مراكم مذاكرة أو مضغوط في الشغل؟ حل كل ده في إنك تقعد مع صاحبك!
رغم إن الدراسة والشغل مرحلتين مختلفتين تمامًا عن بعض.. بس مشتركين في حاجة واحدة وهي إنكم محتاجين تنجزوا اللي وراكم بأسرع طريقة.. ولو مابتعرفش تقعد شوية على بعض وتنجز.. فالحل اللي قدامك إنك تلم خيبتك على خبية صاحبك لأنه هيساعدك تنتج أكتر.. وهو ده الـ Body Doubling اللي هنقولك بيساعدك إزاي
إيه هو الـ Body Doubling؟
حسب Forbes هو طريقة شغل أو مذاكرة مع شخصين أو أكتر في مكان واحد سواء بقى أوفلاين أو أونلاين.. ومش شرط خالص إنكم تكونوا بتعملوا نفس التاسك.. المهم تكونوا مشتركين في نفس الهدف وهو إنكم تنتجوا كتير وتخلصوا اللي وراكم.. وده بيزود إنتاجيتك
إيه السر ورا إنه بيزود الإنتاجية؟
ممكن تحس إن الطريقة دي بتساعد الأطفال زي ما كانت مامتك بتقعد جنبك وانت صغير عشان ماتنامش على الكتاب وتضيع وقت.. بس نحب نقولك إنها مش بس بتشتغل مع الأطفال لكن كمان مع الأكبر عشان أسباب هنقولهالك دلوقتي حسب موقع Myndlift و Psychology Today:
- المراقبة (Accountability): فكرة إن حد جنبك بيتابع وصلت لإيه ومن غير ما يضغطك بيشجعك إنك تركز في شغلك أو مذاكرتك وتحس بالمسؤولية
- التحفيز: لما بتلاقي حد مركز في شغله بتحس إن بقى قدامك مثال عايز تبقى زيه.. وده بينظم خلايا عصبية في الدماغ اسمها Mirror neurons المسؤولة عن عكس تصرفات اللي حواليك وإنك تعمل زيهم
- التعاون: لما بتلاقي حد بيشاركك حاجة بتحس إن فيه ونس معاك.. فالدنيا بتبقى أبسط وأسهل
- تنظيم المشاعر والوقت: لما بتشتغل لوحدك وانت منعزل عن اللي حواليك ممكن تحس بالملل.. وده بيقل كتير لما حد بيكون معاك.. أما بالنسبة للوقت فلو كنت حد مابياخدش باله من الوقت (Time Blindness) فوجود حد معاك بيخليك تلتزم خلال المدة اللي محددينها
- مفيش تسويف: المماطلة بتاعة كوباية شاي وهبدأ بتقل خالص مع وجود شخص بيفكرك بالهدف اللي جايين عشانه
طب إزاي تعمله صح بدل ما تتسوح أكتر؟
- اختار الشخص المناسب: مالوش في الرغي ولا تضييع الوقت وبتاع جد وشغل
-
- حدد الوقت اللي هتخلص فيه التاسك وتتابعوا بعض وصلتوا لفين في اللي وراكم
- اسكتوا شوية: يعني آه اتكلموا بس في وقت البريك بتاعكم.. لكن وقت الجد قللوا كلام واتفقوا على ده من البداية
- اختاروا مكان جوه مناسب للتركيز وبعيد عن المقاطعات ويكون مريح للطرفين.. ولو صعب تتقابلوا الأونلاين ماقصرش في حاجة
وفي الآخر صوابعك مش زي بعضها فلو ده ساعد حد مش لازم هيساعدك ممكن تكون بتعرف تنجز أكتر لوحدك.. بس لو انت بتماطل كتير ومابتعرفش تنجز جايز ده يكون فايدة ليك وهيخليك تخلص اللي وراك
