ورجعت تنافس بقوة؟ وليه كل مدرب بييجي يمشي بنفس السيناريو؟

إرث فيرجسون

فيرجسون ما كانش مجرد مدرب ناجح.. كان مؤسسة كاملة.. صاحب قرار ومدير فعلي وحارس لهوية النادي وانضباطه وثقافته..بعد رحيله الإدارة تعاملت مع الموضوع كأنه تغيير اسم مش تغيير منظومة.

تم تعيين مدربين بأساليب مختلفة من غير ما يكون في إطار عام يحكم المشروع.. مويس بأسلوب محافظ.. فان خال بمنهج صارم.. مورينيو بعقلية نتائج.. سولشاير بالروح.. رانجنيك كمستشار.. تين هاج ببناء طويل المدى.. وأخيرًا أموريم بفكرة ضغط وهوية هجومية.. كل واحد دخل بمشروع مختلف وخرج قبل ما يكمله.. والنتيجة فريق بلا شخصية واضحة ولا هوية كروية مستقرة.

أموريم بين التوقعات والواقع

أموريم جه ليونايتد كمدرب شاب ناجح.. عمل شغل واضح في البرتغال.. عنده كاريزما من أول الشهور بدأت إشارات المشاكل تظهر.. تصريحات غير مباشرة عن محدودية الصلاحيات.. شكوى من نوعية اللاعبين وعدم توافقهم مع أفكاره.. نتائج متذبذبة وأداء غير مقنع.

مع كل خسارة الضغط كان بيزيد.. ولما قال بشكل صريح إن المشكلة إدارية مش فنية بس.. بقى واضح إن الصدام قرب نهايته.

فين أصل الأزمة؟

أزمة مانشستر يونايتد إدارية قبل أي شيء.. النادي اتدار سنين طويلة بعقلية تجارية أكتر منها كروية.

التعاقدات كانت كتير  من غير خطة واضحة.. أسماء كبيرة لأسباب تسويقية.. لاعبين مش مناسبين لفلسفة المدرب.. وكل مدرب يطلب شكل معين وبعد ما يمشي ييجي اللي بعده يطلب العكس.. وده خلق فريق مفكك.. لاعبين من مدارس مختلفة.. ومنظومة غير متجانسة.

راتكليف دخل ولكن!

دخول جيم راتكليف وINEOS اتقدّم كخطوة إصلاحية كبيرة.. لكن الحقيقة إن الرجل ورث تركة تقيلة من الفوضى سببها أكتر من عشرين سنة من إدارة عائلة جليزر.. وتقارير صحفية زي تقرير مجلة فورتشن في 2024..  قالت إن راتكليف ركّز في البداية على تقليل التكاليف أكتر من تطوير كرة القدم نفسها.. تخفيض مكافآت موظفين واستبدالها بقسائم شراء خلق حالة غضب جوه النادي.. ورغم إن راتكليف قال إنه مستعد يتحمل النقد.. إلا إن الجمهور بدأ يحس إن التغيير أبطأ من المتوقع.

الجليزر.. أصل العقدة

في فبراير 2025 تقارير بريطانية أكدت إن راتكليف حاول شراء النادي بالكامل والخروج من عباءة الجليزر.. لكن العائلة رفضت البيع وأكدت إنها مش ناوية تفرّط في النادي بسهولة.. وده عزز إحساس الجمهور إن الغليزر بيتعاملوا مع مانشستر يونايتد كأصل استثماري مش مشروع رياضي.

وفي تقارير تانية قالت إن الجليزر نفسهم مش راضيين عن أسلوب راتكليف المختلف في الإدارة.. وده خلق صراع داخلي زاد الوضع تعقيدًا.

أساطير النادي شايفين إيه؟

–  جاري نيفيل أكد أكتر من مرة إن تغيير المدربين من غير تغيير جذري في الإدارة مضيعة وقت.. أي مدرب هيقعد شوية ويمشي طالما مفيش هوية ومشروع ثابت.

– نيكي بات وصف النادي إنه مكسور من جوه.. وقال إن حتى أفضل مدرب في العالم مش هيعرف ينجح في البيئة دي.

– واين روني قال في 2025 إن مانشستر يونايتد فقد روحه.. وإن المشكلة أكبر من اسم مدرب وأكبر من أداء في الملعب. 

رونالدو قالها بدري

حوار كريستيانو رونالدو مع بيرس مورجان في 2023 كان نقطة كاشفة.. رونالدو انتقد البنية التحتية وثقافة النادي وقال إن يونايتد ماتطورش من 2009 ووقتها الهجوم عليه كان عنيف.. لكن مع الوقت كلامه بقى منطقي عند شريحة كبيرة من الجمهور

ليه غيرهم عرفوا يرجعوا؟

أرسنال صبر على أرتيتا رغم الخسائر.. الإدارة كانت ثابتة وبنت مشروع واضح.. دلوقتي الفريق منافس على البطولات.

نابولي وميلان وإنتر مروا بأزمات.. لكنهم رجعوا بمشاريع واضحة واستقرار إداري وتعاقدات ذكية.. ويونايتد الوحيد اللي كل مرة يغير الاتجاه بالكامل.
اللي ممكن نقوله إن إقالة أموريم بتحط مانشستر يونايتد قدام مفترق طرق حقيقي.. يا يكمل في نفس الدايرة.. يا يبدأ إصلاح جذري من فوق لتحت.

النادي مش ناقصه فلوس ولا تاريخ ولا جمهور.. ناقصه رؤية وهوية وإدارة كروية حقيقية.. وطول ما المدرب هو شماعة الفشل.. العفريت هيفضل قاعد.. وأي مدرب جاي هيواجه نفس المصير مهما كان اسمه أو أفكاره.