الغمازات.. عيب خلقي ولا علامة من علامات الجمال؟

الغمازات هي فجوة صغيرة كده في الجلد.. وهي مش بس موجودة في الخد ممكن تكون في الدقن وفي غمازات بتكون على البوق من الناحتيتين كده كمان فيه منها في نهاية الظهر وهي كلها بتكون علامة من علامات الجمال بتميز اللي عنده وكمان الناس بتحبها.. فتعالوا نعرف شوية حاجات عنها

حسب مجلة livescience وحسب healthline

إزاي بتتكون؟

الغمازات بتظهر بسبب إن في اختلاف في تشريح أو تشكيل العضلة في الوش أو المكان اللي ظاهرة فيه وفي الوش بتتسمى “العضلة الوجنية الكبرى” ودي مسؤولة إنها تحرك البوق لفوق وتحت.. الناس اللي عندهم غمازات بتتقسم اتنين واحدة فوق زاوية البوق كده والتانية تحتها وبتبقى اسمها المزدوجة أو المشقوقة وده اللي بيشكل الغمازة في الآخر

وراثية ولا لأ؟

حسب مراجعة على مجلة researchgate  الشخص اللي عنده واحد من أبوه أو أمه عنده غمازات بتبقى نسبة إنها تظهر عنده من 25% لـ 50% أما الشخص اللي عنده أبوه وأمه الاتنين عندهم غمازات فا نسبة إنها تظهر عنده هتكون من 50% لـ 100% بس على الرغم من الاحصائيات دي إلا إن مافيش حاجة واضحة عن إزاي ده بيحصل.. واستشاري جراحة الفم والوجه والفكين في بريطانيا قال مافيش بحث كامل في مسألة الجينات الخاصة بالغمازات لكن الوراثة سائدة جسديًا ومطلوب جين واحد بس أو اتنين من الأب أو الأم عشان الغمازات تظهر لابنهم 

ممكن تبقى موجوة وتروح؟

 

مش دايمًا كل أب وأم عندهم غمازات ولادهم بيكون عندهم برضه.. في ناس بيظهرلها غمازات وهم صغيرين وبتكمل معاهم للآخر بس في حالات تانية بقى بيكون الطفل مولود عنده غمازت وبتروح وهو بيكبر مع الوقت وبتبدأ تختفي خالص وده بسبب فقد الدهون وإن بيحصل تغيرات أخرى في العضلات اللي بتتسبب أصلا في ظهور الغمازات.. وفي ناس تانية مش بتتولد بيها ولكن لما يكبر ممكن تبدأ تظهر عنده غمازات واحدة واحدة وده زي ماقولنا سببه الدهون والعضلات

في النهاية الناس آرائها بتختلف هل هي شكلها حلو ولا لأ وماتعملش حتى دراسة أو احصائية برأي الناس فيها لكن الأكيد إنها مميزة وبتميز الشخص اللي عنده.. كمان في ناس بتحب شكلها وشايفاها علامة من علامات الجمال لدرجة إنها بتعمل عملية مخصوص عشان تظهر عندها غمازات ويبقى شكلهم مميز وحلو.. قولنا إنت شايفها علامة من علامات الجمال ولا لأ؟