الفرق بين التواضع وإنك ماتعرفش قيمة نفسك والتوقيت الصح للاتنين
مفيش اختلاف إن التواضع حاجة حلوة والناس كلها بتحبها لو موجود فيك كصفة إنسانية لكن أوقات الناس بتقلل من نفسها أو مبتعرفش قيمة نفسها الحقيقية وده بيكون نتيجته حاجة مش كويسة.. في الموضوع ده هنتكلم شوية عن الفرق بين الاتنين والتوقيت الصح ليهم
حسب Verywellmind وحسب medium وحسب scotthyoung
1- التواضع – Humility
- التواضع عبارة عن إنك يكون عندك نظرة متوازنة لنفسك كده.. تبقى عارف نقط قوتك ونقط ضعفك من غير غرور أو تقليل من نفسك خالص وتكون متفتح إنك تتقبل النقد وتستفاد من الناس وتفيدهم لو انت قادر تعمل ده
- من مميزاته إنك هتعرف نفسك كويس وهتطور بشكل شخصي وكمان هتعرف الناس والدنيا عاملة إزاي وطبعًا هتقرب من الناس لأن محدش بيحب الشخص اللي بنفخها حتى لو هو أجمد واحد في الدنيا
- الحاجة التالتة هي إنك مش هتقلل من نفسك لكن هتعرف قدراتك فين وحدودها إيه وكمان تفهم غلطاتك من غير فشخرة أو تحقير لنفسك
2- إنك متعرفش نفسك – Low Self-Esteem
- ده تقليل من نفسك من خلال إن عينك مبتشوفش غير الوحش ليك بس.. دايمًا شاكك في نفسك وكمان مش عارف تحدد نقاط القوة بتاعتك ولا واثق في النقد اللي بيجيلك
- نتيجته بتكون قلق بشكل مستمر ومبتقدرش تاخد قرارات وكمان علاقتك بالناس بيحصل فيها مشاكل في جانب الحاجات اللي بتعملها أو بتتعملك
3- التواضع مش ضعف ولا قلة ثقة
- التواضع الحقيقي تفكر في نفسك أقل مش تفكر عن نفسك أقل.. بمعنى إنك متبصش أنا شكلي عامل إزاي وعملت إيه وبعمل إيه بالشكل اللي تتمنظر بيه.. لأ تبص لنفسك أنا عملت إيه وطلع كويس ولا لأ ولو عملته كويس تمام متقفش عنده كتير أما لو عملته ناقص حاجة تسمع الانتقادات وتظبط في اللي جاي بحيث يبقى التفكير هنا بنّاء ويزقك لقدام
- الحاجة التانية مش معنى إنك غلطت إنك قليل فتمام يتقالك غلطت وتتقبل ده بدون أي تقليل من نفسك ولا تحس إنك مذلول وده أهم حاجة
4- امتى التواضع مناسب وامتى لأ؟
1- وقت النجاح والتقدير بيكون تمام بدون ما حد يحس إنك بتتنطط عليه
2- وقت الفشل لما تسمح بالاعتراف بالغلط من غير ما معنوياتك تنزل الأرض وتحافظ على نفسك
3- لما تبتدي تقلل من نفسك ومن قيمتك.. لو فيه نقص ممكن يتظبط لكن إنك تقلل من نفسك مش مسموح
5- أخيرًا.. تعمل إيه عشان تظبط الاتنين؟
- زيادة تقدير الذات:
وهنا تركز على نقط قوتك وتتقبل ذاتك بشكلها الحقيقي ويبقى عندك طموح توصل لحاجة.. وفيه حاجة اسمها العلاج المعرفي-السلوكي (CBT) ده بيساعدك تهدى على نفسك شوية وتفكر أحسن.. تجنب التواضع الزائف وده اللي أغلبنا بيعمله بإنه يتريق على نفسه
- تواضع بس بشكل صحي:
أما هنا بتعرف نقاط قوتك وضعفك من غير أفورة يعني تعرفهم زي ماهم بالظبط ولا تزود حبة ولا تقلل حبة.. خلي عندك مساحة تتعلم من الناس عادي.. احترم نفسك وخلي الكل يحترمك ومحدش يقلل منك حتى لو بهزار
- الرحمة الذاتية:
ارحم نفسك واتعامل معاها بلطف لما تغلط واعرف إن الغلط جزء مننا كلنا ومتبالغش في إنك تحس بالدونية أبدًا
في النهاية أكيد التواضع شيء مهم وإنك تقلل من نفسك شيء غلط وهيوديك لحتة مش كويسة.. فـ انت محتاج لما تعمل حاجة تحس بقيمتها عشان الكل يشوف ده ويقدره ولكن متأفورش ولا ترسم الدور على حد عشان في الآخر كله بتوفيق كبير من ربنا وشوية مجهود منك
