القصة الكاملة لهجوم السوشيال ميديا على مبروك عطية

انتشر الكام يوم اللي فاتوا هاشتاج بوقف الشيخ مبروك عطية وكان الهاشتاج بالظبط اللي انتشر على السوشيال ميديا اسمه “اوقفوا مبروك عطية” وده بعد ظهوره في فقرة في برنامج يحدث في مصر اللي بيعرض على قناة MBC مصر وبيقدمه الإعلامي شريف عامر لمناقشة قضية سيدة عانت من العنف المنزلي.

وأثناء فقرة مبروك عطية كان فيه سيدة اسمها آية محمد بتشتكي من معاملة زوجها وبتتهم زوجها إنه بيضربها وبيعذبها وربطها بجنزير لمدة 20 يوم وإنه كان بيسلط عليها كلب مسعور فرد عليها الشيخ مبروك وقال “هناك قاعدة من يوم ما ربنا خلق العالم لغاية يوم القيامة، النساء مبالغات في الشكوى، هذه قاعدة لازم نحطها قدام عنينا، فيه قاعدة تقول لو الإنسان قام من النوم وضرب فورًا أو دخل على البيت وضرب فورًا، فهذا شخص يحتاج مستشفى أمراض عقلية لأنه أكيد عنده مرض، أما الإنسان الطبيعي لا يمكن أن يصل لهذه الدرجة إلا بعد درجة استفزاز قوية جدًا”

وبعد كده سألها الشيخ مبروك إذا كان زوجها مافيهوش حاجة حلوة؟ فردت عليه السيدة وقالت “كان بيجيب لنا أكل حلو، لكن مابسمعش منه غير الإهانة والبصق في وشي” فرد عليها مبروك عطية وقال تاني “النساء يبالغن في الشكوى، وهي عاشت معاه 6 سنين، وخلفت منه 3 عيال بالمودة ولا بالكرباج؟ فيه حاجة غلط في القصة، وطالما بيجيب أكل لعياله يبقى عنده قلب”.

وعدم تصديقه ليها ولروايتها في الفيديو وردوده دي كانت السبب إن يتم الهجوم عليه على السوشيال ميديا وده اللي أثار غضب الناس على الهاشتاج لإنه بيبرر العنف المنزلي والضرب واستخدام العنف ضد الستات.

وعلى أساسه رد الشيخ مبروك عطية على الهجوم ده على صفحته الرسمية على الفيسبوك وظهر في لايف وقال “إنه رد الرد اللي بيرضي الله عز وجل وإن كل اللي رد بيه له دليل في الكتاب والسنة والصلح خير” وقال إن موضوع السماع من طرف واحد مش عدل.

وقال إنه سأل البنت عن مميزات جوزها وردت عليه وقالتلته إنه بيجيلها أحسن وأفضل أكل وقال إنه في الحلقة نفسها وقبل ماتخلص طلب من كل رجل أنه يبوس رأس مراته، وقال “بنعيش في زمن الناس بتلتقط الكلام وكلماتي عدت عشرات الألوف من الكلمات الطيبة وماحدش خد باله غير من شوية كلمات عشان يصطياد الكلام، وما يُرضي ربنا بنقوله، واحد داخل البيت يضرب دا مريض نفسي، وهذا الدين بيحترم المرأة” وقال إنه صرح في الحلقة إن أبا حنيفة أجاز ضرب الزوجة بالسواك مش بالسكينة.

واثناء اللايف على الفيسبوك كمان قال “خلي للصلح مطرح ياما سمعنا أكثر من كده ورجعوا وعاشوا، والاصطياد في المياه العكرة عيب ومش أخلاق هما مش لاقيين في الورد عيب قالوا يا أحمر الخدود، ولو الزوجة عايزة الطلاق فمافيش حد يقدر يمنعها، وهي صاحبة القرار.

وأضاف كمان إنه الوحيد اللي فسّر قول الله تعالى بأن “الرجال قوامون على النساء”، بأنهم خدامين عند النساء، لإن قوام عليها بأنه سريع القيام عليها يعني بيسارع في شغلها ومساعدتها.

وقال الشيخ مبروك عطية إن الجمهور عايز منه إنه يطلق اللعنات والمساعدة على الخصام، وقال “بقالي 40 سنة على الشاشة بقول اتقوا الله في النساء”.