الـ “anniversary effect”: السبب اللي بيخلينا متضايقين كل سنة في نفس ميعاد الذكريات السيئة!
لو حصلك ذكرى وحشة أو مزعجة في شهر يناير من سنة أو حتى من 10 سنين هيعدي عليك الوقت والسنين وتيجي في شهر يناير في نفس الأيام تحس بنفس المشاعر المؤلمة اللي حسيت بيها لما الذكرى دي حصلت.. يمكن بتأثير الوقت بتهدى شوية في مشاعرك لكن هتحس إنك مقريف أو مش كويس ومش فاهم ليه! ومع التطور اللي بقينا فيه لما فيسبوك أو انستجرام مثلا بيطلعولك “الميمورز” وتشوف بوست أو صورة معينة كنت منزلها فتلاقي نفسك متضايق بعد ما شوفت “الميموري” دي وممكن تقوم تغني عيد ميلاد جرحي للفنان هاني شاكر بس هتبقى حاسسها بجد.
لو بيحصل معاك كده فأكيد بتقلق وتفضل تسأل نفسك طاب أنا ليه حاسس بالمشاعر السيئة دي تاني! هل أنا كده تخطيت اللي حصل ولا لسه! طاب أنا كده طبيعي ولا ده بيحصل مع الناس كلها! عشان كده دورنا ورا الموضوع ولقينا إن موقع “psychologytoday” اتكلم على الموضوع ده وقال إن فيه حاجة اسمها “anniversary effect”.
الـ “anniversary effect” هي عبارة عن مجموعة من المشاعر والأفكار والذكريات المقلقة اللي بتحصل للشخص في الذكرى السنوية لأي تجربة مهمة، ساعات بتبقي سبب في شعور الشخص بالحزن أو الانفعال أو القلق بمجرد ما الشخص يبص على التاريخ ويربط ده بتاريخ صدمة حصلتله زي مثلا يوم وفاة شخص حد مات أو تاريخ حادثة أو كارثة طبيعية.
أوقات بيبقي صعب توصل للسبب اللي يخليك تدرك إن المشاعر دي بسبب الـ “anniversary effect” خصوصا إن المشاعر مابتكونش متعلقة بيوم معين أو ساعة معينة فعادي ممكن يوم خريفي يفكرك بالامتحانات في الجامعة، أو يوم حر ممكن يفكرك باليوم اللي فركشت فيه من 7 سنين، أو مثلا أغاني وأضواء الكريسماس ممكن يفكروك بلما حد حاول يسرقك أوحصل معاك موقف سخيف في الشغل.
أوقات لما بتحس إن عندك اضطراب مزاجي زي ده فأنت محتاج تدرك إنك عايش بتقومين واحد بيتتبع الوقت وواحد تاني بيخزن التجارب العاطفية، وبالتالي الـ “anniversary effect” بتشير إنك لازم تشتغل على إنك تتجاوز الصدمة اللي عديت بيها، خصوصا إن التجاوز ده جزء طبيعي من عملية الحزن.
موقع “psychologytoday” قال في نفس المقال شوية نصايح عن إزاي الشخص يتخطى تأثير الذكرى دي عليه وهما:
1- حاول كل شهر قبل ما يبدأ إنك تبص على التقويم وتكتشف التواريخ والذكريات المرتبطة بالتواريخ في الشهر ده، لإن ممكن ده يساعدك تبقى جاهز لاحتمال إن يحصلك “anniversary effect”
2- تاريخ الذكرى السنوية مش اليوم الوحيد اللي حصل فيه الأزمة واللي بتحس نفسك فيه إنك متضايق ومقريف، لكن حاول تبقى واعي كفاية إن الأيام والأسابيع اللي قبل أو بعد الذكرى دي ممكن تبقى صعبة عليك.
3- لو الذكرى دي مرتبطة بصدمات عامة أو كوارث كبيرة بيبقى فيها تغطية إعلامية ووسائل الإعلام بتتكلم عنها وبتفكر الناس بيها، حاول تقلل من وقتك قدامك التلفزيون والسوشيال ميديا والمواقع الإخبارية.
4- عبر عن ذكرياتك دي ومشاعرك لما يحصلك تأثير الذكرى السنوية دي فمثلا تقدر تتكلم مع حد من عيلتك أو صحابك أو تكتب يومياتك أو تدور على طريقة مختلفة عشان تعبر بيها عن تجاربك دي.
5- اتأكد إنك واخد بالك من نفسك كويس لإن الرعاية الذاتية والدعم والراحة هيساعدوك تتخطى الصدمة.
6- لو حسيت إنك بتعاني من صدمة نفسية فافتكر إنك مش لوحدك، لإن الخسارة بتأثر على كل واحد فينا لكن بأشكال مختلفة، عشان كده مفيش وقت معين المفروض تبقى بعده كويس فعادي خد وقتك، ولو كنت حاسس إنك مش قادر تتعامل مع مشاعرك لوحدك فكر في إنك تدور على دكتور أو مساعدة من شخص متخصص.
